رفاقت علی بی بی سی اردو ڈاٹ کام، اسلام آباد

	اعتزاز احسن کے سوا تمام وکلاء کراچی ائیرپورٹ پر موجود ہیں

سندھ حکومت کی جانب سے چیف جسٹس افتخار کے وکیل اعتزاز احسن، حامد خان، علی احمد کرد، عاصمہ جہانگیر، چودھری زمرد خان، راجہ شفقت عباسی، محمد اکرام چودھری، اطہر منااللہ اور کچھ صحافیوں کے صوبہ بدری کے احکامات جاری کیے ہیں۔

خصوصی ضمیمہ: جسٹس کیس

صوبہ بدری کے احکامات ملنے کے باوجود اعتزاز احسن کے سوا تمام وکلاء کراچی ائیرپورٹ پر موجود ہیں۔ بیرسٹر اعتزاز احسن صوبہ بدری کے احکامات ملنے سے پہلے ہی اسلام آباد کے لیے روانہ ہو چکے تھے۔

پاکستان بار کونسل کے ممبر راجہ شفقت عباسی نے بی بی سی کو بتایا کہ انہیں صوبہ بدری کے احکامات مل چکے ہیں لیکن وہ چیف جسٹس کے ساتھ ہیں اور انہیں اکیلا چھوڑ کر نہیں جائیں گے۔

راجہ شفقت عباسی نے کہا کہ صوبہ بدری کے احکامات ملنے کے بعد انہوں نے ایک میٹنگ میں فیصلہ کیا ہے کہ وہ ان احکامات کو نہیں مانیں گےاور اگر حکومت نے زبردستی ان کو صوبہ سے نکالنا چاہا تو وہ مزاحمت کریں گے۔

انہوں نے کہا وہ ان کے ساتھی وکلاء سمجھتے ہیں کہ آئین ہر شہری کو نقل و حمل کی اجازت دیتا ہے اور وہ حکومت سندھ کے اس فیصلے کو چیلنج کریں گے۔