فراز ہاشمی بی بی سی اردو ڈاٹ کام، اسلام آباد

	’الیکشن کمیشن شفاف اور منصفانہ انتخابات کرانے کا پابند ہے‘

چیف الیکش کمشنر نے جمعرات کی صبح ایک پریس کانفرنس سے خطاب کرتے ہوئے کہا کہ آئین کی روح سے صدر پارلیمان کا حصہ ہوتا ہے اور وہ اراکین پارلیمنٹ سے ملاقاتیں تو کر سکتا ہے اور انہیں مشورے بھی دے سکتا ہے لیکن کسی سیاسی جماعت کی انتخابی مہم میں حصہ نہیں لے سکتا۔

چیف الیکشن کمیشن کی طرف سے آئین کی تشریح پر اخبار نویسوں نے گزشتہ ماہ بھاشا ڈیم کے افتتاح کے موقع پر سکردو میں ایک جلسہ عام کے دوران صدر مشرف کی تقریر پر سوالات اٹھائے تو چیف الیکشن کمیشن نے ان سوالات کو نظر انداز کر دیا۔

صدر مشرف نے سکردو میں جلسئہ عام سے خطاب میں بڑے واشگاف الفاظ میں عوام سے آئندہ انتِخابات میں مسلم لیگ کے امیدواروں کو ووٹ دینے کے بارے میں کہا تھا۔

موجودہ اسمبلیوں سے صدر کے انتخابات کے بارے میں ایک سوال کا جواب دیتے ہوئے انہوں نے کہا کہ صدر کے الیکشن کے دوران چیف الیکشن کمشنر کو ریٹرنگ آفیسر کی حیثیت حاصل ہوتی ہے لہذا وہ اس سوال کا جواب نہیں دے سکتے۔

آئندہ عام انتخابات کی تاریخوں کے بارے میں ایک سوال کا جواب دیتے ہوئے انہوں نے کہا کہ اگر موجودہ اسمبلیاں اپنی آئینی مدت پوری کرتی ہیں تو پھر الیکشن کمیشن ساٹھ دن کے اندر انتخابات کروانے کا پابند ہے بطور دیگر اگر اسمبلیوں کو تحلیل کیا جاتا ہے تو پھر آئین کے تحت الیکشن کمیشن نوے دن کے اندر انتخابات کروانے کا پابند ہے۔

آئین کی روح سے صدر پارلیمان کا حصہ ہوتا ہے۔ وہ اراکین پارلیمنٹ سے ملاقاتیں تو کر سکتا ہے اور انہیں مشورے بھی دے سکتا ہے لیکن کسی سیاسی جماعت کی انتخابی مہم میں حصہ نہیں لے سکتا چیف الیکشن کمشنر

سابق وزراء اعظم بے نظیر اور نواز شریف کے انتخابات کے حوالے سے ایک سوال کا جواب دیتے ہوئے انہوں نے کہا کہ اگر وہ الیکشن میں حصہ لینے کا فیصلہ کرتے ہیں تو انہیں آکر اپنے کاغذات نامزدگی جمع کرانا ہوں گے جن پر فیصلہ قانون کے مطابق کیا جائے گا۔

انہوں نے کہا کہ الیکشن کمیشن شفاف اور منصفانہ انتخابات کرانے کا پابند ہے اور وہ اس امر کو یقینی بنائیں گے۔ انہوں نے کہا کہ تمام سیاسی جماعتوں اور رہنماؤں سے یکساں سلوک کیا جائے گا۔

چیف الیکشن کمشنر نے ایک اور سوال کے جواب میں کہا کہ پاکستان کے موجودہ قوانین کے تحت سمندر پار یا بیرونی ممالک میں بسنے والے پاکستانیوں کو ووٹ ڈالنے کا حق حاصل نہیں ہے۔

انہوں نے کہا کہ اگر موجودہ قوانین میں ترمیم کر دی جاتی ہے تو سمندر پار پاکستانیوں کو ووٹ ڈالنے کا حق حاصل ہو جائے گا۔

انہوں نے کہا کہ آئندہ عام انتخابات کے لیئے انتخابی فہرستوں کی از سرے نو تشکیل کا کام جمعہ سے ملک بھر میں شروع کر دیا جائے گا جس پر ایک ارب روپے خرچ کیے جائیں گے۔

نادرہ ان کی اطلاع کے مطابق پانچ کروڑ چالیس لاکھ شناختی کارڈ جاری کر چکی ہے۔ انتخابی فہرستوں کے مطابق ملک میں سات کروڑ کے قریب لوگوں کو حق رائے دہی حاصل قاضی محمد فاروق

ایک سوال کے جواب میں انہوں نے کہا کہ اس مرتبہ صرف ان لوگوں کا اندراج کیا جائے گا جن کے پاس نادرا کی طرف سے کمپیوٹر کے ذریعے جاری کردہ نیا شناختی کارڈ موجود ہو گا۔

انہوں نے اس تاثر کو غلط قرار دیا کہ اس وجہ سے ہزاروں لوگ اپنے حق رائِے دہی سے محروم ہو جائیں گے۔ انہوں نے کہا کہ نادرہ ان کی اطلاع کے مطابق پانچ کروڑ چالیس لاکھ شناختی کارڈ جاری کر چکی ہے۔ انتخابی فہرستوں کے مطابق ملک میں سات کروڑ کے قریب لوگوں کو حق رائے دہی حاصل ہے۔

انہوں نے کہا کہ موجودہ فہرستوں میں بہت سےایسے لوگ ہیں جن کے شناختی کارڈ نمبر درج نہیں۔ اس کے علاوہ انہوں نے کہا کہ ابھی لوگ کے پاس وقت ہے اور وہ نیا شناختی کارڈ حاصل کرکے اپنے ووٹ کا اندراج کروا سکتے ہیں۔

انہوں نے کہا کہ پرانے شناختی کارڈ کی مدت سن دوہزار تین میں ختم ہو گئی ہے اور ان کو اب استعمال نہیں کیا جاسکتا۔