بیورو رپورٹ بی بی سی اردو ڈاٹ کام

	ڈرگ روڈ کے علاقے میں فائرنگ کا سلسلہ آدھے گھنٹے تک جاری رہا

کراچی کے جناح ہسپتال میں سترہ، لیاقت ہسپتال میں چھ ، عباسی شہید ہسپتال میں پانچ، سٹیل ٹاؤن میں دو اور سول ہسپتال میں چار لاشیں پہنچائی گئی ہیں۔

جسٹس کا دورہ، کراچی میں ہنگامے

ہلاک ہونے والوں کی اکثریت شاہراہ فیصل پر فائرنگ کے واقعات میں گولیوں کا شکار ہوئے ہیں۔ شہر میں ہنگاموں کے دوران تین درجن کے قریب گاڑیوں کو بھی نذرِ آتش کر دیا گیا ہے۔

کراچی ائرپورٹ کے نزدیک ڈرگ روڈ کے علاقے میں ایم کیو ایم اور پاکستان پیپلز پارٹی کے کارکنوں کے درمیان فائرنگ کا تبادلہ آدھے گھنٹے تک جاری رہا اور اس واقعے میں متعدد افراد کی ہلاکت ہوئے۔ اس کے علاوہ ہلاک ہونے والوں میں سنی تحریک کے رہنما سہیل قادری اور مسلم لیگ (ن) کے دو کارکن بھی شامل ہیں جبکہ ایم کیو ایم کے پارلیمانی رہنما ڈاکٹر فاروق ستار کا کہنا ہے کہ ان کی تنظیم کے چار ارکان بھی فائرنگ سے ہلاک ہوئے ہیں۔ بی بی سی سے بات کرتے ہوئے انہوں نے کہا کہ ان کی جماعت کے ہلاک ہونے والے چار کارکنوں میں فدا خان، عمر خان، ملنگ خان اور جہانزیب شامل ہیں۔

شاہراہ فیصل پر ایدھی ایمبولینس کا ایک ڈرائیور بھی ہلاک ہوا ہے۔ فیصل ایدھی کے مطابق’ ڈرائیور ایک زخمی کو لیکر آرہا تھا تو اس پر فائرنگ کی گئی‘ ۔ ایدھی کے ذرائع کا کہنا ہے شاہراہ فیصل پر ڈرگ روڈ کے علاقے میں فائرنگ کے تبادلے میں ہلاک ہونے والے ایک شخص کی لاش جناح ہسپتال پہنچائی گئی ہے۔

اطلاعات کے مطابق رفاہی ادارے ایدھی کے چیف رضاکار رضوان ایدھی کو بھی مسلح افراد نے یرغمال بنایا۔ بی بی سی اردو کے رابطہ کرنے پر وہ صرف اتنا کہہ سکے کہ ’اس وقت میں نرغے میں ہوں۔ لڑکوں کی گنیں ہمارے اوپر ہیں آپ تھوڑی دیر بعد فون کریں۔کالا پل کے قریب پھنسا ہوا ہوں۔ پلیز پلیز پلیز تھوڑی دیر بعد فون کریں، ہمارے ڈرائیور کو بھی ماردیا ہے‘۔

کراچی سے نامہ نگار ریاض سہیل کے مطابق وکلاء کا ایک جلوس ایم اے جناح روڈ سے گزرتے ہوئے جب لائٹ ہاؤس کے قریب پہنچا تو نامعلوم افراد کی طرف سے اس پر پتھراؤ کیا گیا۔ جس سے کراچی بار ایسوسی ایشن کے صدر جاوید افتخار قاضی کے مطابق بیس سے زائد وکلاء زخمی ہوئے ہیں۔

	گولیاں لگنے سے زخمی ہو کر دس افراد ہسپتال پہنچے ہیں

وکلاء تنظیمیں الزام لگا رہی ہیں کہ ایم کیو ایم کے کارکنوں نے بار ایسوسی ایشننز کے دفاتر کا گھیراؤ کیا ہوا ہے اور وکلاء اور سیاسی کارکنوں کو ادھر جانے نہیں دیا جا رہا جبکہ بار ایسوسی ایشن میں خواتین وکلاء کے لیے مخصوص چیمبر کو بعض نامعلوم افراد نے پٹرول چھڑک کر آگ لگا دی ہے۔

وکلاء کے احتجاج کے بعد سندھ ہائی کورٹ کے چیف جسٹس صبیح الدین احمد نے آئی جی سندھ پولیس، ہوم سیکرٹری اور سی سی پی او کراچی کو طلب کیا اور جب سی سی پی او اظہر فاروقی جب ہائی کورٹ کی عمارت میں داخل ہوئے تو وکلاء نے انہیں گھیرے میں لے کر نعرے بازی کی۔

وکلاء تنظیموں کا کہنا ہے کہ منصوبہ بندی کے تحت حالات خراب کیے جا رہے ہیں۔چیف جسٹس کے چیمبر میں موجود سندھ ہائی کورٹ بار ایسوسی ایشن کے رکن یٰسین آزاد نے صحافیوں کو بتایا کہ سی سی پی او نے سندھ ہائی کورٹ کے احکامات پر عملدرآمد کرانے سے معذوری کا اظہار کر دیا ہے۔

کراچی میں پندرہ ہزار سکیورٹی اہلکاروں کو تعینات کیا گیا ہے جبکہ ریلیوں کے موقع پر امن و امان کی صورتحال پر قابو پانے کے لیے کراچی شہر کو تین سکیورٹی زونز میں تقسیم کیا گیا ہے اور شہر کے سترہ مقامات کو انتہائی حساس علاقہ قرار دیا گیا ہے۔

سنیچر کو کراچی اور ملک کے مختلف شہروں کے درمیان چلنے والی پروازیں بھی منسوخ کر دی گئی ہیں جس سے مسافروں کو سخت مشکلات کا سامنا ہے۔نجی فضائی کمپنی ائر بلیو کے اہلکار محمد ندیم نے بی بی سی کو بتایا کہ ان کی کمپنی نے کراچی آنے اور جانے والی چودہ پروازیں منسوخ کی ہیں جس کی وجہ کراچی ائیرپورٹ کی ناکہ بندی ہے۔