اعجاز مہر بی بی سی اردو ڈاٹ کام، اسلام آباد

	اب تک قومی اور صوبائی اسمبلی کے کل 164 اراکین نے اپنےاستعفے جمع کروائے ہیں

عوامی نیشنل پارٹی کے مرکزی سیکرٹری اطلاعات زاہد خان نے بی بی سی کو بتایا کہ ان کے آٹھ ارکان اسمبلی جمعہ کو اپنے استعفے اسپیکر سرحد اسمبلی کو پیش کر دیں گے۔ ان کے بقول وہ یہ اقدام اے پی ڈی ایم کےاس فیصلے کے تحت لے رہے ہیں کہ چھ اکتوبر کو ہونے والے صدارتی انتخابات سے قبل ہی قومی و صوبائی اسمبلیوں سے استعفے دیئے جائیں گے۔

انہوں نے مزید کہا کہ صوبہ سرحد اسمبلی کو چھ اکتوبر سے قبل تحلیل کرنے کا فیصلہ کیا گیا تھا تاہم عدم اعتماد کی تحریک کے بعد آئین کے مطابق اسمبلی چھ اکتوبر سے قبل تحلیل نہیں ہوسکتی لہذا صدارتی انتخابات کے بعد اسمبلی کی تحلیل کیے جانے کی اہمیت ختم ہوجائے گی۔

سرحد اسمبلی میں مسلم لیگ (ن) کے پارلیمانی لیڈر انور کمال مروت نے بی بی سی کو بتایا کہ ان کے چار اکان بھی جمعہ کو اسمبلی سے مستعفی ہوجائیں گے۔انہوں نے کہا کہ وزیر اعلیٰ سرحد کے خلاف اپوزیشن کی جانب سے لائی گئی عدم اعتماد کے بعد جمیعت علماء اسلام نے ان سے یہ درخواست کی تھی کہ استعفوں کا فیصلہ مؤخر کیا جائے اور اس دوران وہ کوشش کریں گے کہ صدارتی انتخابات سے قبل ہی کسی نے کسی طریقے سے اسمبلی کو تحلیل کردیں۔

جماعت اسلامی کے امیر سراج الحق کا کہنا تھا کہ وہ جمیعت علماء اسلام کو اس بات پر آمادہ کر رہے ہیں کہ جمعہ کومتفقہ طور پراسمبلی سے استعفے دینے چاہیےتاہم جمیعت علماء اسلام ابھی تک عدم اعتماد کی تحریک کا سامنا کرنے کے مؤقف پر قائم ہے

اس سلسلے میں جب ایم ایم اے میں شامل جماعت اسلامی کے امیر سراج الحق سے رابطہ کیا گیا تو ان کا کہنا تھا کہ وہ جمیعت علماء اسلام کو اس بات پر آمادہ کر رہے ہیں کہ جمعہ کومتفقہ طور پراسمبلی سے استعفے دینے چاہیے۔تاہم ان کے بقول جمیعت علماء اسلام ابھی تک عدم اعتماد کی تحریک کا سامنا کرنے کے مؤقف پر قائم ہے۔

جمیعت علماء اسلام سے تعلق رکھنے والےصوبہ سرحد کے وزیر قانون ملک ظفر اعظم نے بی بی سی سے بات چیت کرتے ہوئے کہا کہ جمیعت علماء اسلام کے ارکان اے پی ڈی ایم کے دیگر جماعتوں کے ساتھ مل کر اسمبلی سے مستعفی نہیں ہوں گے۔ان کے بقول اے پی ڈی ایم کی جماعتوں نے استعفوں سے متعلق کیے گئے تازہ فیصلے کے بارے میں ان کے ساتھ کسی قسم کا کوئی رابطہ نہیں کیا ہے اور بقول ان کےانہوں نے انفرادی سطح پراستعفے دینے کا فیصلہ کیا ہے۔

انہوں نے مزید کہا کہ جمیعت علماء اسلام اب بھی اے پی ڈی ایم کے اس فیصلے پرقائم ہے کہ چھ اکتوبر سے قبل صوبہ پنجاب، سندھ اور بلوچستان میں اے پی ڈی ایم سے تعلق رکھنے والے اراکین اسمبلی استعفی دیں گے جبکہ وزیر اعلیٰ سرحد اسمبلی تحلیل کرنے کی سفارش کریں گے۔ان کے بقول’ ہم عدم اعتماد کی تحریک کا سامنا کریں گے اور اے پی ڈی ایم کے فیصلے کے مطابق آٹھ اکتوبر کو عدم اعتماد کی تحریک کو ناکام بنانے کے بعد گور نر سے اسمبلی کیتحلیل کرنے کی سفارش کی جائے گی۔،

واضح رہے کہ جمیعت علماء اسلام اور اے پی ڈی ایم کی دیگر جماعتوں کے درمیان اسمبلی سے مستعفی ہونے کے معاملے پر ابھرنے والے مبینہ اختلافات کے بعد نہ صرف اے پی ڈی ایم بلکہ ایم ایم اے کے ٹوٹنے کا خطرہ بھی پیدا ہوگیا ہے تاہم اس بات کا فیصلہ آئندہ چند دنوں کے دوران واضح ہوجائے گا۔