سہیل وڑائچ لاہور

دس ستمبر دو ہزار سات کو پاکستان واپسی کا ارادہ رکھنے والا میاں نواز شریف، سعودی عرب، قطر، لبنان اور امریکہ کی مدد سے جیل سے رہا ہونے والے میاں نواز شریف سے قطعاً مختلف ہے۔ بےشمار ملاقاتوں کے بعد میرا تجزیہ یہ ہے کہ میاں نواز شریف اپنے والد میاں شریف کی ہدایت اور حکم پر سعودی عرب جلاوطنی پر تیار ہو گئے تھے۔ اس ہدایت کو ماننے کی وجہ ان کا اپنے والد سے بے پناہ پیار اور احترام تھا۔

شریف خاندان کے سعودی عرب جانے کی سب سے بڑی وجہ تو یہ تھی کہ انہیں اندازہ تھا کہ ذوالفقار علی بھٹو کی طرح انہیں بھی سیاسی راستے سے ہٹانے کے لیے ختم کیا جا سکتا ہے۔ شریف خاندان کا خیال تھا کہ اس صورتحال سے نکل کر دوبارہ ایک وقت آئے گا کہ جب یہ جنگ پھر سے لڑی جا سکتی ہے۔

سعودی عرب جانے کی دوسری وجہ یہ تھی کہ میاں نواز شریف اپنے بیمار والد کے ساتھ زیادہ سے زیادہ وقت گذارنا چاہتے تھے۔ چنانچہ جونہی میاں محمد شریف کی وفات ہوئی ایک نیا نواز شریف سامنے آیا جو ایک بار پھر اسٹیبلشمنٹ سے لڑائی کے لیے تیار تھا۔ میاں شریف کی وفات کے بعد نواز شریف نے سعودی عرب سے نکلنے اور سیاست میں بھرپور سرگرمی کی منصوبہ بندی کی اور لندن پہنچ کر انتہائی عقل مندی سے مسلم لیگ (ن) کی مردہ سیاست کو زندہ کر دیا۔

میاں نواز شریف کی سوانح عمری لکھنے کے حوالے سے انٹرویوز کے دوران مجھے ان کے ساتھ ملاقاتوں اور گفتگو کے بیسیوں مواقع ملے۔ وہ جو نظر آتے ہیں، اصل میں اس سے بالکل مختلف ہیں۔ اکثر لوگوں کا خیال ہے کہ میاں نواز شریف بھولے بھالے اور سیدھے سادھے انسان ہیں۔

	نواز شریف اپنے بیمار والد کے ساتھ زیادہ سے زیادہ وقت گذارنا چاہتے تھے

دس ستمبر دو ہزار سات کو واپس آنے والا نیا نواز شریف جہاں پہلے سے بہادر ہونے کا تاثر دے رہا ہے وہاں فوجی اسٹیبلشمنٹ کا بھرپور مقابلہ کرنے کا عندیہ بھی دے رہا ہے۔ کہنے کو تو میاں نواز شریف بہت سے دوسرے سیاستدانوں کی طرح اسٹیبلشمنٹ کے دوست اور معاون کے طور پر سیاست کے منظر پر طلوع ہوئے تھے مگر اب وہ پاکستان میں اسٹیبلشمنٹ کے لیے سب سے بڑا سیاسی چیلنج بن کر سامنے آ رہے ہیں۔

دوسری طرف ثابت شدہ اینٹی اسٹیبلشمنٹ پارٹی، پیپلز پارٹی کا نقطہ نظر یہ ہے کہ اس وقت جمہوریت، سیاست اور پارٹی بازی سے بڑا مسئلہ دہشت گردی ہے جس کا جمہوری لیڈرشپ اور فوج مل کر ہی مقابلہ کر سکتی ہے۔

دہشتگردی سے نمٹنا  عالمی قوتیں اس وقت جنرل مشرف اور بے نظیر بھٹو کے اس نظریے سے زیادہ متفق ہیں کہ دہشت گردوں سے مذاکرات نہیں صرف لڑائی ہونا چاہیے جبکہ یہ اتفاق نہیں کرتیں کہ دایاں بازو ہی دہشت گردی سے مؤثر طور پر نمٹ سکتا ہے

ایک وقت میں وہ پاکستان کے دائیں بازو کے مقبول ترین لیڈر کے طور پر ابھرے تھے لیکن جہاں اپنی وزارت عظمٰی کے آخری دنوں میں امریکی احکامات کو پس پشت ڈالتے ہوئے ایٹمی دھماکے کیے وہاں وہ صدر کلنٹن اور امریکہ کے کافی قریب آ گئے تھے اور افغانستان میں اسامہ بن لادن کے خلاف ایکشن کے لیے تیاری کر رہے تھے۔

لگتا ہے کہ اے آر ڈی سے علیحدگی کے بعد اب ان کی نظریاتی شناخت میں ایک بار پھر دائیں بازو کا عنصر واضح نظر آ رہا ہے۔ شاید یہی وجہ ہے کہ انہوں نے دہشت گردی کے خلاف اپنے خالات کے اظہار کے لیے ایک علیحدہ پریس کانفرنس کی ہے۔

تاہم عالمی قوتیں اس وقت جنرل مشرف اور بے نظیر بھٹو کے اس نظریے سے زیادہ متفق ہیں کہ دہشت گردوں سے مذاکرات نہیں صرف لڑائی ہونا چاہیے جبکہ یہ عالمی قوتیں مولانا فضل الرحمٰن، چودھری شجاعت حسین اور نواز شریف کے اس نظریے سے اتفاق نہیں کرتیں کہ دایاں بازو ہی دہشت گردی سے مؤثر طور پر نمٹ سکتا ہے۔

بڑی رکاوٹ  میاں نواز شریف کو پاکستان اترنے دیا جائے یا نہیں، وہ دونوں صورتوں میں جنرل مشرف کی سیاسی حکمت عملی کے راستے میں بڑی رکاوٹ بن رہے ہیں

مجھے لگتا ہے کہ نواز شریف کو اپنی اعتدال پسندی کے حوالے سے مؤقف کو مزید واضح کرنا پڑے گا تبھی جا کر عالمی قوتیں ان کی حمایت پر مائل ہو سکیں گی، وگرنہ یہ قوتیں گرتے ہوئے جنرل مشرف اور دہشت گردی کے خلاف لڑنے پر تیار بے نظیر بھٹو سے ہی اپنی توقعات برقرار رکھیں گی۔

دس ستمبر کو میاں نواز شریف کو پاکستان اترنے دیا جائے یا نہیں، وہ دونوں صورتوں میں ایک بڑی سیاسی قوت بن کر ابھریں گے اور سب سے بڑی بات یہ ہے کہ وہ جنرل مشرف کی سیاسی حکمت عملی کے راستے میں بڑی رکاوٹ بن رہے ہیں۔ بے نظیر بھٹو اور جنرل مشرف کے درمیان ڈیل کا معاملہ بھی نواز شریف کی واپسی سے متاثر ہو رہا ہے۔

گو پاکستانی سیاست کے معاملات اس وقت بہت کنفیوژن کا شکار ہیں اور یہ کہنا مشکل ہے کہ کل کیا ہوگا لیکن ایک بات طے ہے کہ آنے والے چند دنوں میں اسٹیبلشمنٹ کے لیے سپریم کورٹ کے ساتھ ساتھ میاں نواز شریف ایک بہت بڑا چیلنج بن کر سامنے آ رہے ہیں۔