ہارون رشید بی بی سی اردو ڈاٹ کام، اسلام آباد

	مختلف علاقوں میں جھڑپوں کی وجہ دراصل قبائلی اور ذاتی دشمنیاں بتائی جاتی ہیں

اس مرتبہ کشیدگی کی وجہ بارہ ربیع الاول کے موقع پر شہر میں اہل سنت کا روایتی جلوس بتایا جاتا ہے جو فریقین کے مابین موجودہ خونریزی کا باعث بنا۔ اہل تشیع کا الزام ہے کہ ماضی کے معاہدوں کو نظر انداز کرتے ہوئے اس جلوس میں ان کے خلاف نعرہ بازی ہوئی اور ان کے عقائد کو نشانہ بنایا گیا۔

پاراچنار میں فسادات: رائے دیجیئے

کرم فرقہ وارانہ فسادات: تصاویر

چند روز بعد اہل تشیع نے جب ایک جلوس نکالنے کی کوشش کی تو نامعلوم افراد نے ان پر فائرنگ کردی جس سے پھر علاقے میں ایسی آگ بھڑک اٹھی جسے پوری طرح سے بجھانا مقامی انتظامیہ کے لیے مشکل ثابت ہو رہا ہے۔ فوج بھی طلب ہوئی اور جنگی ہیلی کاپٹر بھی استعمال ہوئے لیکن صورتحال اب بھی حکام کے مکمل قابو میں نہیں آسکی ہے۔

پاکستان کے قبائلی علاقے کرم ایجنسی میں فرقہ وارانہ فسادات میں زخمی ہونے والے تین افراد نے کہا ہے کہ اگر حکومت نے فوری طورپر جاری جنگ بند نہیں کی تو علاقے میں بڑے پیمانے پر تباہی کا خطرہ ہے۔

کئی لوگ اس بات پر حیران ہیں کہ آخر کئی برسوں کے امن کو یکدم کس کی نظر لگ گئی۔ ہر کوئی کہتا ہے کہ یہ سب کچھ ایک سازش کے تحت ہوا لیکن یہ سازش کس کی ہوسکتی ہے اس بارے میں کوئی کچھ حتمی انداز میں کہنے کی حالت میں نہیں۔ کوئی خفیہ اداروں اور کوئی انتہا پسند تنظیموں کا نام لیتا ہے لیکن وہ ایسا اس موقع پر کیوں کر رہے ہیں اس بارے میں کوئی بھی واضح نہیں۔

پاکستان کے دیگر علاقوں کی طرح کرم ایجنسی میں بھی اسی کی دہائی کے اواخر تک فرقہ وارانہ تشدد ناپید تھا۔ شیعہ سنی ایک ہی محلے میں ساتھ ساتھ رہتے تھے، امن تھا، بھائی چارہ تھا۔

	کئی دن سے جاری اس لڑائی میں متعدد افراد زخمی ہوئے ہیں

کرم ایجنسی قبائلی علاقوں میں اورکزئی کے علاوہ وہ علاقہ ہے جہاں شیعہ آبادی کافی زیادہ ہے۔ کہتے ہیں فوجی آمر ضیاالحق نے سنی مجاہدین کو ان شیعوں کے خلاف کھلی چھٹی دے رکھی تھی جو اس لڑائی کے لیے اپنا علاقہ استعمال نہیں ہونے دے رہے تھے۔ بیرونی امداد سے دونوں فرقوں کے مدرسے کھلے اور تلخی میں اضافہ ہوا جو آج بھی وقفے وقفے سے مار دھاڑ کی صورت میں سامنے آتا ہے۔

کچھ لوگوں کا خیال ہے کہ پارا چنار میں لڑائی کی ابتداء تو شاید فرقہ وارانہ وجوہات سے ہوتی ہے لیکن بعد میں یہ قبائلی جنگ کی صورت اختیار کر لیتی ہے۔ ابتدائی لڑائی کے برعکس اب بھی مختلف علاقوں میں جاری جھڑپوں کی وجہ قبائلی اور ذاتی دشمنیاں زیادہ بتائی جاتی ہیں۔

لیکن جس خطے میں شدت پسندی کا سیلاب روکے سے نہ رک رہا ہو اور جہاں ہلکے اور بھاری ہتھیاروں کی دستیابی کوئی بڑا مسئلہ نہ ہو ایسے علاقے میں لڑائیاں کرم ایجنسی جیسی صورت ہی اختیار کرلیتی ہیں۔

انیس سو چھیانوے میں دیواروں پر ہتک آمیز نعرہ بازی اس وقت نو روز تک فرقہ وارانہ لڑائی کا سبب بنی جس میں دو سو افراد ہلاک ہوئے تھے۔ وہ برا وقت ابھی لوگوں کے ذہنوں میں تازہ تھا کہ ایک مرتبہ پھر انہیں اسی مشکل سے گزرنا پڑا

کرم ایجنسی تعلیم و ترقی کے اعتبار سے دیگر ایجنسیوں سے کافی آگے سمجھا جاتا ہے۔ یہاں خواندگی کی شرح چھ فیصد سے زیادہ ہے۔ یہی ترقی بعض لوگوں کے دل میں یہ شک ڈالتی ہے کہ تھوڑے تھوڑے عرصے کے بعد انہیں کیوں پیچھے دھکیلنے کی کوشش کی جاتی ہے۔

اب ایک مرتبہ پھر حکومت مقامی قبائلی جرگوں کی مدد سے جنگ بندی کی کوشش کر رہی ہے۔ تاہم اسے کوئی خاطر خواہ کامیابی نہیں مل رہی۔

پرانے ایک دو چنار کے درخت شاید ابھی بھی محفوظ ہوں۔