نواز شریف نے دس ستمبر کو پاکستان جانے کا اعلان کر رکھا ہے

لندن میں مسلم لیگ نواز کے اعلان کے مطابق سابق وزیرِ اعظم نواز شریف اور ان کے بھائی شہباز شریف اتوار کی شام لندن سے اسلام آباد کے لیے روانہ ہو رہے ہیں۔ پروگرام کے مطابق شریف برادران پیر دس ستمبر کو اسلام آباد پہنچیں گے۔

واپسی کا سفر: آڈیو لاگ میں تازہ ترین

تازہ ترین اطلاعات کے مطابق شریف برادران کے ساتھ لندن سے اسلام آباد جانے والے صحافیوں کو کہا گیا ہے کہ وہ پی آئی اے کی پرواز پی کے 786 کے ذریعے پاکستان جا رہے ہیں۔ تاہم ابھی تک یہ نہیں بتایا گیا کہ آیا نواز شریف بھی اسی طیارے میں پرواز کریں گے۔ اس سے پہلے یہ اعلان کیا گیا تھا کہ نواز شریف اتوار کی شام گلف ائر کی پرواز سے مسقط کے لیے روانہ ہوں گے۔ پیر کو مقامی وقت کے مطابق وہ صبح آٹھ بجے اسلام آباد روانہ ہوں گے جہاں ان کی آمد مقامی وقت کے مطابق پیر کی صبح گیارہ بجکر پینتالیس منٹ پر متوقع ہے۔

نواز شریف آمد کی تیاریاں اور گرفتاریں

میاں دے نعرے وجن گے۔۔ لاہور میں استقبال کی تیاریاں

’ہمارے دو ہزار کارکن گرفتار‘

جڑواں شہروں میں گہما گہمی نہیں

سپریم کورٹ کی طرف سے نواز شریف اور ان کے بھائی کو پاکستان واپس آنے دینے کے حکم کے بعد سے حکومتِ پاکستان نے یہ واضح نہیں کیا کہ اس کی حکمتِ عملی کیا ہوگی۔ البتہ مشرف حکومت کے عمائدین یہ اصرار کر رہے ہیں کہ نواز شریف اخلاقی طور پر پابند ہیں کہ وہ اس عہد کا پاس کریں جس کی ضمانت موجودہ سعودی فرمانرواں شاہ عبداللہ نے بھی دی تھی۔

	سنیچرکو نواز شریف نے اس بات کا اعتراف کیا کہ سن دو ہزار میں پاکستان سے سعودی عرب ان کی روانگی ایک معاہدے کے تحت عمل میں آئی تھی

خود سابق وزیرِاعظم نے بھی یہ عندیہ نہیں دیا کہ اگر انہیں وطن واپس جانے دیا جاتا ہے تو انتخابی مہم کے علاوہ ان کی سیاسی حکمتِ عملی کس نوعیت کی ہو گی۔

وزیرِ اطلاعات محمد علی درانی گزشتہ چند دنوں میں یہ کہہ چکے ہیں کہ حکومت اعلانات کی بجائے نواز شریف کے کسی عملی اقدام پر ردِ عمل کا اظہار کرے گی۔

سنیچر کو سابق لبنانی رہنما رفیق حریری کے صاحبزادے سعد حریری نے صدر جنرل پرویز مشرف سے ملاقات کے بعد اسلام آباد میں ایک اخباری کانفرنس سے خطاب میں کہا تھا کہ نواز شریف کو معاہدے کے مطابق واپس نہیں جانا چاہیے۔

سنیچر ہی کو نواز شریف نے بھی ایک پریس کانفرنس میں پہلی مرتبہ یہ اعتراف کیا تھا کہ ان کی جلاوطنی کا معاہدہ ہوا تھا۔ تاہم ان کا کہنا تھا کہ اس معاہدے کی مدت پانچ سال کے لیے تھی دس سال کے لیے نہیں۔ انہوں نے کہا کہ یہ مدت پوری ہو چکی ہے لہذا وہ پاکستان ضرور جائیں گے۔

میاں نواز شریف نے پریس کانفرنس میں ایک تحریری بیان پڑھ کر سنایا تھا اور کہا تھا کہ یہ معاملہ انتہائی حساس نوعیت کا ہے۔

اسلام آباد میں سنیچر کو سعد حریری اور سعودی شہزادے مقرن بن عبدالعزیز کی جنرل پرویز مشرف سے ملاقات اور اس کے بعد پریس کانفرنس کے بارے میں انہوں نے کہا کہ جنرل مشرف اپنی سر توڑ کوشش کر رہے ہیں کہ نواز شریف واپس نہ آئے۔

انہوں نے سعودی عرب کو اس معاملے میں شامل کرنے پر افسوس کا اظہار کیا تاہم انہوں نے اس بات کا اعتراف کیا کہ سن دو ہزار میں پاکستان سے سعودی عرب ان کی روانگی ایک معاہدے کے تحت عمل میں آئی تھی۔

حکومت اعلانات کی بجائے نواز شریف کے کسی عملی اقدام پر ردِ عمل کا اظہار کرے گی محمد علی درانی

میاں نواز شریف نے کہا کہ انہوں نے دس سال کی مدت پر اعتراض کیا اور سعد حریری نے انہوں یقین دلایا کہ یہ مدت دس سال سے کم کرکے پانچ سال کر دی جائے گی۔

انہوں نے کہا کہ سعد حریری نے پانچ دن بعد ان سے اٹک جیل ہی میں ملاقات کی اور کہا کہ اس وقت شہزادہ عبداللہ بن عبدالعزیز نے جو اب سعودی عرب کے فرما روا ہیں اس بات سے اتفاق کیا ہے کہ دس سال کی مدت بہت طویل ہے اور اسے پانچ سال کر دیا جائے گا۔

انہوں نے کہا کہ بعد ازاں سعد حریری نے ان سے معذرت کرتے ہوئے کہا کہ گیارہ ستمبر کے حملوں اور اپنے والد کی وفات کے بعد وہ اس معاہدے میں ترمیم نہیں کروا سکے۔