Ўзбекистон: Тошкент аэропортида Мирзиёевдан ёрдам сўраган хитойлик тадбиркор Таиландга учиб кетди
Сурат манбаси, Gazeta.uz
Хитойлик тадбиркор Ғалимбек Шағиман Тошкент халқаро аэропортида ўзини Хитойга бериб юбормасликни сўраб Шавкат Мирзиёевга мурожаат қилган эди. Ташқи ишлар вазирлиги у 9 феврал куни Таиланднинг Бангкок шаҳрига учиб кетганини билдирди.
Ташқи ишлар вазирлигининг хабар беришича, паспортида Xiaheman Halemubieke дея ёзилган Ғалимбек Шағиман бўйича кўплаб мурожаатларни инобатга олиб унинг тақдири борасида баёнот билдирди.
"У мамлакатимизга Қозоғистондан келган ва "Тошкент" халқаро аеропортининг транзит зонасида бўлиб турган. У Ўзбекистон ҳудудига кирмади ва 2019-йил 9-феврал куни Бангкок шаҳрига учиб кетди. Аввалроқ, у Таиланддан транзит билан Тошкент орқали Олма-ота шаҳрига борган эди", дейилади хабарда.
Хитойлик этник қозоқ бўлмиш Ғалимбек Шағиманнинг Тошкент Халқаро аэропортидан Президент Шавкат Мирзиёевга қилган мурожаати 8 феврал куни ижтимоий тармоқларга тарқалди.
У Мирзиёевга туркий тилда сўзлашувчи бир мусулмон сифатида мурожаат қилаётганин айтган.
"Мусулмонмиз, менга ёрдам беринг, асло Хитойнинг қўлига берманг. Мен сизнинг инсоний хосиятга эга эканлигингизга ва Марказий Осиёдаги беш давлат ичида тез вақтнинг ичида ўзгарган декмократик йўлингизга, иқтисодиётни ривожлантираётганингизга, ўзгаришлар қилаётганингизга ишонаман. Мени асло Хитойнинг - душманнинг қўлига бера кўрманг", деган у.
Кейинги тарқалган яна бир видеода Тошкентдаги Хитой элчихонаси ходимлари уни аэропорт ҳудудидан ташқарига чиқаришга ҳаракат қилганини айтган.
Ғалимбек Шағиманни Хитой ҳукумати экстрадиция қилишни сўрагани тўғрисида Ўзбекистон томони ҳеч нарса демаган.
Хитойнинг Шинжон бўлгасидан бўлган Ғалимбек Шағиманнинг 41 ёшда эканлиги айтилади.
Human Rights Watch нинг Марказий Осиёдаги эксперти Стив Сверлов Ўзбекистон одамларни қийноқлар ёки ўлим жазоси кутиб турган ерга қайтариб юбормаслик тўғрисидаги халқаро меъёрлар олдидаги масъулиятини эслатган.
Хитой ғарбий ҳудуди бўлмиш Шинжонда маҳаллий мусулмонлари учун йирик ҳибс жамлоқлари тармоғини қурмоқда.
Бу ҳақда Би-би-си янги далилларга эга бўлганди.
Экспертларга кўра, биз топган муассасалардан бири дунёдаги энг катта ҳибс марказларидан бири бўлиши мумкин.
Шинжондаги уйғурлар орасидаги миллионлаб мусулмонлар маҳкамасиз ушлаб турилгани айтилади.
Хитой ушбу даъволарни рад қилмоқда.
Уларга кўра, бу терроризм хавфи билан курашиш мақсадида ташкил қилинган "касбий тайёргарлик марказларидир".
Бироқ Би-би-си барчага очиқ бўлган сунъий йўлдошдан олинган суратларни таҳлил қилди.
Қамоқхонага ўхшаш махфий иншоотларнинг ўтган икки йил ичида икка марта кўпайганига амин бўлди.
Бу жойларда сақланаётганлар таҳқирланади ва қўпол муносабатда бўлинади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
