Гулнора Каримова Швецияда жиноят содир этганликда гумондор деб эълон қилинди

Швециядаги Коррупцияга қарши кураш бўлими прокурори Гулнора Каримовани коррупция билан боғлиқ жиноят содир этишда расман гумонланувчи деб эълон қилган.

Коррупцияга қарши кураш бўлими прокурори Гуннар Стетлерга кўра, Ўзбекистон президентининг қизи Гулнора Каримова Швециянинг Телиасонера мобил алоқа ширкати билан боғлиқ пора бериш жинояти юзасидан ҳали ҳам давом этаётган терговда гумонланувчи деб кўрилмоқда.

"Гулнора Каримова Телиасонеранинг Ўзбекистондаги амалиётида порахўрликка аралашган деб гумон қилинаяпти. 2007 йилдан 2010 йилгача бўлган даврда бир неча жиноий амаллар содир этган деб кўрилмоқда", деб айтди Би-би-сига Гуннар Стетлер.

Гумонланаётганлар орасида Телиасонера ширкатининг кўпчиликка таниш камида уч ходими бор, дейди Швед прокурори.

Бу терговда неча Ўзбекистон фуқароси жиноятга алоқадор деб кўрилаяпти, деган саволга Гуннар Стетлер, тергов манфаати нуқтаи назаридан бу ахборотни ошкор этмасликни маъқул кўришини билдирди.

Швеция прокурори маҳкамага йўллаган маълумотномасида айтилишича, Швеция мобил алоқа ширкати Ўзбекистонда пора бергани билан боғлиқ тергов доирасида 8 мамлакатга сўров юборилган.

Бу мамлакатлар орасида Швйцария, Франция, Туркия, Ҳолландия, АҚШ ва Россия борлиги айтилган.

Бир неча давлатда худди Телиасонера ишига ўхшаш жиноят терговлари бошланган.

Швед прокуратурасига кўра, шубҳали олди-бердилар ортида Гаяне Авакян эмас, Гулнора Каримова турган ва бу олди-бердилардан салмоқли манфаат кўрган.

Швеция журналистлари бу мамлакатнинг Телиасонера мобил алоқа ширкати Ўзбекистон бозорига кириш учун Гулнора Каримовага пора бергани даъво қилинган <link type="page"><caption> ҳужжатли фильм тасвирга олишган</caption><url href="http://www.bbc.co.uk/uzbek/multimedia/2012/09/120923_documentary_svt.shtml" platform="highweb"/></link> ва бу фильм телевидение орқали намойиш этилганидан кейин текширув бошланган эди.

Телиасонеранинг Ўзбекистонда мобил алоқа лицензиясини қўлга киритишдаги шериги деб кўрилган "Такилант" ширкатининг Швециядаги маблағини музлатишга қарор қилинган.

Швециядаги тергов давом этар экан, Швейцариядаги тергов мобайнида Гулнора Каримовани пул ювишда гумонланувчи деб эълон қилишга қарор қилинган.

АҚШ Адлия вазирлиги ва Қимматли қоғозлар комиссиялари ҳам Телиасонеранинг Ўзбекистон билан олди-бердисига доир текширувларни бошлаган.

Ўзбекистон прокуратураси ҳам Гулнора Каримовага яқин кишилар устидан тергов бошлаган.

Унга яқин саналган уч киши Тошкентда ҳибсга олингани хабар қилинган.