ایوب ترین بی بی سی اردو ڈاٹ کام کوئٹہ

	وکلا نے اس عزم کا اظہار کیا کہ عدلیہ کی آزادی تک احتجاج جاری رہے گا

مظاہرین نے آئین و عدلیہ کی بحالی اور ایمرجنسی اور نجی ٹی وی چینلوں پر پابندی ختم کرنے کے مطالبات کیے۔

کوئٹہ میں اے پی ڈی ایم کے احتجاج کے موقع پرحکومت کی جانب سے بھاری تعداد میں تعینات پولیس اورفرنٹئر کور کے دستوں کی توجہ ہٹانے کیلیے ان سیاسی کارکنوں نے کلی گل محمد سریاب روڈ تختائی بائی پاس اورسریاب روڈ پرچھوٹے چھوٹے مظاہروں کے دوران ٹائر کو نذرآتش کیے اور حکومت کے خلاف نعرے لگائے۔

اے پی ڈی ایم نے باچاخان چوک پراحتجاجی مظاہرہ کرنے کا اعلان کیا تھا تاہم شہر میں علی الصبح ہی انتظامیہ نے جگہ جگہ رکاوٹیں کھڑی کر کے سکیورٹی فورسز کی بھاری نفری تعینات کردی تھی جس کے بعد اے پی ڈی ایم کے رہنماؤں نے انتظامیہ کو چکما دیکر کارکنوں کو جنکشن چوک پر اکٹھا کرنے میں کامیاب ہو گئے۔

جہاں اے پی ڈی ایم کے کارکنوں نے پشتونخوا نیپ کے صوبائی صدرعثمان کاکڑ، عبدالقہار ودان، عوامی نیشنل پارٹی کے صوبائی صدر خدائیداد کمانڈر، جنرل سیکرٹری انجینئر زمرک، مسلم لیگ ن کے خدائے نورخان، جماعت اسلامی کے زاہداختر، مولوی رحمت اللہ، بلوچستان نیشنل پارٹی کے عبدالولی کاکڑ، آغا حسن، جمعیت علمائے اسلام کے عبدالقدوس ساسولی، تحریک انصاف کے شاہد قاضی اور دیگر کی قیادت میں سڑک بند کر کے احتجاجی مظاہرہ کیا۔

احتجاج جاری رہے گا  ہمارے پرامن احتجاج کو ڈنڈے کے زور پر روکنے کی کوشش کی گئی ہے لیکن ہمارا احتجاج آئین کی بحالی تک جاری رہے گا اور جب تک ملک سے ایمر جنسی اور پی سی او کے نفاذ کا خاتمہ نہیں ہوتا اس وقت تک چین سے نہیں بیٹھیں گے عثمان کاکڑ

کوئٹہ شہر کے مرکزجنکشن چوک پر مظاہرین پر تشدد اورگرفتاریوں کے دوران پولیس نے صحافیوں اورفوٹوگرافروں کو تصویریں بنانے کی اجازت بھی نہیں دی گئی۔ ڈی آئی جی کوئٹہ رحمت اللہ نیازی نے صرف بائیس افراد کی گرفتاری کی تصدیق کرتے ہوئے کہا کہ دفعہ ایک سو چوالس میں کسی کو بھی جلسہ یا مظاہرہ کرنے کی اجازت نہیں دی جا سکتی۔

کوئٹہ کے علاوہ مسلم باغ، قلعہ سیف اللہ، مستونگ، نوشکی، خضدار، چمن، گوادر اور دیگر علاقوں میں بھی احتجاجی مظاہرے ہوئے ہیں ۔

مسلم باغ میں لاٹھی چارج سے پانچ مظاہرین زخمی ہوگئے جبکہ پچیس سے زائد کو گرفتار کیا گیا۔

قلعہ سیف اللہ میں بیس سے زائد مظاہرین کو گرفتار کیا گیا۔ نوشکی میں نیشنل پارٹی کے ضلعی صدر خورشید جمالدینی سمیت سات مظاہرین کوگرفتار کیا گیا۔ چمن میں بھی احتجاج کی اطلاعات موصول ہوئی ہیں۔ واضح رہے کہ اے پی ڈی ایم میں شامل جمعیت علمائے اسلام (ف )نے اس احتجاج میں حصہ نہیں لیا۔

وکلا کی علامتی بھوک ہڑتال  کوئٹہ میں وکلا نے اپنے مطالبات کے حق میں علامتی بھوک ہڑتال جاری رکھی جس میں احمد یار ایڈووکیٹ اور فیصل ایڈووکیٹ نے حصہ لیا

کوئٹہ میں وکلاءنے اپنے مطالبات کے حق میں علامتی بھوک ہڑتال جاری رکھی جس میں احمد یار ایڈووکیٹ اور فیصل ایڈووکیٹ نے حصہ لیا۔ انہوں نے گرفتار وکلا کی رہائی اور عدلیہ کی آزادی تک احتجاج جاری رکھنے کے عزم کا اظہار کیا۔