Алишер Усмонов ўзига тегишли Facebook ва Apple ҳиссаларини сотди
Сурат манбаси, AP
Россиянинг энг бой одами асли ўзбекистонлик миллиардер Алишер Усмонов Apple ва Facebook ширкатларига оид акцияларини сотгани хабар қилинмоқда.
Бу ҳақда Усмонов акцияларини бошқарадиган USM Advisors ширкати раҳбари Иван Стрешинский Bloomberg агентлигига айтган.
Унинг сўзларига қараганда, жаноб Усмонов Apple ҳиссаларини шу йил бошида сотишга қарор қилган.
Усмонов бунгача Америка ширкатининг 100 миллион долларлик акцияларига эга бўлган.
Бундан ташқари Алишер Усмонов Фейсбук ижтимоий тармоғидаги ҳиссаларини ҳам қисқартирган. Лекин уларнинг аниқ рақами маълум эмас.
Алишер Усмонов дастлаб Фейсбук қоғозларини 2009 йилда сотиб олиб, ширкатнинг 10 фоизлик акциялари эгасига айланган эди.
Facebook акциялари савдосидан у 2009 йилда 1,5 миллиард долларга яқин фойда кўрган.
Иван Стрешинскийга кўра, Усмонов энди Хитойдаги интернет ва янги технология ширкатлари билан ҳамкорликни бошлаган.
Унинг билдиришича, ҳозир Алишер Усмоновга қарашли 70-80 фоиз қимматбаҳо қоғозлар Хитой ширкатларига тегишли.
Уларнинг орасида йирик интернет ширкатлари Alibaba Group ва JD.com. кабилар бор.
Бундан ташқари Усмонов МегаФон мобил алоқа оператори ва Mail.Ru Group нинг ҳам ҳиссадори саналади.
Хабарларга кўра, Усмоновга тегишли Mail.Ru Group ширкати "Вконтакте" нинг 11,9 фоиз қимматли қоғозларини "Мегафон" раҳбари Ивана Тавриндан сотиб олган.
Шу тариқа Алишер Усмоновнинг "Вконтакте"даги ҳиссаси 51,99 фоизга етгани айтилади хабарда.
Стрешинский сўзларига кўра, бу ташкилотлар билан бизнес ташқи шартларга боғланмаган ва Россиянинг ўзида юритилади.
Усмонов айни пайтда Россиянинг энг бадавлат кишиси бўлиб, Forbes журналининг келтиришича, унинг бойлиги 18,6 миллиард долларга тенг.
Россиялик бизнесмен асосий даромадини металлургия саноатида топган. Россиядаги йирик "Металлоинвест" ширкатининг асосий ҳиссалари Усмоновга тегишли деб кўрилади.
Жаноб Усмонов мобил алоқа, медиа ва интернет соҳасидан ташқари Британиянинг Арсенал футбол клуби улушларига ҳам эгалик қилади.
