ریاض سہیل
بی بی سی اردو ڈاٹ کام، کراچی |  |
| | | تہمینہ دولتانہ وہاڑی سے ممبر قومی اسمبلی منتخب ہوئی ہیں |
سنہ 2008 کے انتخابات میں پاکستان میں قومی اسمبلی کی پندرہ عام نشستوں پر خواتین امیدواروں نے کامیابی حاصل کی ہے جبکہ گزشتہ انتخابات میں یہ تعداد بارہ تھی۔ اس کے علاوہ تین صوبائی اسمبلیوں کی نو عام نشستوں پر بھی خواتین امیدواروں نے کامیابی حاصل کی ہے اور چاروں صوبائی اسمبلیوں میں صرف صوبہ سرحد کی کسی عام نشست پر کوئی بھی خاتون امیدوار کامیاب نہیں ہوسکی ہے ۔ پورے ملک میں قومی اسمبلی کی ساٹھ عام نشستوں کے لیے سڑسٹھ خواتین امیدوار تھیں اور کامیاب ہونے والی بارہ خواتین کا تعلق پنجاب اور چار کا سندھ سے ہے۔ قومی اسمبلی کے لیے پنجاب سے کامیاب ہونے والی خواتین میں پاکستان پیپلز پارٹی کی راحیلہ پروین، ڈاکٹر فردوس اعوان، ثمینہ گھرکی، عاصمہ دولتانہ، حنا ربانی کھر، مسلم لیگ نواز کی سائرہ افضل تارڑ، سمیرا ناز، تہمینہ دولتانہ، شامل ہیں، مسلم لیگ ق کی سمیرا ملک، غلام بی بی بھروانہ، فرخندہ امجد وڑائچ نے بھی کامیابی حاصل کی ہے ۔ سندھ سے پاکستان پیپلز پارٹی کی ڈاکٹر عذرا پیچوہو، ڈاکٹر فہمیدہ مرزا، شمشاد بچانی اور متحدہ قومی موومنٹ کی خوش بخت شجاعت کامیاب ہوئی ہیں۔ | | | مسلم لیگ ق کی سمیرا ملک بھی کامیاب ہوئی ہیں |
قومی اسمبلی کی عام نشستوں پر شکست کھانے والی خواتین میں سابق وفاقی وزیر زبیدہ جلال، سیدہ عابدہ حسین اور پاکستان پیپلز پارٹی شہید بھٹو کی چئرپرسن غنویٰ بھٹو بھی شامل ہیں۔ پنجاب اسمبلی کی سات عام نشستوں پر جن خواتین نے کامیابی حاصل کی ہے ان میں شہزادی عمر زادی ٹوانہ، نیلم جبار، نادیہ راحیل، روبینہ شاہین، نغمہ مشتاق اور مسز عمر فاروق شامل ہیں، جن میں سے چار کا تعلق نواز لیگ سے ہے جبکہ ایک پاکستان پیپلز پارٹی اور ایک مسلم لیگ ق سے تعلق رکھتی ہیں۔ سندھ اسمبلی کی ایک عام نشست پر پاکستان پیپلز پارٹی کی سسی پلیجو کامیاب ہوئی ہیں جبکہ بلوچستان اسمبلی کی ایک نشست پر نسرین کھیتران نے کامیابی حاصل کی ہے، جن کا تعلق مسلم لیگ ق سے ہے۔ عام انتخابات کے بعد اب قومی اسمبلی میں خواتین کی مخصوص ساٹھ نشستیں اور اقلیتوں کی دس نشستیں سیاسی جماعتوں میں اکثریت کی بنیاد پر تقسیم کی جائیں گی۔ | 
مشرف مخالف جماعتوں کی جیت
