ریاض سہیل
بی بی سی اردو ڈاٹ کام، کراچی |  |
| | | رینجرز کے دستے حساس اور متاثرہ علاقوں میں گشت کر رہے ہیں |
کراچی اتوار کو بھی ہنگاموں کی لپیٹ میں رہا اور تشدد کی تازہ کارروائیوں میں چھ افراد ہلاک اور ایک پولیس اہلکار سمیت نو زخمی ہوئے ہیں، جس کے بعد حکومت نے شہر میں رینجرز کی مزید نفری تعینات کر دی ہے۔ خبررساں ادارے رائٹرز نے وفاقی سیکرٹری داخلہ سید کمال شاہ کے حوالے سے کہا ہے کہ حکومت نے رینجرز کو شرپسند عناصر پر فائرنگ کرنے کا اختیار دے دیا ہے جبکہ گورنر سندھ عشرت العباد نے بھی اس امر کی تصدیق کی ہے۔ تشدد کے زیادہ تر واقعات پشتون آبادی والے علاقوں میں ہوئے۔ پولیس کو قائد آباد کے علاقے سے سیف الرحمنٰ نامی شخص کی لاش ملی ہے، جسے سر میں گولی مار کر ہلاک کیا گیا تھا۔ شہر کے علاقے واٹر پمپ میں نامعلوم افراد نے متعدد دکانوں کو آگ لگا دی ہے۔ تمام متاثرہ دکانوں کے مالکان پشتون بتائے جاتے ہیں۔ ایم کیو ایم اور پولیس ایمرجنسی سینٹر پر حملے ہوئے ہیں بنارس چوک اور قصبہ کالونی میں فائرنگ کے ایک واقعہ میں محمد علی نامی شخص ہلاک ہوا ہے جبکہ نیول کالونی ابراہیم حیدری سے ایک شخص کی لاش ملی ہے، جس کی ابھی تک شناخت نہیں ہو سکی۔ | | | شہر کے مختلف علاقوں میں ہنگاموں کا سلسلہ جاری ہے |
سہراب گوٹھ کے پشتون آبادی والے علاقے سے پینٹ شرٹ پہن کر گزرنے والے ہر شخص کو تشدد کا نشانہ بنایا جاتا رہا جبکہ بعض مسلح افراد نے رکاوٹیں کھڑی کر کے سپر ہائی وے کو بلاک کیے رکھا۔ اس تمام ہنگامہ آرائی کے باوجود شہر کی سڑکوں پر پولیس کی موجودگی بہت کم تھی۔ شہر میں سنیچر سے پھوٹ پڑنے والے پر تشدد ہنگاموں میں اب تک چالیس افراد ہلاک ہوئے ہیں جبکہ زخمیوں کی تعداد ڈیڑھ سو کے قریب بتائی جا رہی ہے۔ شہر کے دوسرے داخلی راستے قائد آباد پر بھی ہنگامہ آرائی ہوئی ہے، جہاں نامعلوم افراد نے دو موٹر سائیکل جلائیں جبکہ علاقے سے فائرنگ کی آوازیں بھی سنی جا رہی ہیں۔ اختیارات کے ناجائز استعمال کے الزام کے تحت صدارتی ریفرنس کا سامنا کرنے والے چیف جسٹس آف پاکستان جسٹس افتخار محمد چودھری سندھ ہائی کورٹ بار ایسوسی ایشن کی گولڈن جوبلی تقریبات میں شریک ہونے کے لیے بارہ مئی کو کراچی آئے تھے، لیکن انہیں کئی گھنٹے ایئر پورٹ پر مبینہ طور محصور رہنے کے بعد اسلام آباد واپس لوٹنا پڑا تھا۔ ان کی آمد کے موقع پر وکلاء تنظیموں اور حزب مخالف کے جماعتوں نے ان کی حمایت جبکہ صدر مشرف کی حلیف جماعت ایم کیو ایم نے ’عدلیہ کو سیاسی مقاصد کے لیے استعمال کرنے‘ کے خلاف ریلیاں نکالیں۔ اس کشیدہ ماحول میں متحارب سیاسی گروہوں کے درمیان ہونے والے تصادم کے نتیجے میں کئی افراد ہلاک اور بیسیوں زخمی ہوئے تھے۔ اتوار کو جماعت اسلامی نے ہلاک ہونے والے اپنے دو کارکنوں کی نماز جنازہ مزار قائد کے نزدیک ادا کی ہے۔ اس موقع پر جماعت اسلامی کے منور حسن سمیت کئی رہنماؤں نے اپنے خطاب میں الیکشن کمیشن آف پاکستان سے ایم کیو ایم پر پابندی لگانے کا مطالبہ کیا۔ | | | چیف جسٹس کئی گھنٹے ایئرپورٹ پر ’محصور‘ رہے |
عوامی نیشنل پارٹی کے رہنماء شاہی سید کا کہنا ہے کہ انہوں نے اپنی جماعت کے ہلاک ہونے والے کارکنوں کی نمازہ جناز ان کے متعلقہ علاقوں میں ادا کرنے کی درخواست کی ہے۔ ’لیکن کارکنان اگر اجتماعی نمازِ جنازہ ادا کرنے کا فیصلہ کرتے ہیں تو حالات ان کے کنٹرول میں نہیں رہیں گے‘۔ ان کا کہنا تھا کہ سہراب گوٹھ اور لانڈھی میں کشیدگی سے ظاہر ہے جب جنازے اٹھیں گے تو لوگ مشتعل ہوں گے۔ شہر میں تمام بازار بند ہیں اور سڑکیں ٹرانسپورٹ سے خالی ہیں جبکہ بیشتر پٹرول پمپ دوسرے دن بھی بند رہے۔ | 
کراچی ہنگامے چونتیس ہلاک
گولیوں کی تڑ تڑ اور آگ
