Ўзбекистон: Тошкент ИИББси Тесла видеосини текширмоқда

Тошкент шаҳар Ички ишлар бош бошқармаси Инстаграмда чоп этилгани айтилган ва тунда юқори тезликда бошқарилган "Тесла" русумли автомашина акс этган видеони текшираётганини маълум қилди.

"Озодлик" радиоси видеони Ўзбекистон Президентининг кенжа куёви Отабек Умаровнинг Инстаграм саҳифасидан юклаб олганини айтган.

"Озодлик" хабарига кўра, видеони Отабек Умаров 7 июлдан 8 июлга ўтар кечаси жонли равишда намойиш қилган, аммо ҳозирда унинг Инстаграм саҳифасида бу видео йўқ.

Президентнинг иккинчи қизи Шаҳноза Мирзиёеванинг турмуш ўртоғи Отабек Умаров Инстаграмда фаол бўлиб, мунтазам равишда ўзи ва оиласи, хусусан Президент Мирзиёев акс этган видео ва суратларни юклаб боради.

Президентнинг хавфсизлигига масъул шахс, Хавфсизлик хизмати раҳбари Умаров Инстаграмда 150 минг фолловерига эга.

"Озодлик" тақдим этган видеони мустақил манбалардан тасдиқлашнинг имкони йўқ.

Хабарга кўра, тунги соат 2:00 атрофида юкланган видеода Отабек Умаров Тесла машинасида Тошкент кўчаларида юқори тезликда юраётганини "кўз-кўз қилган".

"Ўрганилмоқда"

Би-би-си мазкур видео бўйича жиноий иш очилган ё очилмаганини билиш учун Тошкент шаҳри Ички ишлар бош бошқармаси матбуот хизмати билан боғланди.

Матбуот хизмати ходимаси бу видеони кўргани, уни Тошкент шаҳар Йўл патрул хизмати бошқармасига юборгани, аммо ҳозирча ҳеч қандай маълумот бера олмаслигини айтди.

Айни дамда ходим бу видео қаерда ва қачон олингани ўрганилаётганини билдирди.

Озодлик тақдим этган видеода ҳайдовчи бир вақтнинг ўзида машинани соатига 201 километргача тезликда бошқараётгани ва видеога олаётгани акс этади.

Видеони олаётган шахс машина ҳаракати давомида йўл четидаги ҳовлиларни видеога олади ва дисплейда соатига 148 километрда кетаётганини ҳам кўрсатади.

Ўзбекистон Йўл ҳаракати қоидаларини тасдиқлаш бўйича Вазирлар Маҳкамасининг 370-қарорига биноан, аҳоли пунктларида транспорт воситаларининг тезлигини соатига 70 километрдан, турар жой даҳалари ва ёндош ҳудудларда (уй-жой бинолари орасидаги ер участкасида) эса соатига 30 киломертга оширмасдан ҳаракатланишига рухсат этилади.

Рамзан Қодиров Мирзиёевнинг куёви билан селфига тушгани муҳокама қилинмоқда

Ўзбекистон: Мирзиёевнинг қизи вазирликда масъул лавозимга тайинланган

Президент ўз қариндошини ишга олса, қандай қарайсиз?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek