چین میں ٹوتھ پیسٹ اور ملیریا کے خلاف استعمال ہونے والی جعلی دواؤں کا بھی علم بھی ہوا ہے

البومِن جسے پلازمہ پروٹین بھی کہتے ہیں خون میں شامل کر کے ایسے مریضوں کو دی جاتی ہے جن کے دل کا آپریشن ہوا ہو یا جو صدمے میں ہوں یا آگ سے جھلس گئے ہوں۔

گزشتہ ماہ چین میں خوراک اور ادویات کے قواعد کے نگران سب سے بڑے افسر کو حفاظتی ضوابط کی تصدیق کیے بغیر رشوت لے کر ادویات کی منظوری دینے کے جرم میں موت کی سزا سنائی گئی تھی۔

چین میں ٹوتھ پیسٹ، ملیریا کے خلاف استعمال ہونے والی دواؤں اور جانوروں کی خوراک تک میں جعلی اجزاء شامل ہونے کا علم بھی ہوا ہے۔

ماہرین کہتے ہیں کہ وہ مریض جن کی صحت پہلے ہی سے خطرناک حد کو چھو رہی ہو، ان کے لیے جعلی پروٹین زدہ خون انہتائی مہلک ثابت ہو سکتا ہے۔

چین میں ادویات اور خوارک کے معیار میں بے قاعدگیوں کے سلسلے میں یہ تازہ ترین سکینڈل سامنے آیا ہے۔

چین کے شمال مشرق علاقے جیلین میں خوراک اور ادویات سے وابستہ انتظامیہ نے پتہ چلایا ہے کہ اٹھارہ ہسپتالوں اور تیس دوا خانوں میں جعلی البومین فروخت کی گئی یا کی جا رہی ہے۔

اس انتظامیہ کے نائب ڈائریکٹر کا کہنا ہے کہ کیونکہ مریضوں کو لگائے جانے والے خون میں اصل پروٹین کا کوئی عنصر شامل نہیں تھا لہذا خون نے اپنا اثر نہیں دکھایا۔یہ خون پورے کا پورا جعلی تھا۔

اہلکاروں نے یہ نہیں بتایا کہ آیا جعلی خون سے کسی کی موت واقع ہوئی یا کوئی مزید بیمار ہوا یا نہیں اگرچہ چین کی ایک اخبار کے مطابق جعلی خون سے ایک شخص کی موت واقع ہوئی ہے۔

چین کے مرکزی ٹی وی نے ایک اہکار کے حوالے سے بتایا ہے کہ جو جعلی پروٹین بناتے ہیں انہیں تین سو گنا منافع ہوتا ہے۔ تاہم اب انتظامیہ کا کہنا ہے کہ تحقیقات کے بعد مارکیٹ سے ’گند‘ صاف کر دیا گیا ہے۔

کئی سیکنڈل سامنے آنے کے بعد پورے چین میں جعلی اشیاء کے خلاف مہم شروع کی گئی ہے۔ ایک واقعے میں جعلی دودھ پینے سے تیرہ بچوں کی موت ہوگئی۔

پانامہ میں جعلی ٹوتھ پیسٹ استعمال کرنے کے باعث درجنوں افراد ہلاک ہوئے تھے۔

چین سے خوراک اور ادویہ کی برآمدات پر امریکہ اور یورپی اتحاد نے تشویش کا اظہار بھی کیا ہے اور چین سے کہا گیا ہے کہ وہ صورتِ حال کا ازالہ کرے۔