عبدالحئی کاکڑ بی بی سی اردو ڈاٹ کام، پشاور

میں اب بھی پشاور ہائی کورٹ کا چیف جسٹس ہوں اور اگر چاہوں تو اپنی رہائش گاہ پر ہی عدالت لگاکر مقدمات سن سکتا ہوں تاہم میں ایسا نہیں کروں گا جسٹس طارق پرویز

عبوری آئینی حکم کے تحت حلف اٹھانے سے انکار کرنے والے پشاور ہائی کورٹ کے ’چیف جسٹس‘ طارق پرویز نے کہا ہے کہ تین نومبر کے پی سی او کے تحت حلف لینے والے تمام ججز غیر آئینی طور پر اپنے عہدوں پر فائز ہیں۔

یہ بات انہوں نے پشاور میں اپنی رہائش گاہ پر بی بی سی کے ساتھ ایک خصوصی انٹرویو کے دوران کہی۔

پاکستان میں ایمرجنسی:خصوصی ضمیمہ

ان کے بقول’ چھ بج کر بیس منٹ پر سات رکنی بنچ میں شامل ایک جج نے سپریم کورٹ کی عمارت سے مجھے فون پر اس فیصلے سے آگاہ کیا تھا جس کے بعد میں نے پشاور ہائی کورٹ کے بعض ججوں کو ذاتی اور چند کو اپنے سیکریٹری کے ذریعے اس فیصلہ سے آگاہ کرتے ہوئے انہیں پی سی او کے تحت حلف لینے سے منع کردیا تھا‘۔

طارق پرویز کا مزید کہنا تھا کہ اس حکم کے بعد سپریم کور ٹ اور چاروں ہائی کورٹس میں موجود جن جج صاحبان نے پی سی او کے تحت حلف لیا ہے، ان کی کوئی آئینی حیثیت نہیں ہے کیونکہ بقول ان کے انہوں نے عدالتی فیصلے سے روگردانی کی ہے۔

ان کے مطابق’ ایمر جنسی کے نفاذ کے اگلے روز سپریم کورٹ کے قائم مقام رجسٹرار نے ایک بیان جاری کیا تھا کہ عدالت کے ریکارڈ پر سات رکنی بنچ کا ایسا کوئی بھی فیصلہ موجود نہیں ہے اور اس کے بعد حکومتی ترجمان اور شاید اٹارنی جنرل ملک قیوم نے بھی اس قسم کے کسی فیصلے کے وجود سےانکار کیا تھا مگر دو دن کے بعد آٹھ رکنی بنچ نے ملک قیوم کے دلائل سنے اور بعد میں انہوں نے سات رکنی بنچ کے فیصلے کو کالعدم قرار دیا تو اس کا مطلب یہ ہوا کہ فیصلہ موجود تھا۔ لہذا اس فیصلے کے تحت جج صاحبان کا حلف غیر آئینی ہے‘۔

میرے بارے میں مشہور ہے کہ کام کرنا میری بیماری ہے مگر سات دن سے کام نہ کرنے کی وجہ سے اب مجھے جیل میں پڑے ان بعض قیدیوں کا دکھ ستاتا ہے جو میرے کام نہ کرنے کی وجہ سے آزاد نہیں ہوسکے ہیں جسٹس طارق پرویز

طارق پرویز کا کہنا ہے کہ وہ اب بھی پشاور ہائی کورٹ کے چیف جسٹس ہیں اور اگر چاہیں تو اپنی رہائش گاہ پر ہی عدالت لگاکر مقدمات سن سکتے ہیں تاہم وہ ایسا نہیں کریں گے۔

انہوں نے کہا کہ سپریم کورٹ کے ’برطرف‘ چیف جسٹس افتخار محمد چودھری ان کے ٹیم لیڈر ہیں اور وہ پشاور ہائی کورٹ کے’ چیف جسٹس‘ کی حیثیت سے پاکستان کی بقاء اور عدلیہ کی آزادی کی خاطر ان کے احکامات کے اب بھی منتظر ہیں۔

طارق پرویز نے سن دو ہزار میں جنرل پرویز مشرف کی جانب سے ایمر جنسی کے نفاذ کے بعد عبوری آئینی حکم کے تحت پشاور ہائی کورٹ کے چیف جسٹس کی حیثیت سے حلف اٹھایا تھا۔ جب ان سے پوچھا گیا کہ انہوں اس دفعہ حلف اٹھانے سے انکار کیوں کیا تو ان کا کہنا تھا کہ پچھلی مرتبہ انہوں نے پی سی او کو مختصرعرصے تک ایک نافذ شدہ قانون سمجھ کر ٹیکنیکل بنیادوں پر حلف لینے کا فیصلہ کیا تھا تاہم اس مرتبہ بیس جولائی کو سپریم کورٹ کی ایک بینچ نے افتخار محمد چودھری کی بطور چیف جسٹس آف پاکستان بحالی کا جوتاریخی فیصلہ سنایا اس کے تناظر میں انہوں نے عدلیہ کو آزاد ہوتے دیکھ کرحلف لینے سے انکار کردیا ہے۔

ان کے مطابق’ بیس جولائی کے فیصلے کے بعد سولہ کروڑ عوام میں آزاد عدلیہ کی ایک امید پیدا ہوگئی تھی اور اگر اس بار بھی میں پی سی او کے تحت حلف اٹھاتا تو یہ سولہ کروڑ عوام کے جذبات کی نفی اور ان کے ساتھ ایک بہت بڑا دھوکہ ہوتا۔ پچھلی مرتبہ محض چند ججوں نے حلف لینے سے انکار کردیا تھا مگر اس دفعہ ستر فیصد سے زیادہ ججوں نے پی سی او کے تحت حلف نہیں اٹھایا‘۔

سپریم کورٹ کے ’برطرف‘ چیف جسٹس افتخار محمد چودھری ہماری ٹیم کے لیڈر ہیں اور میں پشاور ہائی کورٹ کے چیف جسٹس کی حیثیت سے پاکستان کی بقاء اور عدلیہ کی آزادی کی خاطر ان کے احکامات کا اب بھی منتظر ہوں جسٹس طارق پرویز

ان کا مزید کہنا تھا کہ بحیثیت’ چیف جسٹس‘ وہ کسی بھی تحریک کا حصہ نہیں بننا چاہتے تاہم پاکستان کے ایک شہری کے طور پر وہ آزاد عدلیہ کے لیے چلائی جانے والی کسی بھی تحریک کی تعریف کریں گے۔

طارق پرویز کو اگر چہ گرفتار نہیں کیا گیا ہے تاہم وہ گزشتہ سات دن سے اپنے گھر پر ہی مقیم ہیں۔ ان کے مطابق’ میرے بارے میں مشہور ہے کہ کام کرنا میری بیماری ہے مگر سات دن سے کام نہ کرنے کی وجہ سے اب مجھے جیل میں پڑے ان بعض قیدیوں کا دکھ ستاتا ہے جو میرے کام نہ کرنے کی وجہ سے آزاد نہیں ہوسکے ہیں‘۔

انہوں نے بتایا کہ گھر پر کتابیں اور اخبارات پڑھنا ان کا مشغلہ ہے۔’اب تو میں اخبارات کے اداریے تو کیا اشتہارات اور ٹینڈر نوٹس بھی پڑھ لیتا ہوں‘۔

ڈاکٹر عائشہ صدیقہ کی افواج پاکستان کی تجارتی اور اقتصادی مفادات کے بارے میں لکھی گئی کتاب’ ملٹری انکار پوریٹڈ‘ اس وقت جسٹس طارق پرویز کے زیر مطالعہ ہے جس کے بارے میں انہوں نے بتایا کہ’ اس کتاب کو پڑھنے کی مجھے زیادہ ضرورت اس لیے نہیں ہے کیونکہ میری عمر ساٹھ سال ہے اور میں خود ان تمام چیزوں کا گواہ ہوں تاہم اس میں حقائق کو یکجا کرکے ایک کتابی صورت دی گئی ہے‘۔

اس سوال کے جواب میں کہ کتاب پڑھنے کے دوران فوج کے کردار کے بارے میں آپ کا کیا تاثر بنا ہے تو ان کا کہنا تھا کہ’ میں خود کو چیف جسٹس سمجھتا ہوں لہذا ایسی کوئی بات نہیں کروں گا جس سے سیاسی پہلو نمایاں ہو‘۔