احمد رضا بی بی سی اردو ڈاٹ کام، کراچی

پیپلز پارٹی کے اُس اقدام کی وجوہات کچھ بھی ہوں پیپلز پارٹی کے اس فیصلے نے قائم علی شاہ کی سیاسی ساکھ کو متاثر ضرور کیا تھا۔

سینئر صحافی جی این مغل کا کہنا ہے کہ پیپلز پارٹی نے انیس سو اٹھاسی میں قائم علی شاہ سے وزارت اعلٰی واپس لینے کا فیصلہ ان کی کمزور انتظامی گرفت کی بناء پر کیا تھا۔

’اس وقت یہاں (سندھ میں) دہشتگردی عروج پر تھی اور ایم کیو ایم جو گورنمنٹ میں ان کی پارٹنر تھی اس کے ساتھ بھی اختلافات پیدا ہوگئے تھے اور لاء اینڈ آرڈر (بدامنی) کا مسئلہ تھا اس وجہ سے انہیں ہٹایا گیا تھا۔‘

جی این مغل نے بتایا کہ قائم علی شاہ کے بارے میں اس وقت یہ تاثر تھا کہ وہ ایک اچھے منتظم ثابت نہیں ہوئے تھے اور یہ کہ وہ بروقت، فوری اور جراتمدانہ فیصلے بھی نہیں لے رہے تھے جن کا حالات تقاضا کرتے تھے۔

انیس سو اٹھاسی میں یہاں (سندھ میں) دہشتگردی عروج پر تھی اور ایم کیو ایم جو گورنمنٹ میں ان کی پارٹنر تھی اسکے ساتھ بھی اختلافات پیدا ہوگئے تھے اور لاء اینڈ آرڈر (بدامنی) کا مسئلہ تھا اس وجہ سے انہیں ہٹایا گیا تھا۔ جی این مغل

لیکن پاکستان پیپلز پارٹی کے رہنما تاج حیدر اس بات کو نہیں مانتے کہ قائم علی شاہ صوبے کے ناکام وزیر اعلٰی رہے ہیں۔

ان کا کہنا ہے ’اس وقت جو حکومت میں تھے وہ سارے غیرتربیت یافتہ تھے۔ مطلب یہ کہ ان کی حکومت چلانے کی اتنی تربیت نہیں تھی۔ لیکن اٹھاسی سے اب تک تو بیس سال نکل گئے ہیں بھائی، پھر پارٹی نے جب انہیں نامزد کیا ہے تو وہ اکیلے تو نہیں ہوں گے ان کے پیچھے پوری پارٹی ہوگی۔‘

انیس سو اٹھاسی میں ذوالفقار علی بھٹو کی پھانسی کے بعد بینظیر بھٹو کی جانب سے دوبارہ منظم کی گئی پیپلز پارٹی کا پہلا اقتدار تھا جبکہ اب بینظیر بھٹو کے قتل کے بعد آصف علی زرداری کی قیادت میں منظم ہونے والی پیپلز پارٹی اقتدار کی منتظر ہے اور صوبے کے حالات بیس سال پہلے کے مقابلے میں کچھ زیادہ مختلف بھی نہیں ہیں۔

جی این مغل کا کہنا ہے کہ قائم علی شاہ کے لیے یہ وزارت اعلٰی بھی آسان نہیں ہے اور اگر اس مرتبہ بھی انہوں نے پرانی روش کا مظاہرہ کیا تو پارٹی اور حکومت کے لیے خاصی مشکلات پیدا ہوسکتی ہیں۔

’سندھ میں آج ماضی کے مقابلے میں بے پناہ ڈپریشن ہے اور پیپلز پارٹی کو سنگین قسم کے حالات اور چیلنجز کا سامنا ہے اور پھر لوگوں کی توقعات بھی بہت زیادہ ہیں۔ دیکھنا یہ ہے کہ ان توقعات پر وہ کیسے پورا اترتے ہیں اور پھر وہ ایم کیو ایم کے ساتھ ورکنگ ریلیشن شپ بنا پاتے ہیں یا نہیں اور دونوں صورتوں میں کس طرح حالات کو سنبھالتے ہیں؟‘

اس وقت جو حکومت میں تھے وہ سارے غیرتربیت یافتہ تھے۔ مطلب یہ کہ ان کی حکومت چلانے کی اتنی تربیت نہیں تھی۔ لیکن اٹھاسی سے اب تک تو بیس سال نکل گئے ہیں بھائی، پھر پارٹی نے جب انہیں نامزد کیا ہے تو وہ اکیلے تو نہیں ہوں گے ان کے پیچھے پوری پارٹی ہوگی تاج حیدر

دوسری طرف قائم علی شاہ کی نامزدگی پر ایم کیو ایم نے امید ظاہر کی ہے کہ قائم علی شاہ تمام سیاسی قوتوں کو ساتھ لے کر چلیں گے۔

ایم کیو ایم کے رہنما فیصل سبزواری کہتے ہیں کہ ’قائم علی شاہ اس وفد کا حصہ تھے جو گزشتہ دنوں نائن زیرو آیا تھا۔ میں بھی اس ملاقات میں شریک تھا۔ ان سے بہت اچھی بات چیت رہی اور وہ منجھے ہوئے سیاستدان ہیں اور ہمیں امید ہے کہ وہ اعتدال پسندی کے ساتھ اور شہری اور دیہی خلیج کو کم کرنے کے لئے اور سندھ کے اہم مسائل کو حل کرنے کے لئے کام کریں گے۔‘

یاد رہے کہ سنہ اٹھاسی میں پیپلز پارٹی نے ایم کیو ایم کے ساتھ ملکر حکومت بنائی تھی لیکن یہ اتحاد ایک سال بھی نہیں چل پایا تھا۔ اس مرتبہ پیپلز پارٹی نے ایم کیو ایم کو حکومت میں شامل ہونے کی دعوت دینے کا حق اب تک محفوظ رکھا ہوا ہے۔