Киев: Қиш олдидан Россия ҳужумларини орттирмоқда

Украина пойтахти Киевга ўтган тун Россия тарафидан қилинган ҳаво ҳужумида 3 инсон ўлган ва камида 32 киши тан жароҳати олган.

Бу ҳақда шаҳар мэри маълум қилган.

Виталий Кличконинг айтишича, икки баланд қаватли турар-жой бинолари нишонга олинган.

Унинг Телеграм тармоғида ёзишича, жароҳатланганлар орасида олти нафар бола ҳам бор.

Москва мэри Сергей Собяниннинг маълум қилишича эса, якшанба куни Россия ҳаво мудофааси пойтахт томон йўналтирилган икки дронни йўқ қилган.

Россиянинг сўнгги бомбардимони Москва қиш мавсуми олди фуқаролик объектлари ва энергия инфратузилмасига ҳужумларни кучайтирган бир пайтга тўғри келди. Айни пайтда Украина расмийлари ўтган ҳафтанинг ўзида 1 200 га яқин дрон учирилганини айтишган.

Киев расмийларига кўра, шаҳар шимолий-шарқидаги Деснянский туманида жойлашган тўққиз қаватли уйга дрон келиб уриларкан, уч киши ҳалок бўлган ва 24 киши яраланган.

Киевдаги камида яна учта турар-жой биносига зарар етгани хабар қилинди. Расмийлар айтишича, жами етти киши, шу жумладан икки бола шифохонада даволанмоқда.

Россия 2022 йил босқин бошлаган, ҳозирда Украина ҳудудининг тахминан бешдан бир қисмини, жумладан Қрим яриморолини назорат қилмоқда. Қрим 2014 йилда аннексия қилинганди.

Жабҳада жанглар давом этар экан, жуда катта олдинлаш кузатилмаган.

Украина эса, Россиянинг ҳарбий қувватини заифлаштириш учун унинг ҳарбий ускуналар ишлаб чиқариш заводлари ва иқтисодиёти учун муҳим бўлган нефт иншоотларига зарба беришни истайди.

Дипломатия ишлаяптими?

Украина президенти Владимир Зеленский яқинда иттифоқдошларига мурожаат қилиб, қуролли кучларига узоқ масофали қуроллар етказишни давом эттиришга чақирган.

Бироқ у яқинда Оқ уйга сафаридан ҳамда Европа Иттифоқи саммитидан қуруқ қўл билан қайтган.

АҚШ президенти Дональд Трамп эса, Россиянинг энг йирик нефт компанияларига қарши янги санкциялар жорий этди.

Бу унинг президентликка қайтганидан бери илк марта шундай қарор олган. Европа Иттифоқи худди шундай амалга қўл урган.

Трампнинг айтишича, Россия президенти Владимир Путин билан музокаралар натижасиз тугаган. Айни пайтда Украина уруши бўйича Будапештда ўтиши режаланган учрашувни бекор қилган.

Ҳафтанинг дам олиш кунлари Осиёга йўл олар экан, Трамп "Путин билан алоқаси яхши" эканини, аммо "сўнгги воқеалар нохуш" бўлганини айтди ва уларнинг учрашуви тинчлик келишуви эҳтимолига боғлиқлигини билдирди.

Трамп Россиянинг урушни тўхтатиш учун қўяётган шартларидан хафсаласи пир бўлган.

Август ойида Аляскада ўтказилган саммит ҳам аниқ натижа билан якун топмаган эди.

АҚШ президенти аввалроқ Москвага нисбатан янги санкциялар Европалик иттифоқчиларининг Россиядан энергия импортини қисқартиришганига боғлиқ эканини айтган. ЕИ буни 2028 йилгача амалга оширишга ваъда берган.

Зеленский тинчлик музокараларига йўл очиш учун ҳозирги жабҳа чизиқлари бўйлаб жангларни тўхтатиш борасидаги АҚШнинг таклифини қабул қилган.

Аммо Украина қўшинларини Донбасс минтақасидан тўлиқ чиқиб кетиш борасидаги Россия талабига рози бўлмаган.

Россиянинг юқори даражали вакили Кирилл Дмитриев жума ва шанба кунлари Вашингтонда АҚШ расмийлари билан учрашди. У CNN телеканалига гапираркан, Россия, Украина ва АҚШ урушни тугатиш бўйича дипломатик ечимга яқин эканига ишонишини айтди.

"Президент Зеленскийнинг бу жабҳа чизиқларига боғлиқ эканини тан олиши катта қадам", деб айтган Дмитриев.

"Биласиз, унинг аввалги мавқеи Россия бутунлай чиқиб кетиши кераклиги эди. Шунинг учун, биз дипломатик ечимга анча яқинмиз деб ўйлайман".

Шу орада, Россия якшанба куни ядровий қувватда ишлайдиган ракета синовини ўтказганини маълум қилди.

Россияга кўра, бу ракета чексиз масофага учиш имкониятига эга ва ҳар қандай ракеталардан ҳимоя тизимини айланиб ўтиш имкониятига эга.

Иттифоқчилар Россия нефти ва газини глобал бозордан чиқаришмоқчи

Украинани қўллаб-қувватлаётган 20 дан ортиқ давлат Россия нефти ва газини жаҳон бозоридан чиқаришга келишишган.

Бундан мақсад Россия Президенти Владимир Путинга босим ўтказиб, урушни тугатиш мажбур этишдир.

Яқин кунларда Буюк Британия ва АҚШ Россиянинг икки йирик нефт ширкатига санкциялар жорий этишди.

Лондонга ҳам сафар қилган Украина Президенти Володимир Зеленский Россияга "босим" ҳарбий амалиётларни тўхтатишнинг ягона усули деб айтган.

Лондон саммитидан кейинги матбуот анжуманида Британия Бош вазири Кийр Стармер "Путин тинчлик борасида жиддий эмас", деб айтди.

Унга кўра, шу боис, иттифоқчилар Украина қўллаб қувватлаш учун "йилнинг қолган қисмидаги аниқ режалар" бўйича келишишган.