Россия: Аёллар энди Москва метросини "забт этишмоқда" - қоидалар ўзгарди, O‘zbekiston, Rossiya, dunyo, yangiliklar

Россия: Аёллар энди Москва метросини "забт этишмоқда" - қоидалар ўзгарди. Россия дунёнинг энг катта сондаги ўзбекистонликлар турли иш, юмуш ва таҳсилда банд давлати бўлади.

Москва метросининг билдиришича, ўтган йили аёлларни айрим ишларга олишни тақиқловчи баҳсли қонун бекор қилингач, ўзининг илк поезд бошқарувчиларни ишга қабул қилган.

Шаҳар транспорт бошқармаси якшанба куни Москва метросининг "электровозларни бошқарувчи илк аёлларни ишга олгани"ни олқишлаган ва буни янги бир даврнинг ибтидосига қиёслаган.

2021 йилнинг 1 январида ўн икки аёл пойтахт метроси жамоасига қўшилган.

Москва метроси 1980 йиллар бошларидан буён аёлларни ҳайдовчи сифатида ишга олишни тўхтатган ва энг охирги аёл ходим 2014 йили ишини тарк этган эди.

Бу касб жисмоний жиҳатдан ўта оғир ва аёллар учун хавфли ишлар рўйхатига киритилган эди.

Шунга қарамай, бу касб юк машинаси ва қайиқларни бошқариш касблари билан бирга ўша рўйхатдан ўчирилди. Чунки бу касбда бажариладиган аксар ишлар автоматлаштирилган эди.

Шанба кунги қўшма баёнотда Москва мэри Сергей Собянин ва шаҳар транспорт бошқармаси янги ишга қабул қилинган 25 аёлнинг 12 нафари ўқув машғулотларини ўтаб бўлгани, рухсатнома олгани ва "илк йўловчиларни ташиш"га тайёрлиги маълум қилган.

Аёл ҳайдовчилар "поездларни бошқариш учун қўлайлигига қараб юбка ёки шимни" - ўзларига мос бўлган касб кийимларини танлашлари мумкин, деб қўшимча қилинади баёнотда.

Россиянинг энг муҳим байрами - Янги йилни нишонлаш учун сабаб

Ольга Ившина, Би-би-си Pус хизмати мухбири

"Ўнлаб аёл ҳайдовчилар шу ойда Москва метросида иш бошлар экан, сезиларли ҳаяжон кузатилди.

Аёллар учун хавфли деб ҳисобланган 356 та касб рўйхатига бу касбнинг ҳам тиркаб қўйилгани ортидаги сабаблар борасида шубҳалар пайдо бўлгач, бу ўзгаришлар юз берди.

Йўриқномалардан бирига кўра, ҳар соатда икки ва ундан кўп марта 10 килодан ортиқ кўтаришга тўғри келадиган ишларга аёлларни қабул қилиш тақиқланади.

Россияда аёллар ҳуқуқлари бўйича нодавлат ташкилотлари "бир ёшли боланинг ўртача вазни шунча - давлат бирорта онага боласини кўтаришга чеклов қўйгани йўқ"лигига эътибор қаратган.

Кейинги йилларда рус аёллари чеклов қўйилган касблар рўйхатини ўзгартириш ёки бекор қилиш ҳақида судга шикоят қилишган. Ўтган йил рўйхат ниҳоят ўзгартирилди ва ҳозир унга иши хавфли кимёвий ва портловчи моддалар билан боғлиқ бўлган 96 та касб киритилган".

Янги ҳайдовчилардан бири Марина Мунтяннинг айтишича, у "машиналар билан ишлашдан қўрқаётгани йўқ"

Яна бири Ирина Долгихнинг айтишича, у метро бекати кузатувчиси бўлиб ишга қабул қилингандан сўнг ҳайдовчиликка ҳужжат топширган. "Бу менинг шахсий ривожланишим, шахсий ўсишим. Шунингдек, менинг ёшлигимдаги орзум рўёбидир", дейди у Россия ТВ каналига.

Москва метроси расмийлари таъкидлашича, аксар янги қабул қилинган ҳайдовчилар асосан метро тармоқларида ишлаб келган оилаларнинг фарзандларидир.

Илк номзодлар ўтган йил бошларида танлаб олинган эди. 22 дан 43 ёшгача бўлган, метро тармоқларида аввалдан ишлаб келаётган - чипта сотувчилар, фаррошлар, менежер ва бекат кузатувчилари бўлган аёллардангина аризалар қабул қилинган.

Аёлларга Москва метросидаги поездларни бошқаришга 1936 йил ва 1980 йиллар оралиғидаги вақтда рухсат берилар эди.

Москва метроси билдиришича, шу йил аёл ҳайдовчилар сони яна оширилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek