Наврўз Ўзбекистонда сайл сифатида нишонланмоқда

20 март куни Ўзбекистонда Наврўз байрамини нишонлаш бошланган.

Ўзбекистонда бу йилги Наврўз олдинги йиллардагидан фарқли байрам қилинмоқда.

Тошкентда Наврўз нишонланаши акс этган фото ва видеоларни BBC Uzbekнинг Youtubeдаги каналида томоша қилинг

Олдинги йилларда Мустақиллик ва Наврўз байрамларининг Тошкентдаги асосий тантаналари учун ойлаб тайёргарлик кўрилар, минглаб инсонлар жалб этилар, бу тантаналар учун ҳар йили бюджетдан катта маблағ ажратилар ва раҳбарлар хавфсизлигини таъминлаш учун деб тушунтирилиб минглаб милиция ва бошқа хавфсизлик хизматлари ходимлари ойлаб "жанговор тайёргарлик" ҳолатида сақланар эдилар.

Бу йил давлат раҳбарлари иштирокидаги тадбирлар Тошкентдаги Абдулла Қодирий боғида ташкил этилган.

Қодирий боғига киришда ҳам қаттиқ хавфсизлик чоралари кўрилган.

Боғ ичига кирганлар қўлларидаги мобил телефонлари олиб қўйилганини айтишди.

Президент Шавкат Мирзиёев Ўзбекистон халқини Наврўз байрами билан табриклаган.

Ўз табригида Президент Мирзиёев бу йилги байрамнинг фарқли ўтаётганини урғулаган: "Бу йилги Наврўз байрами, барча шаҳар ва қишлоқларимизда, умумхалқ сайиллари тарзида ўтаётгани, унга ўзгача файз ва шукуҳ бағишламоқда".

Байрам муносабати билан Ўзбекистонда 18 мартдаги шанба дам олиш куни душанба - 20 мартга кўчирилган.

Тошкент шаҳридаги қатор кўча ва хиёбонларда транспорт ҳаракати 19 мартдан бошлаб тўхтатилган.

.