Ўзбекистон: Президент Мирзиёев топшириғи йил охиригача бажариладими? - O'zbekiston , Mirziyoyev, Internet

9 январ куни Президент Шавкат Мирзиёев 2020 йил охиригача Ўзбекистонда электрон давлат хизматларидан фойдаланувчиларнинг сонини 5 баравар ошириш топшириғини берди.

Аммо мамлакатдаги Интернет тезлиги дунё мамлакатлари ўртасида энг секинларидан бири бўлиб қолишда давом этар экан, жойларда замонавий компютер техникаси етишмас экан, Президент Мирзиёевнинг электрон хизматларни кўпайтириш, иқтисодиётни рақамлаштириш ҳақидаги топшириқларини йил охиригача уддалаб бўлармикан?

Чунки Ўзбекистонни ривожлантириш Ҳаракатлар Стратегиясида белгиланган қатор ишлар 2017 йилдан буён бажарилмай қолиб кетаётгани кузатилмоқда.

Хусусан, 2019 йил 1 январигача тренерлик учун рухсатномани, 2019 йил 1 августидан йўловчи ва юк ташиш лицензиясини Давлат хизматлари агентлигидан олиш йўлга қўйилиши кўзда тутилган, аммо белгиланган муддатида бажарилмагани ҳақида ёзди "Народное слово" газетасида Давлат хизматлари агентлигининг жамоатчилик ва ОАВ билан алоқалар бўлими бошлиғи Севара Зокирова.

Куни кеча эълон қилинган Интернет тезлигига бағишланган халқаро ҳисоботда Ўзбекистон мобил интернет тезлиги секундига 9.51 мегабит билан дунёда 134-ўринда экани, симли интернетнинг ўртача тезлиги эса секундига 22.49 мегабит билан 108-ўринни эгаллагани эълон қилинди.

Халқаро Cable.co.uk компаниясининг 2019 йилги ҳисоботида Ўзбекистон 181-ўринни эгаллагани, бир йил олдингига нисбатан 3 ўрин кўтарилгани айтилади.

Ўзбекистондаги интернет тезлиги билан 5 гигабайтли бадиий фильмни кўчириб олиш учун 8 соат 17 минут 57 секунд талаб қилинади, дейди Cable.co.uk.

Мисол учун, 5 гигабайтли кинони интернетдан кўчириб олиш учун Россияда 45 минут, Британияда 30 дақиқа керак бўлади.

Би-би-си Ўзбек хизмати ўз муштарийларидан ўзлари фойдаланаётган интернетнинг тезлиги ҳақидаги муносабатларини сўради.

"Ҳар сафар инновация, ИТ-сектор, стартап ҳақида гап кетиб, тадбиркорликни, таълимни ва ҳоказоларни ривожлантириш ҳақида эшитганимда, мен бир нарсага ҳайрон қоламан. Қандай қилиб энг оддий бир фактни эсдан чиқариш мумкин - яхши интернет тезлиги ёки интернетнинг ўзи бўлмаса кўп нарса ишламайди...

Монополия ва шунга ўхшаш мавзулар ҳақида ҳозир гапирмайман. Аммо ташқарида 2020 йил, инсон учун интернет худди овқат, сув, электр энергияси, ва газ каби энг бирламчи асосий заруриятлардан бирига айланган. Маслов пирамидасидан биламизки, ушбу эҳтиёжларини қондира олмаган инсонга бошқа нарсалар мутлақ иккиламчи ва кераксиз бўлиб туюлади..", деб ёзди сал олдинроқ Телеграмдаги "Иқтисодчи қайдлари" канали муаллифи.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek