Алишер Усмонов ортиқ Россиянинг энг бой одами эмас

Асли ўзбекистонлик миллиардер Алишер Усмонов "Форбс" нашрининг Россиянинг энг бой одамлари рўйхатида биринчиликни қўлдан бой берган.

USM Holdings асосчиси ва Лондоннинг "Арсенал" футбол клуби ҳиссадори "Форбс" га кўра, ўтган бир йил ичида ўз сармоясининг 25 фоизи ёки 4.2 миллиардини йўқотган ва 14.4 миллиард доллар билан биринчи ўриндан учинчи ўринга тушиб қолган.

"Форбс" рейтингида биринчиликни 15.4 миллиард доллар сармоя билан "Интеррос" ширкати раҳбари Владимир Потанин эгаллаган.

Аммо Алишер Усмонов "камбағаллашган" ягона миллиардер эмас.

Россия бойлари ўтган бир йилда умумий сармояларининг 73 миллардини йўқотишган.

Бу йил уларнинг биргаликдаги сармоялари 481 миллиард долларни ташкил этган.

Шунингдек, миллиардерлар сони ҳам 111 кишидан 88 кишига камайган.

Алишер Усмонов сўнгги йилларда Россиянинг энг бой одамлари рўйхатида биринчиликни эгаллаб келаётган эди.

2013 йилда у Британияда чоп этиладиган Sunday Times рўзномасининг энг бой одамлари рўйхатида пўлат магнати Лакшми Митталдан ўзиб, биринчи ўринни эгаллаган.

2012 йилда у барча ҳиссаларини ягона холдинг остида бирлаштиргач,ўзи ортиқ бизнесларини бошқариш ниятида эмаслигини айтганди.

Ўтган йили Усмонов Хитойнинг онлайн чакана савдо ширкати Alibaba га сармоя киритган ва унинг вакили миллиардер бундан буён асосий эътиборини Хитойнинг технологиялар бозорига қаратишини айтган.

Усмоновнинг ўзи Alibaba даги сармоясининг даромадлилигини 500 фоиз деб баҳолаган, аммо ундаги ҳиссалари миқдорини ҳеч қачон очиқламаган.

Усмонов Alibaba билан бир қаторда Хитойнинг смартфонлар ишлаб чиқарувчи Xiaomi ширкатига ҳам сармоя киритган.

У ўтган йил кузида Американинг Apple ва Facebook ширкатларидаги ҳиссаларини сотганини маълум қилган эди.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.Instagram - BBC UZBEK Twitter - BBC UZBEK Odnoklassniki - BBC UZBEK Facebook- BBC UZBEK Google+ BBC UZBEK Skype - bbcuzbekradio