عباد الحق بی بی سی اردو ڈاٹ کام، لاہور

	صدر مشرف کے خلاف مواخذنے میں ان کا بھرپور دفاع کریں گے: مسلم لیگ ق قیادت

یہ بات انہوں نے اتوار کی رات مسلم لیگ قاف کی مرکزی مجلس عاملہ کے اجلاس کے بعد ہونے پریس کانفرنس میں کہی۔سابق حکمران جماعت کے اجلاس میں ایم کیو ایم قائد الطاف حسین نے بھی بیس منٹ کا ٹیلی فونک خطاب کیا۔

اجلاس کے بعد پارٹی کے سربراہ چودھری شجاعت حسین اور سیکرٹری جنرل مشاہد حسین نے ایک مشترکہ پریس کانفرنس میں کہا کہ ان کی جماعت صدر پرویز مشرف کے خلاف مواخذنے میں ان کا بھرپور ساتھ دیتے ہوئے الزامات کا دفاع کرےگی۔

پریس کانفرنس کے دوران قومی اسمبلی میں قائد حزب اختلاف چودھری پرویز الہیْ بھی موجود تھے۔

چودھری شجاعت حسین نے کہا کہ صدر پرویز مشرف نے اپنے خلاف موخذاے کا سامنا کرنے کا فیصلہ کیا ہے جبکہ مسلم لیگ قاف صدر مشرف کے خلاف الزامات کا ڈٹ کر مقابلہ کرے گی۔

صدر غیرآئینی تو سب غیر آئینی  جس صدر کو حکمران اتحاد غیر آئینی قرار دے رہا ہے اسی صدر سے موجود وزیر اعظم اور ان کی کابینہ نے حلف اٹھایا ہے اس کا مطلب ہے کہ حکومت کی بھی غیر آئینی اور غیرقانونی ہے مشاہد حسین

مشاہد حسین نے کہا کہ پہلے آئی ایس آئی پر قبصہ کرنے کی کوشش کی گئی اور اب ایوان صدر پر قبصے کی کوشش کی جارہی ہے اور کل کو کہیں یہ ہو کہ فوج پر بھی قبضہ کریں اور ایک جیالا جنرل لائیں۔

مشاہد حسین نے بتایا کہ الطاف حسین نے اپنے خطاب میں یہ نکتہ اٹھایا کہ جس صدر کو حکمران اتحاد غیر آئینی قرار دے رہا ہے اسی صدر سے موجود وزیر اعظم اور ان کی کابینہ نے حلف اٹھایا ہے اس کا مطلب ہے کہ حکومت کی بھی غیر آئینی اور غیرقانونی ہے۔

مسلم لیگ قاف کے سیکرٹری جنرل کا کہنا ہے کہ مسلم لیگ نے حلف اٹھایا تھا کہ وہ صدر مشرف سے حلف نہیں لیں لیکن انہوں نے حلف لیا۔ان کے بقول مسلم لیگ نے جج تو بحال نہیں کرائے تاہم ان کے وزرا بحال ہوگئے ہیں۔

انہوں نے کہا کہ ہارس ٹریڈنگ ہوگئی ہے اور سرکاری ڈنڈے استعمال کرنے کی کوشش کی جارہی جس برداشت نہیں کیا جائے گا۔ ان کا کہنا ہے کہ پارلیمان کو جمعہ بازار مت بنائیں ۔

چودھری پرویز الہیْ نے کہا کہ حکمران جماعت پہلا اپنا امیدوار سامنے لائے اور پھر اس بارے میں بات کریں گے۔ان کے بقول موخذاے کی تین ماہ کی کارروائی میں بہت کچھ ہوگا کیونکہ یہ کوئی کھیر نہیں ہے جو کوئی آسانی سے کھالےگا۔
ان کا کہنا ہے کہ ثابت کرنا ان کی ذمہ داری ہے جو الزام عائد کررہے ہیں۔ انہوں نے کہا کے ذرائع ابلاغ کو موخذاے کی کارروائی کی کوریج کی اجازت دی جائے۔
ایک سوال پر چودھری شجاعت حسین نے کہا کہ صدر پرویز مشرف کے خلاف اسمبلیوں میں پیش کی جانے والے قرار دادوں کی کوئی حیثیت نہیں ہے ۔ان کا کہنا ہے کہ مسلم لیگ قاف بھی وہ سینیٹ اور ضلعی حکومتوں کے ذریعے صدر پرویز مشرف کے حق میں قراردادریں منظور کراسکتی ہے۔
جب مشاہد حسین سے پوچھا گیا کہ صوبوں کے گورنر صدر اور حکومت میں سے کس کا ساتھ دیں گے تو ان کا کہنا تھا کہ گورنر وفاق کا نمائندہ ہوتا ہے جبکہ صدر مملکت وفاق کی علامت اس لیے گورنر اپنی تقرری کرنے والے کا ساتھ دیں گے۔
انہوں نے کہا کہ اگر حکومت میں اخلاقی جرات ہے تو وہ صدر کے خلاف جو موخذاے کی چارج شیٹ ہے اس میں این آر او کو بھی شامل کرے۔ان کے بقول این آر او کا تحفہ کیوں قبول کیا گیا اور واپس کیوں نہیں کیا جاتا۔