علی سلمان بی بی سی اردو ڈاٹ کام، لاہور

	اگر دھاندلی ہوئی تو ملک گیر تحریک چلے گی: نواز شریف

یہ بات انہوں نے ماڈل ٹاؤن میں مسلم لیگ نون کے دفتر میں ایک پریس کانفرنس سے خطاب کرتےہوئے کہی۔

میاں نواز شریف نے کہا کہ گزشتہ رات دھاندلی کا جو پلان بنایا گیا وہ ان کے علم میں آچکا ہے اور لیکن بعض معلومات وہ بوجوہ عام نہیں کرنا چاہتے لیکن وہ حب الوطنی اور ضمیر کے نام پرمتعلقہ حلقوں سے اپیل کرتے ہیں کہ وہ ہرطرح کے دباؤ اور لالچ سے بلند ہوکر منصفانہ انتخابات کے لیے اپنا کردار ادا کریں۔ انہوں نے کہا کہ پلان یہ ہے کہ الیکشن کہیں اور نتائج کہیں اور مرتب کیے جائیں گے۔

ان کا کہنا تھا کہ اگر دھاندلی ہوئی تو ایسی ملک گیر تحریک چلے گی کہ دھاندلی کرنے والے اپنے انجام سے نہیں بچ سکیں گے۔ نواز شریف کی پریس کانفرنس میں ملک کے اٹارنی جنرل ملک عبدالقیوم کی وہ ٹیلی فونک گفتگو بھی سنائی گئی جو ہیومین رائٹس واچ کی ویب سائٹ پر موجود ہے۔

ملک میں امن وامان کے حوالے سے ایک سوال کے جواب میں انہوں نے کہا کہ عوام کو کسی سے ڈرنے کے ضرورت نہیں ہے۔ انہوں نے عوام سے اپیل کی کہ ملک کی تقدیر بدلنے کے لیے وہ ووٹ ڈالنے ضرور جائیں۔ انہوں نے کہا کہ عوام خوفزدہ نہ ہوں بلکہ ملک و قوم کے لیے دو تین گھنٹے نکالیں اور پولنگ سٹیشنوں پر پہنچیں۔

میاں نواز شریف نے کہا کہ وہ جان ہتھیلی پر رکھ کر انتخابی مہم چلاتے رہے ہیں اور میڈیا نے بھی خطرات مول لیکر ان کی کوریج کی ہے۔ انہوں نے سیاسی جماعتوں کی پریس کانفرنسوں پر میڈیا کے نگران ادارے پیمرا کی پابندیوں کو مسترد کردیا اور کہا کہ اس کی یہ پابندی اسی طرح غیر قانونی ہے جس طرح پرویز مشرف کی صدارت غیر قانونی ہے۔

مسلم لیگ نون کو اپنی شکست سامنے نظر آرہی ہے اور اسی لیے وہ پہلے سے ہی دھاندلی کا الزام لگانا شروع ہوگئی ہے ترجمان، مسلم لیگ (ق) پنجاب

پریس کانفرنس میں ان کے بھائی شہباز شریف بھی موجود تھے۔ انہوں نے کہا کہ مسلم لیگ نون کے ورکر دھاندلی کے ہر حربے کو ناکام بنا دیں گے۔ انہوں نے کہا کہ عوام انیس فروری کو نواز شریف کو وزیراعظم دیکھنا چا ہتے ہیں تو ووٹ ضرور ڈالیں۔

میاں نواز شریف کی پریس کانفرنس کے جواب میں مسلم لیگ قاف کے وزریراعظم کے غیر اعلانیہ امیدوار چودھری پرویز الہیٰ نے اپنی رہائش گاہ پر پریس کانفرنس بلائی تھی لیکن انہوں نے کہا کہ الیکشن کمیشن نے انہیں صرف شکریہ کی اجازت دی ہے۔ ان کی جگہ مسلم لیگ پنجاب کے ترجمان سنیٹر کامل علی آغا نے خطاب کیا اور کہا:’مسلم لیگ نون کو اپنی شکست سامنے نظر آرہی ہے اور اسی لیے وہ پہلے سے ہی دھاندلی کا الزام لگانا شروع ہوگئی ہے‘۔