عدنان عادل بی بی سی اردو ڈاٹ کام لاہور

الیکشن کے دوران اب تک گوجرانوالہ میں تشدد کے سب سے زیادہ واقعات ہوئے ہیں

جمعرات کو صوبہ سرحد کے بارہ، صوبہ پنجاب کے سترہ، صوبہ سندھ کے دس اور صوبہ بلوچستان کے چودہ ضلعوں میں یونین کونسلوں کے انتخابات کے لیے پولنگ ہوگی جہاں تین کروڑ بیس لاکھ رجسٹرڈ ووٹرز ہیں۔ ان ضلعوں کی تین ہزار چھیاسٹھ یونین کونسلوں کی انتالیس ہزار آٹھ سو انسٹھ نشستوں کے انتخابات کے لیے ایک لاکھ دس ہزار امیدوار میدان میں ہیں۔

چالیس ہزار فوجی جوان مقامی انتخابات کے موقع پر امن و امان قائم رکھنے کے لیے سول انتظامیہ کی مدد کے لیے چاروں صوبوں کے پچپن ضلعوں میں روانہ ہوچکے ہیں۔ میجر جنرل شوکت سلطان

آج جن ضلعوں میں پولنگ ہورہی ہے ان میں کراچی، ملتان، گوجرانوالہ اور پشاور کے شہری اضلاع بھی شامل ہیں جہاں امن و امان قائم رکھنے کے لیے فوج تعینات کی گئی ہے۔

پاک فوج کے ترجمان میجر جنرل شوکت سلطان

پولنگ کے دوران قانون نافذ کرنے والے ادارے انتہائی چوکس رہیں گے

وزیراعلی سندھ ارباب رحیم نے کہا ہے کہ رینجرز، فوج اور پولیس کے کمانڈوز ہیلی کاپٹروں کے ذریعے حساس پولنگ مراکز کی نگرانی کریں گے۔

کراچی کے ڈپٹی انسپکٹر پولیس آپریشنز مشتاق شاہ کا کہنا ہے کہ پولنگ کے دوران میں امن و امان کی صورتحال کو قابو میں رکھنے کے لیے پولیس فائرنگ سمیت تمام اختیارات استعمال کرے گی۔ کراچی میں متحدہ قومی موومینٹ اور جماعت اسلامی کے درمیان مقامی انتخابات کے موقع پر شدید کشیدگی پائی جاتی ہے اور خون خرابہ کا خدشہ ظاہر کیا جارہا ہے۔

رینجرز حکام کا کہنا ہے کہ انتخابات کے موقع پر کراچی میں وی آئی پیز کو دی گئی تمام موبائل حفاظتی دستے واپس لے لیے گئے ہیں۔

پنجاب میں گوجرانوالہ میں الیکشن سے وابستہ تشدد کے واقعات کی تعداد سب جگہوں سے زیادہ رہی ہے اور بدھ کے روز بھی وہاں یونین کونسل تہتر میں دو امیدواروں کے گروہوں میں فائرنگ کے تبادلہ میں گیارہ افراد زخمی ہوئے جبکہ ایک امیدوار کے بھائی کو گولی مار کر ہلاک کردیاگیا۔

منگل کے روز راولپنڈی میں وفاقی وزیر شیخ رشید احمد اور جماعت اسلامی کے حامیوں کے درمیان انتخابی اسٹکرز لگانے کے مقاملہ پر فائرنگ کا تبادلہ ہوا جس سے دو شخص ہلاک ہوگئے ہیں اور تین افراد شدید زخمی ہیں۔ متحدہ حزب مخالف نے حکومت پر راولپنڈی میں مخالف امیدواروں کو ہراساں کرنے اور اس کے بارہ افراد کو حراست میں لینے کا الزام عائد کیا ہے۔

انتخابات غیر جماعتی بنیادوں پر ہو رہے ہیں

پنجاب میں محکمہ داخلہ کی طرف سے دو ہزار اننچاس پولنگ مراکز کو امن و امان کے اعتبار سے حساس ترین جبکہ تین ہزار آٹھ سو اکسٹھ کو حساس قرار دیا گیا ہے۔ پنجاب میں سترہ ضلعوں میں کُل سترہ ہزار چار سو اٹھائیس پولنگ مراکز ہیں۔

