Мустақиллик байрамига Тожикистон билан чегара ёпилмайди
Ўзбекистон мустақилликнинг 27 йиллигига бағишланган тадбирлар доирасида бу йил биринчи марта Тожикистон билан чегара-назорат нуқталарида ҳаракатни чекламайди.
Бу ҳақда "Азия-Плюс" агентлиги тожик ҳукуматидаги манбаларга таяниб хабар тарқатди.
Ўтган йилларда Ўзбекистон мустақиллик байрами арафасида қўшни давлатлар билан чегарадан фуқароларнинг бориш-келишини чеклаган ва чегарага қўшимча кучларни жойлаштирган.
Тожик томони бу ҳақда бир ой аввал огоҳлантирилгани айтилади.
Шу йилнинг 17-18 август кунлари Президент Раҳмоннинг Ўзбекистонга ташрифи чоғида икки давлат чегарасини делимитация қилиш жараёни расман ниҳоясига етгани эълон қилинди.
Шу йил мартида томонлар 2019 йил охиригача икки давлат чегарасини ўзбек томони ўрнатган миналардан тозалашга келишиб олгани хабар қилинганди.
200га яқин тожик фуқаролари миналарда портлаб, ҳалок бўлган.
Минадан жабрланганлар орасида ўзбек фуқаролари ҳам бор.
1999 йилда Қирғизистоннинг Боткен вилояти орқали Фарғона вилоятига ўзларини Исломий кучлар деб атаган қуроллилар сизиб киришга уринган пайтида Ўзбекистон қўшни Қирғизистон ва Тожикистон билан чегараларини миналаштирганди.
Лекин, кузатувчиларга кўра, шу пайтгача бирон-бир қуролли жангари ёки гиёҳванд модда ташувчи минага дуч келгани маълум эмас.
Ўзбекистон Тожикистон билан чегарадаги хавфсизлик чораларини Афғонистондан жангариларнинг сизиб кириш таҳдиди билан асослаб келган.
Бу каби эҳтимолий таҳдид мавжуд бўлган бўлса ҳам, кузатувчилар Тошкентнинг чегарада қатъий назорат ўрнатиш ҳаракатларини Душанбега босим ўтказиш ҳаракати билан тушунтиришган.
Ўзбекистон ўтмишда сув заҳиралари юзасидан тортишувлар боис Тожикистон билан чегарани делимитация қилиш жараёнини музлатиб қўйган эди.
Марҳум президент Каримов гидроиншоот лойиҳалари сабаб Тожикистонга уруш билан таҳдид қилган.
Аммо минтақавий таҳлилчиларга кўра, Каримовнинг таҳдидлари иш бермаган ва қайтага Ўзбекистоннинг халқаро майдондаги имиджига салбий таъсир қилган.
Президентлар Мирзиёев ва Раҳмон шу ой имзолаган икки давлат ўртасида стратегик шерикликка доир битим ўзбек-тожик муносабатларида янги даврни бошлаб бергани айтилган.
BBCUZBEK.COM билан Telegram орқали +44 7858860002 номери билан боғланинг.Telegram каналимиз: @bbcuzbek
