Янги рўйхатда: Алишер Усмонов яна Россияда бойларнинг бойи

Ҳа, Америкада чоп этилувчи нуфузли Forbes журналининг хулосасига таянилса, худди шундай.

Бунга асли ўзбекистонлик миллиардернинг янги йиллик рўйхатда 6 поғона пастлагани ҳам тўсқинлик қила олмаган.

Forbes жаноб Усмоновнинг бойлигини $18.6 миллиард доллар, деб баҳолаган.

Шунча бойлиги билан Алишер Усмонов дунё миллиардерлари орасида 40-ўринни эгаллаган.

Янги рўйхатнинг энг катта янгилиги эса, “Microsoft” ширкати асосчиси Билл Гейтснинг яна жаҳонда бойларнинг бойига айлангани бўлган.

Ўз ўрнида таъкидлаб ўтиш жоиз, бу йил америкалик юзлаб миллиардерлардан бирортаси ҳам қанчалик бой эканлик бобида жаноб Гейтснинг олдига тушолмаган.

Дунё энг бадавлат одамининг бойлиги қанча бўлди экан, деб қизиқаётган бўлсангиз - $76 миллиард доллар.

Бу – ўтган тўрт йил давомида Forbesнинг йиллик рўйхатида ҳеч кимни ўзига яқинлаштирмай келаётган мексикалик миллиардерларнинг миллиардери Карлос Слимнинг шунча тўплаган бойлигидан $4 миллиард долларга кўп.

Бундан ўзингиз ҳам аллақачон хулоса чиқариб олган бўлсангиз керакки, жаноб Слим бу йил иккинчи ўрин билан кифояланишга мажбур бўлган.

Агар, Forbes журнали ҳисоб-китобларига таянилса, бир йилнинг ичида Билл Гейтснинг бойлигига $9 миллиард доллар қўшилган.

“Миллиардерларнинг Марк Твени” бўлган Уоррен Баффет жаноблари эса, ўтган бир йил ичида бироз камбағаллашиб, Америкада иккита, жаҳонда эса, тўртта бой одамдан биттаси, деб топилибди.

Хўш, бу кишининг бойлиги қанча бўлди экан, десангиз, $58.2 миллиард доллар. Шунда ҳам озмунча эмас экан-ку, дея таажжубланаётган бўлсангиз, ҳақсиз.

Учинчи ўрин эса, $64 миллиард долларга тенг бойлиги билан дунёда ўзининг Zara дўконлар тармоғи билан танилган испаниялик таниқли тадбиркор Амансио Ортегага насиб этган.

Энг кўп бойиганлар ҳам бор

Аммо, Forbes журналининг янги йиллик рўйхатида камтаргина 21-ўринни эгаллаганига қарамай, бу йил энг кўп бойлик тўплаган “Facebook” ижтимоий мулоқот тармоғи асосчиси Марк Цукерберг бўлибди.

Тармоқ ҳиссалари нархларининг осмонга ўрлаши сабаб, унинг нақд бойлигининг умумий қиймати $28.5 миллиард долларга етибди.

Ўз ўрнида сўнгги хабарнинг таъкидлаб ўтиш лозим бўлган яна бир жиҳати, бу йил жаҳондаги аёл миллиардерларнинг сони ҳам чорак фоизга ортиб, рекорд сон – 172 тага чиқибди.

Миллиардерларининг сони бўйича эса, Америка Қўшма Штатлари дунёнинг қолган барча давлатларини ортда қолдириб кетибди.

Агар, журнал келтирган маълумотларга таянилса, бугун Америкада 492 та миллиардер яшаркан.

Ўзининг 152 та миллиардери билан Хитой янги рйўхатда иккинчи ўринни эгаллаган бўлса, бу икки давлатники билан таққосланганда, бор-йўғи 111 та миллиардери билан Россия юқори учликни тўлдирибди.

Аммо, таъкидлаб ўтиш лозим бўлган жиҳати шундаки, юздан ошиқ россиялик миллиардердан 8 таси илк бор Forbes журналининг йиллик бойлар рўйхатига киришга муваффақ бўлишган.

Ўзбекистонда кўпчиликка яхши таниш россиялик икки миллиардер: Лондоннинг “Челси” клуби соҳиби Роман Абрамович ($9.1 миллиард) ва Махачқаъланинг “Анжи” жамоаси эгаси Сулейман Керимов ($6.9 миллиард) бу йилги рўйхатда анча паст, 137 ва 196-ўринларни эгаллашган.

Марказий Осиёда энг катта бой ким?

Марказий Осиё давлатлари бойлари орасидан эса, юқори мингталикка Қозоғистон Президенти Нурсултон Назарбоевнинг қизи ва куёви киришган, холос.

Темур Кулибаев ва Динара Кулибаевалар $1.8 миллиард долларга тенг бойликлари билан Forbes журнали таснифида 988-ўринни эгаллашган.

Агар, энг сўнггида хулоса қилинадиган бўлса, бутун дунёда миллиардерларнинг сони ўтган бир йилнинг ичида рекорд даражада ортиб, 1.426 кишидан 1.645 кишига етибди.

Уларнинг умумий бойлиги эса, $6.4 триллион долларни ташкил этаркан.

Дунёнинг миллиардерлари шунча бойликни қандай қилиб қўлга киритишгани сизни қизиқтираётган бўлса: Улардан қарийб учдан икки қисми ўз пешона тери билан, 13 фоизи мерос қилиб, қолган 21 фоизи эса, яқинларидан қолган ана шу бойликнинг устига бойлик қўшиб...

Ўз ўрнида, ўтган бир йил ичида кучайиб бораётган инфляция, фонд биржаларининг “ўтириб қолаётгани” ва миллий пул бирлиги қадрини йўқотиб бораётгани сабаб, энг кўп миллиардерларини йўқотган давлатлардан бири Туркия бўлибди: Бир йилнинг ичида 19 та миллиардери миллионерга айланиб қолибди.

Таъкидлаб ўтиш лозим бўлган яна бир муҳим жиҳати шундаки, ўз қудратлари ёки мавқеъларидан фойдаланиб, бойишгани учун ҳам Forbesнинг йиллик бойлар рўйхатига қироллик оиласи аъзолари ёки диктаторлар киритилмайди.