Янги рейтинг: Ўзбекистон паспортининг қудрати Британияники билан тенглашди O‘zbekiston dunyo yangiliklar

Henley Passport Index ўзининг янги рейтингини эълон қилди. Британия паспортининг кучи Ўзбекистонники билан бир хил бўлиб чиқди. Дунёдаги энг қудратлиларидан бири бўлган АҚШ паспорти эса, Руанданики билан тенглашди.

Bloomberg ҳам сарлавҳасига худди шу нарсани олиб чиқди.

Буюк Британия, АҚШ ва Япония дунёнинг паспортлари энг зўр давлатлари бўлиши мумкин, аммо ковид чекловлари боис, ҳозир бу кўп нарсани англатмаслиги мумкин, деб ёзади нашр.

Янги рейтинг таҳлилидан маълум бўлишича, амалда бўлган саёҳат чекловлари боис, ҳозир паспортларнинг фарқи бўлмай қолган.

Қудратли давлатларнинг паспортлари ривожланаётганлариники билан тенглашган.

Қудратларнинг бугунги кучи

Дейлик, назарияда сиз Япония паспорти билан дунёнинг 193 давлатига виза бошоғриғисиз, бемалол боришингиз мумкин.

Яъни, Япония паспорти дунёда энг кучлиси бўлади.

Аммо, ковид чекловлари сабаб, бу паспорт билан бугун сиз амалда бор-йўғи 75 та давлатга чиқа оласиз, дейди нашр.

Яъни дунёнинг энг қудратли паспортининг кучи ҳозир деярли Қозоғистонники билан тенглашиб қолган.

Нашр бунинг ортидан дунёнинг энг иккита қудратлисидан биттаси бўлган Сингапур паспортининг бугунги аҳволига назар ташлаган.

Глобал коронавирус пандемиясигача Сингапур паспорти сизга дунёнинг 192 давлати эшикларини очган.

Ҳозир эса, бу мамлакатларнинг сони бор-йўғи 70 тага тушиб қолган, Сингапур паспортининг кучи Доминикан Республикасиники билан тенглашган.

Bloomberg нинг ёзишича, вакцинацияда илғор бўлган давлатлар паспортларининг қудрати ҳам ҳавас қилгудек эмас.

Энди ҳавас қилмаса ҳам бўладими?

Дейлик, Буюк Британия ва АҚШ паспортлари авваллари дунёнинг 187 давлатига шундоққина боришга имкон берган.

Аммо, маълум бўлишича, икковлон янги рейтингда энди 7-ўринни бўлашишган.

Британия паспортининг бугунги кучи Ўзбекистонники билан тенглашган.

Бу паспорт билан бора олишингиз мумкин бўлган давлатлар сони ҳозир 60 га ҳам етмаслиги аён бўлган.

АҚШ паспортининг ҳозирги қудрати эса, Руанданикидан фарқ қилмай қолган.

Нашрнинг Henley & Partners раиси Кристиан Келиндан иқтибос келтиришича, дунё бўйлаб борди-келдиларга "яна камида бир йил жиддий зиён етади".

"Кўпгина давлатларда глобал инқирозни бошқариш қобилиятига жиддий шубҳалар пайдо бўлди ва бу истиқболга қаратилган устувор вазифаларнинг қабул қилинишига олиб келди", дейди Келин.

Шундай экан, унга кўра, "одамлар яшаш ва паспорт имкониятларини кенгайтиришга ҳар кўра қачонгидан кўра кўпроқ эҳтиёж сезишлари аниқ".

Ўзбекистон: Кичик Макка бўла оладими?

Россия-Ўзбекистон ва ҳалол туризм: "Қанчалаб мусулмон Ўзбекистонни зиёрат қилмоқчи"

Ўзбекистон: Мусулмон, яҳудий ва насроний бирга сиғинаётган қабр

Ўзбекистон паспорти кучсизландими?

Henley Passport Index нинг янги паспортлар рейтингида Ўзбекистон 91-ўринда келган.

Шу йил апрель ойида эълон қилинганида кўрсатилганидан 6 поғона пастлаган, паспорти бироз кучсизлангандек кўринган.

Аммо ўзбекистонликлар визасиз бора олишлари мумкин бўлган давлатлар сони ўзгармаган, 57 талигича қолган.

Уларнинг аксариятини бу гал ҳам Африка, Осиё ва МДҲ давлатлари ташкил этган.

Минтақада 74-ўрин билан энг яхши натижани Қозоғистон қайд қилган.

Марказий Осиёда паспорти энг кучсизи эса, Туркманистон бўлиб чиққан. Рўйхатда 95-ўринни эгаллаган.

Henley&Partners ташкилоти ўз рейтингини дунё давлатларида амалда бўлган виза тартиби ва фуқароларининг қанча жойга визасиз бора олишлари мумкинлигини ўрганиш асосида ишлаб чиқади.

Янги рейтингда Япониянинг паспорти яна энг зўри, Афғонистонники эса, 116-ўрин билан энг ёмони бўлиб чиққан.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek