Ўзбекистон: февралдан энг кам ойлик $71 бўлади O'zbekiston
Сурат манбаси, Getty Images
Президент Шавкат Мирзиёевнинг қарори билан Ўзбекистонда 2020 йилнинг 1 февралидан меҳнатга ҳақ тўлашнинг энг кам миқдори 679330 сўм этиб белгиланди.
2019 йилнинг охирги кунида 1 АҚШ долларини 9500 сўмдан харид қилиб, 9550 сўмлар атрофида сотишмоқда, 679330 сўм 71,5 доллари деганидир.
31 декабрь куни "Ўзбекистон Республикасининг "2020 йил учун Ўзбекистон Республикасининг давлат бюджети тўғрисида"ги қонуни ижросини таъминлаш чора-тадбирлари тўғрисида" деб номланган Президент қарори матбуотда эълон қилинди.
Қарорга биноан,
меҳнатга ҳақ тўлашнинг энг кам миқдори - ойига 679330 сўм;
пенсияни ҳисоблашнинг базавий миқдори - 238610 сўм;
энг кам ёшга доир пенсиялар - 466680 сўм;
болаликдан ногиронларга бериладиган нафақа - ойига 466680 сўм қилиб белгиланган.
Бундан олдин мамлакатда бюджет ташкилотлари ходимларининг иш ҳақи, пенсиялар, стипендиялар ва нафақалар 2019 йил 1 сентябридан оширилган эди.
- 2019 йилда Ўзбекистон 1996 йилга қайтдими?
- Президент Мирзиёев ислоҳотлар реал ҳаётда ўз аксини топмаётганини эътироф этди
- Ўзбекистонда энг кам иш ҳақи 24 доллар бўлади, бой ва камбағаллар ўртасидаги фарқ кескинлашган
- "Монополистлар бор экан, қимматчилик бўлаверади"
- "Яна қимматлашиш, лекин Ўзбекистон нархларни эркинлаштириши лозим"
Шу йил августида энг кам ойлик 10 фоиз кўтарилган бўлса, 2020 йил 1 февралидан меҳнатга ҳақ тўлашнинг энг кам миқдорининг ошиши 7 фоизни ташкил этиши айтилмоқда.
Ўзбекистонда 2019 йил майигача энг кам иш ҳақи(ЭКИҲ) тушунчаси қўлланар, Президент Мирзиёевнинг фармони билан у меҳнатга ҳақ тўлашнинг энг кам миқдори(МҲТЭКМ) тушунчаси билан алмаштирилди.
"Ўзбекистон Республикасининг "2020 йил учун Ўзбекистон Республикасининг давлат бюджети тўғрисида"ги қонуни ижросини таъминлаш чора-тадбирлари тўғрисида"ги қарорда янги йилдан туман ёки вилоят бюджетлари халқ депутатлари Маҳаллий Кенгашлар ихтиёрига берилиши, энди маҳаллий бюджетда қолдириладиган даромадлар тури кўпайтирилгани айтилган.
Ўзбекистон 2020 йилдан тўлақонли янги Солиқ Кодекси асосида яшашга ўтади.
Мамлакат учун янги солиқ кодекси жуда муҳимлиги, аммо 2019 йил бошида солиқ ислоҳотини ҳаётга татбиқ этишда қатор хатоларга йўл қўйилгани айтилди.
Хусусан, мустақил иқтисодий таҳлилчи Юлий Юсупов Би-би-сига солиқ ислоҳотидаги хатолар бизнесларга, солиқ ислоҳотининг имиджига ҳам салбий таъсир қилганини айтди.
"Ҳукумат йилнинг(2019 йилнинг) иккинчи ярмида йўл қўйилган хатоларни тузатишга киришди. Бу, агар биз яна ушбу йўналишда ишлашни давом эттирсак, озроқ вақт ўтиб янада самарали солиқ тизимига эришамиз, деган умидни уйғотади", деб айтди Юлий Юсупов.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
