Ўзбекистон: Метро қурилишида 6 киши ўлимига сабаб бўлган жиноий иш 9 ой олдин ёпилгани маълум бўлди

Юнусобод метро линияси қурилишида тупроқ ўпирилиши натижасида 6 кишининг ўлимига сабаб бўлган фавқулодда ҳодиса юзасидан жиноят иши айбдорларни топмасдан бекор қилинган. 2020 йилнинг 18 мартида тугатилган иш ҳақида орадан 9 ой ўтиб жамоатчиликка маълум қилинди.

Газета.uz нашрининг мурожаатига жавоб берган Тошкент шаҳар прокурорининг биринчи ўринбосари Икром Наримов «Ўзбекистон темир йўллари» АЖ бошқарувининг туннель қулашига масъул бўлган ходимларга берган ижобий тавсифномасини ва уларнинг чин кўнгилдан пушаймон бўлганини инобатга олиб жиноят иши тугатилганини билдирган.

Прокуратура жавоб хатидан маълум бўлишича, дастлабки тергов давомида иш бўйича йиғилган материаллар ҳамда қурилиш ва давлат назоратини амалга ошириш бўйича тегишли соҳа мутахассисларини жалб қилган ҳолда қурилиш-техник суд экспертизаси ўтказилган.

«Экспертизаси хулосасига кўра, Юнусобод метроси бекатининг туннели ўнг томонининг темир-бетон конструкцияси қулаб тушганига туннелни очиқ усулда ковлашда техник хавфсизлик қоидаларининг бузилганлиги ва қурилиш ишларининг сифатсиз бажарилганлиги сабаб бўлган. Бу масъул шахсларнинг жараённи етарлича назорат қилмаганлиги натижасида содир бўлган», дейилади унда.

Тошкент шаҳар прокурорининг биринчи ўринбосари Икром Наримов ушбу масъул шахсларнинг исмларини ҳам эълон қилган:

Тошкент метрополитени Юнусобод йўналишининг янги қурилаётган қисмида юз берган ҳодиса юзасидан ЖКнинг 257 (Меҳнатни муҳофаза қилиш қоидаларини бузиш) ва 258 (Тоғ-кон, қурилиш ёки портлатиш ишлари хавфсизлиги қоидаларини бузиш) моддалари билан жиноят иши қўзғатилганди.

Шаҳар прокурори биринчи ўринбосарининг хатида бу жиноятларнинг «катта жамоат хавфсизлигини келтириб чиқармайдиган» турига кириши айтилган.

«Аниқланган қоидабузарликлар эҳтиётсизлик оқибатида содир этилганлигини инобатга олган ҳолда юқорида қайд этилган шахслар ўзларига нисбатан қўзғатилган жиноий ишни айблилик тўғрисидаги масалани ҳал қилмай туриб тугатишни сўраб мурожаат қилишган», дейилади хатда.

Шунингдек, Меҳнат вазирлигининг махсус тузилган комиссияси хулосасига кўра, иш берувчи ҳалокатда вафот этганларнинг оила аъзоларига етказилган зарарни қоплаганлиги ва оилалар томонидан эътирозлар мавжуд эмаслиги ишни кўриб чиқишда эътиборга олинган.

Бундан ташқари «Ўзбекистон темир йўллари» АЖ бошқарувининг юқоридаги ходимларга берган ижобий тавсифномасини ҳамда жиноят содир этган шахсларнинг чин кўнгилдан пушаймонлиги инобатга олиниб, жиноят иши тугатилган.

"2020 йил 18 март куни Ўзбекистон жиноят кодексининг 84-моддаси 5-қисм 2-бандига асосан (ижтимоий хавфи катта бўлмаган ёки унча оғир бўлмаган жиноятни биринчи марта содир этган шахс айбини бўйнига олиш тўғрисида арз қилган, чин кўнгилдан пушаймон бўлган, жиноятнинг очилишига фаол ёрдам берган ва келтирилган зарарни бартараф қилган бўлса) жиноят иши тугатилди», — дейилади прокуратура хабарида.

2019 йилнинг 18 декабрь куни Тошкентда метронинг Юнусобод йўналиши қурилишининг очиқ участкасида тупроқ ўпирилиши рўй берганди.

Бир кундан ортиқ давом этган қидирув-қутқарув ишлари натижасида 6 кишининг жасади тупроқ остидан олиб чиқилган. Ҳалок бўлганларнинг тўрт нафари Қашқадарёдан, яна икки нафари Самарқанддан эканлиги хабар берилган.

Зудлик билан Ўзбекистон Вазирлар Маҳкамасининг фармойишига мувофиқ, ҳодисани ўрганиш ва оқибатларини бартараф қилиш учун ҳукумат комиссияси ташкил этилганди.

Ҳукумат комиссияси 2020 йил февралида фожиага хандақ қиялик деворини мустаҳкамлаш ишлари жараёнида йўл қўйилган камчиликлар, лойиҳадан четланиш ҳолати мавжудлиги, ёғингарчилик сувлари ҳамда оқава қувурларидан сизиб чиққан сувнинг интенсив тупроққа шимилишига сабаб бўлганлигини айтган.

Комиссия тўрт оиланинг ҳар бирига 261,9 млн сўмдан ва яна бир оила учун — 281,6 млн сўм миқдорида бир марталик нафақа белгилаган эди.

Бундан ташқари, марҳумларга қарам бўлган меҳнатга лаёқатсиз шахсларга ойлик тўловларни амалга ошириш учун пул миқдори ҳисоблаб чиқилган ва иш берувчиларга тақдим этилган.

Фожиа юзасидан жиноий иш тафсилотларининг орадан 9 ой ўтиб ошкор қилингани ва жиноятчилар жазоланмасдан иш тугатилгани жамоатчилик эътирозига сабаб бўлди.

«Энг даҳшатлиси, бутун бошли туннелни қазиш ва уни қуриш ишлари сифатсиз бажарилгани учун масъул айбдор шахсларга (майда балиқларга) «Ўзбекистон темир йўллари»нинг раҳбарияти (акулалар) ижобий тавсифнома берибди», деб ёзади телеграмдаги Муҳрим канали.

У Сардоба фожиаси ҳам мана шундай якун топиши мумкинлигидан хавотир билдирган.

«Ўн минглаб одамларнинг уйини, тинчини бузган «Сардоба»ни ҳам «Ўзбекистон темир йўллари» қурган, қургач омборни ўз ихтиёрида сақлаб турган. Ҳатто ўйланмасам ҳам бўлади — «Ўзбекистон темир йўллари» бу фожиа айбдорларига ҳам ижобий тавсифнома бера олади. Битта ишни шундай тугата олишибдими, «Сардоба»ни ҳам шундай тугата олишади. Шубҳа йўқ», деб ёзди Муҳрим канали.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek