Ўлдирилгани хабар қилинган журналист Аркадий Бабченко - тирик
Сурат манбаси, Dojd
Киевда кеча отиб ўлдирилгани хабар қилинган журналист Аркадий Бабченко тирик. Украина Хавфсизлик хизмати ходимлари қотилликни амалга оширгани гумон қилинган шахс ҳибсга олинган.
Украина Хавфсизлик хизмати (УХХ) раҳбари Василий Грицакнинг айтишича, Аркадий Бабченконинг ўлимини Россия хавфсизлик кучлари буюрган.
Бабченко УХХ брифингида журналистлар олдида пайдо бўлган.
Унинг айтишича, мазкур иш икки ой давом этган. Унга бир ой аввал "сенга буюртма бор" деб хабар қилинган.
Унга фақат ўз паспортида бўлган сурат бириктирилган ҳужжатни кўрсатишган.
"Бу суратни фақат махсус кучлар ола олиши, ва фақат паспорт столидан олишлари мумкин", - деди журналист.
У ҳам ўз жонига уюштирилгани айтилган суиқасд амалида Россия хавфсизлик кучларини айблади.
Бабченко ўз жонига суиқасд бўлишини гумон қилган Украина хавфсизлик хизматларининг махсус амалиётида иштирок этишга рози бўлган.
Суиқасд
Кремлнинг ашаддий танқидчиси бўлган Бабченко сешанба куни ўз хонадони бўсағасида отиб кетилгани хабар қилинганди.
Россия бу ҳодисанинг тергов қилинишига чақирган, аммо "қонли жиноятлар Киевдаги режим учун" оддий ҳолга айланганини ҳам даъво қилган.
Россия Қримни 2014 йилда қўшиб олиши ва Украина шарқидаги вилоятларни Россияпараст қўшинлар босиб олиши ортидан расмий Москва ва Киев ўртасидаги муносабатлар кескин совуқлашган.
41 ёшли Бабченкони ўз аёли қонга беланган ҳолда топгани ва тез ёрдам чақиргани айтилганди.
Унинг дўстлари тарқатган суратда Бабченко қон устида чалқанча ётгани ва курагида ўқ излари борлиги кўринади.
Украиналик депутат Антон Херашченконинг айтишича, журналист нон сотиб олиш учун кўчага чиқиб қайтганида қотил уни кутиб турган бўлган.
Киев полицияси раҳбари Андрий Кришченко Бабченко "профессионал фаолияти" учун ўлдирилган, деб чиққанди. .
Чеченистон урушида қатнашган собиқ аскар Бабченко Россиянинг Украина ва Суриядаги ҳарбий амалларини кескин танқид қилиб келган.
У ўз ҳаётига таҳдидлар ошганини айтиб 2017 йилда Россияни тарк этганди.
