عبدالحئی کاکڑ، عزیزاللہ بی بی سی اردوڈاٹ کام، پشاور و کوئٹہ

	نواب اکبر بگٹی کی ہلاکت کے بعد بالاچ مری ایک بار پھر بلوچ مزاحمت کاروں کی امیدوں کا محور بن گئے۔

بیلٹ (ووٹ) کے ذریعے اسمبلی میں پہنچ کر پاکستان کے آئین کے تحت حلف اٹھانے والے بالاچ مری میں کچھ ہی عرصے کے دوران ایک ایسی تبدیلی رونما ہوئی کہ انہوں نے بندوق اٹھائی اور پہاڑوں پر چڑھ گئے جسکے بعد انہوں نے کہا کہ’ ہم نے پنجاب کی غلامی اور جبر سے نجات پانے کے لیے آزادی کی جدوجہد شروع کردی ہے۔‘

ایک اور موقع پر انہوں نے کہا کہ’محرومیاں اتنی بڑھ چکی ہیں کہ ہمیں پاکستان کےتوڑے جانےکا کوئی غم نہیں اور اب صوتحال مزید گھمبیر ہوجائے گی۔‘

اسمبلی کے فلور پر خطاب کے دوران سرخ رنگ کی گول ٹوپی پہنے، ہلکی سی داڑھی اور نوابی مونچھوں کا مالک یہ نوجوان بلوچستان کی سیاسی بساط پر جمہوری عمل میں شامل دیگر بلوچ لیڈروں کی طرح ایک ایسا اضافی مہرہ نظر آ رہا تھا جس کا کام بظاہرتو بلوچوں کے قومی حقوق کا ’ کھوکلا‘ نعرہ لگانا ہے جبکہ پس پردہ اپنے سیاسی اور قبائلی مفادات کے حصول کے لیے اسٹیبلشمنٹ کے در پر سربسجود ہونا تھا۔

مسلح جد وجہد  کمانڈو وردی میں ملبوس، لمبے بالوں اور بڑی داڑھی والے ’گوریلا‘ بالاچ مری کو زیادہ تر بلوچ قوم پرست نوجوانوں نے بلوچ مزاحمت کا ’چے گویرا‘ سمجھتے ہوئےان کی تصویر کو اپنےکمپیوٹر اسکرین اور کالج کی کتابوں کاپیوں پر چسپاں کردیا

بلوچستان کے معروف قوم پرست سیاستدان نواب خیر بخش مری کے فرزند ہونے کے ناطے بالاچ مری کو بلوچستان میں دوہزار دو کے بعد شروع ہونے والے فوجی آپریشن کے دوران بلوچستان کے طول و عرض میں موجود متوسط اور غریب طبقے سے تعلق رکھنے والے نوجوانوں میں زیادہ مقبولیت حاصل ہوئی۔ ان نوجوانوں نے بالاچ مری کے زیرکمان ٹریننگ کیمپوں میں تربیت حاصل کی جن میں سے کئی گرفتار ہوکر حکومت کے’ ٹارچر سیلوں‘ میں اب بھی پڑے ہیں۔

سن دو ہزار چار کے دوران جب نواب اکبر خان بگٹی نے بلوچوں کے حقوق کے حصول کے لیے پارلیمانی سیاست کو خیر باد کہتے ہوئے مسلح جدوجہد کا آغاز کیا تو بگٹی جیسے زیرک، تجربہ کار اور ذہین سیاستدان کے سامنے نوجوان اور نو آموز بالاچ مری کی شخصیت دھندلا سی گئی تھی تاہم چھبیس اگست دو ہزار چھ کو نواب اکبر خان بگٹی کی ہلاکت کے بعد وہ ا یک بار پھر بلوچ مزاحمت کاروں کی امیدوں کا محور بن گیا۔

عزیزاللہ خان، بی بی سی اردو ڈاٹ کام کوئٹہ

نوابزادہ بالاچ مری نرم گفتار کے مالک تھے اور بلوچستان کے حقوق کے حصول کے لیے آواز بلند کرتے رہے ہیں۔

نواب اکبر بگٹی کی ہلاکت سے پہلے کئی مرتبہ ان سے ٹیلیفون پر رابطہ رہتا تھا اور بات چیت کے دوران وہ بلوچوں اور بلوچستان کے حقوق بلوچوں کے وسائل پر اختیار کے لیے آواز بلند کرنے اور پاکستان کی اسٹبلشمنٹ سے ناراض رہتے تھے۔

بالاچ مری سن دو ہزار دو کے انتخابات کے دوران لندن میں تھے اور انتخابات میں حصہ لیا۔ ان انتخابات میں انہوں نے بڑی تعداد میں ووٹ حاصل کیے اور بلوچستان اسمبلی کے رکن منتخب ہوئے۔ انہوں نے بلوچستان اسمبلی کے اجلاس میں صرف ایک مرتبہ شرکت کی اور پھر اس کے بعد وہ کبھی اسمبلی کے اجلاس میں نہیں آئے۔

بالاچ مری نے ابتدائی تعلیم کوئٹہ پھر نواب خیر بخش مری کے جلاوطنی کے دور میں سیکنڈری سکول کی تعلیم افغانستان اور اعلیٰ تعلیم ماسکو میں حاصل کی۔ وہ انیس سو بیانوے میں واپس پاکستان آئے اور سیاست میں حصہ لیا۔

فراری کیمپ  فراری کیمپوں کی تعداد کے بارے میں حکومت کی جانب سے مختلف دعوے سامنے آئے تھے، کبھی بیس کیمپ بتائے گئے تو کھبی سینتیس کیمپوں کی نشاندہی کی گئی تھی اور پھر یہ کہا گیا کہ تقریبا زیادہ تر فراری کیمپ ختم کردیے گئے

سترہ دسمبر دو ہزار پانچ کو کوہلو اور پھر تیس دسمبر دو ہزار پانچ کو ڈیرہ بگٹی میں مبینہ فوجی کارروائی شروع کر دی گئی تھی۔ حکومت کے مطابق یہ کارروائی فراری کیمپوں کے خلاف کی گئی اور اس وقت حکام نے دعوی کیا تھا کہ بلوچستان میں کشیدگی اور قومی تنصیبات پر حملوں میں ملوث افراد انہی کیمپوں میں تربیت حاصل کرتے ہیں۔ ان فراری کیمپوں کی تعداد کے بارے میں حکومت کی جانب سے مختلف دعوے سامنے آئے تھے، کبھی بیس کیمپ بتائے گئے تو کھبی سینتیس کیمپوں کی نشاندہی کی گئی تھی اور پھر یہ کہا گیا کہ تقریبا زیادہ تر فراری کیمپ ختم کردیے گئے اور ان کیمپوں میں لوگوں نے یا تو ہتھیار ڈال دیے ہیں اور یا مارے گئے ہیں۔ لیکن بلوچستان میں کشیدگی برقرار رہی۔

گزشتہ سال چھبیس دسمبر کو نواب اکبر بگٹی ایک فوجی کارروائی میں مارے گئے اور یہ کہا جاتا رہا کہ اس کارروائی کے دوران بالاچ مری اور براہمدغ بگٹی ان کے ہمراہ تھے اور حملے سے کچھ دیر پہلے نواب بگٹی نے انہیں زبردستی نکل جانے کا کہا تھا جس وجہ سے وہ محفوظ رہے تھے۔

نواب اکبر بگٹی کی ہلاکت کے بعد بالاچ مری سے ٹیلیفون پر رابطے نہیں ہوئے لیکن ان کی جانب سے کبھی کبھار کوئی بیان جاری کر دیا جاتا تھا۔