ریاض سہیل بی بی سی اردو ڈاٹ کام، کراچی

	قبائلی سرداروں میں سے اکثر کا تعلق حکمران یا اتحادی جماعت سے ہے

محکمہ داخلہ کی جانب سے ترتیب دی گئی ایک رپورٹ کے مطابق تصادم کا یہ سلسلہ سندھ کے دس اضلاع میں جاری ہے۔ رپورٹ میں بتایا گیا ہے کہ گھوٹکی، قمبر، شہداد کوٹ، شکارپور، جیکب آباد، دادو، لاڑکانہ، سانگھڑ، نوشہروفیروز، خیرپور اور سکھر ضلع میں سڑسٹھ قبائلی تنازعات ہیں۔

یہ تنازعات زمین کی حقِ ملکیت، بھینس، گائے یا ٹریکٹر کی چوری جیسے معمولی معاملات سے لے کر کارو کاری، بغیر اجازت گاؤں میں سے گزرنے اور لڑکے لڑکی کی مرضی سےشادی پر پیدا ہوئے ہیں۔

ان تنازعات میں زیادہ متاثر ضلع شکارپور ہے جہاں سب سے زیادہ یعنی ایک سو اڑتالیس افراد ہلاک ہوچکے ہیں۔ سب سے زیادہ تنازعات لاڑکانہ ضلع میں ہیں جہاں انیس قبائل کے درمیان تصادم کا سلسلہ جاری ہے۔ آپس میں لڑنے والے قبائل میں مہر، جتوئی، چانڈیو، چاچڑ، شر، سندرانی، لولائی، مارفانی، تیغانی، کلہوڑو، میرانی، کھوسو، جاگیرانی، سولنگی، چانڈیو اور ناریجہ قبائل ہیں۔

محکمہ داخلہ نے رپورٹ میں یہ تجویز پیش کی ہے کہ تصادموں کی روک تھام مقامی سرداروں جن میں وفاقی وزراء اور منتخب اراکینِ اسمبلی، کے
اثرو رسوخ اور پولیس کے دباؤ کی مدد سے کی جا سکتی ہے۔

قبائلی سرداروں میں سے اکثر کا تعلق حکمران یا اتحادی جماعت سے ہے جو حکومت میں تو ساتھ ہیں مگر قبائلی طور پر ان کے آپس میں تنازعات ہیں۔

کئی سال سے جاری ان تنازعات میں سے کئی کا جرگوں کے ذریعے تصفیہ بھی ہوا ہے جن میں بعض قبیلوں پر بھاری جرمانے بھی عائد کیے گئے ہیں مگر یہ تصفیے پائیدار ثابت نہیں ہو سکے ہیں۔

	سندھ میں قبائلی تصادم کی وجہ سے کئی علاقے مخالف قبائل کے لیے ’نوگو ایریا‘ بنے ہوئے ہیں

سندھ کے محکمہ داخلہ کے معاون وسیم اختر کا کہنا ہے کہ اب حکومت ایسے عناصر سے سختی سے نمبٹے گی۔ سرداروں سے پہلے بات کی جائے گی کہ وہ اپنے معاملات طے کرلیں ورنہ ان کے خلاف ایکشن لیا جائےگا۔ انہوں نے کہا وہ کسی جرگے کی حمایت نہیں کریں گے اور نہ ہی ان کا کسی جرگے سے کوئی تعلق ہے۔

محکمہ داخلہ کے سیکرٹری غلام محمد محترم کا کہنا ہے سرداروں سے رابطے کرکے ثالثی کی جائے گی اور کمیٹیاں بنائی جائیں گی جو فیصلے کرائیں گی اور ان پر عملدرآمد کی بھی پابند ہوں گی۔ ان کے مطابق ان کو جرگوں کا نام نہیں دیا جاسکتا ہے۔

واضح رہے کہ قبائلی تصادم کی وجہ سے کئی علاقے مخالف قبائل کے لیے نوگو ایریا بنے ہوئے ہیں اور وہاں کی تعلیم اور زرعی معشیت سخت متاثر ہوئی ہے۔