عدنان عادل، بی بی سی اردو ڈاٹ کام، لاہور

	ایم پی اے پر الزام لگایا گیا ہے کہ انہوں نے الیکشن افسر کی پٹائی کردی

قصور پولیس کے مطابق یہ واقعہ اسسٹنٹ الیکشن کمشنر عبداللہ کے دفتر میں سنیچر کو پیش آیا جو چھ اکتوبر کو ضلع اور تحصیل کے ناظموں کے انتخابات کی تیاریوں میں مصروف تھے کہ اطلاعات کے مطابق ان سے حکمران مسلم لیگ کے رکن صوبائی اسمبلی ملک محمد احمد خان ملنے آئے۔ ملک محمد احمد خان پنجاب کے پارلیمانی سیکرٹری برائے پارلیمانی امور بھی ہیں۔ انہوں نے الیکشن افسر سے شکایت کی کہ یونین کونسلوں کے الیکشن کارڈز بنانے میں تاخیر کی جارہی ہے جس پر دونوں کے درمیان تلخ کلامی ہوگئی۔ ایم پی اے پر الزام لگایا گیا ہے کہ انہوں نے الیکشن افسر کی پٹائی کردی جس سے وہ زخمی ہوگئے اور انہیں چوٹیں آئیں۔

اسسٹنٹ الیکشن کمشنر عبداللہ قصور کو ضلعی ہسپتال میں داخل کرایا گیا ہے۔

قصور سٹی پولیس کے ڈی ایس پی ظہیر باجوہ کے مطابق اسٹنٹ الیکشن کمشنر زیادہ زخمی نہیں ہوئے اور ان کی حالت ٹھیک ہے۔

ان کا کہنا تھا کہ ابھی اس واقعہ کا مقدمہ اس لیے درج نہیں ہوا کہ اسسٹنٹ الیکشن کمشنر کے بھائی جو کہ ایک جج ہیں رحیم یار خان سے قصور آرہے ہیں جن کے آنے پر مقدمہ درج کیا جائے گا۔