الیکشن کمیشن کے ترجمان کے مطابق کوئی وفاقی یا صوبائی وزیر، مشیر اور پارلیمانی کمیٹی کا چئرمین سمیت کوئی غیر متعلقہ شحص کسی پولنگ اسٹیشن کے اندر پروٹوکول کے ساتھ نہیں جاسکے گا اور نہ کوئی شخص پولنگ مرکز میں موبائل فون لے جاسکے گا۔ وزراء اور دوسرے حکومتی عہدیدار صرف اپنا ووٹ ڈالنے کے لیے پولنگ مرکز میں جاسکیں گے۔

گھوٹکی ضلع کی تقسیم کرنے اور سات نئی یونین کونسلیں بنانے کے خلاف پیپلز پارٹی نے ہائیکورٹ میں درخواست دی تھی جس پر ہائیکورٹ نے ان یونین کونسلوں میں الیکشن کرانے کا حکم دیا۔ تاہم سندھ حکومت کی درخواست پر الیکشن کمیشن نے وہاں انتخابات ملتوی کردیے۔ یہاں انتخابات کی نئی تاریخ کا اعلان بعد میں کیا جائے گا۔

کراچی، ملتان، گوجرانوالہ اور پشاور کے شہری اضلاع میں امن و امان قائم رکھنے کے لیے فوج تعینات کی گئی ہے۔

ملک بھر میں جن ترپن اضلاع میں پولنگ ہورہی ہے وہاں گیارہ سو سات نشستیں خالی رہ گئی ہیں جن پر کسی امیدوار نے کاغذات نامزدگی جمع نہیں کرائے۔پنجاب میں آٹھ امیدوار انتخابی مہم کے دروان میں انتقال کرگئے جس سے ان جگہوں پر انتخاب ملتوی کردیا گیا ہے۔

مسلم لیگ(نواز گروپ) نے مقامی انتخابات کے پہلے مرحلہ سے پہلے ایک وائٹ پیپر جاری کیا ہے جس میں حکومت پر انتخابات سے پہلے دھاندلی کرنے کے الزامات لگائے گئے ہیں۔ اس میں کہا گیا ہے کہ حکومت نے مستقل چیف الیکشن کمشنر مقرر نہ کرکے آئین کے آرٹیکل دو سو تیرہ کی خلاف ورزی کی ہے۔

پنجاب کے جن ضلعوں میں آج انتخابات ہورہے ہیں ان میں گوجرانوالہ، سیالکوٹ، سرگودھا، خوشاب، ملتان، بہاولپور، بہاولنگر، لودھراں، خانیوال، ساہیوال، پاکپتن، وہاڑی، ڈیرہ غازی خان، راجن پور، مظفر گڑھ، لیہ اور رحیم یار خان شامل ہیں۔

سندھ کے دس ضلعوں میں جہاں آج انتخابات ہورہے ہیں کراچی، تھٹھہ، ٹنڈو اللہ یار، نوشہرو فیروز، جیکب آباد، کشمور، میرپور خاص، عمر کوٹ سانگھڑ، تھر پارکر شامل ہیں۔ صوبہ سرحد کے بارہ ضلعوں پشاور، چار سدہ، مردان، نوشہرہ، صوابی، کوہاٹ، کڑک، بنوں، ڈیرہ اسماعیل خان، ٹانک، ہری پور اور بنیر میں آج انتخابات ہورہے ہیں۔

کراچی میں امیدواروں کے ویران کیمپ

صوبے کے اٹھائیس اضلاع میں آٹھ سو پانچ امیدوار بلامقابلہ منتخب ہو چکے ہیں جس میں نواب اکبر بگٹی کا مضبوط گڑھ ڈیرہ بگٹی شامل ہے جہاں تمام چودہ یونین کونسل کے تمام امیدوار بلا مقابلہ منتخب ہوئے ہیں۔

صوبائی الیکشن کمشنر چوہدری قمر زمان نے بتایا ہے کہ ڈیرہ بگٹی میں مد مقابل امیدوار آئے ہی نہیں اور اگر آئے تو انھوں نے اپنے کاغذات واپس لے لیے تھے۔ صوبے میں ایک سو چھپن نشستیں خالی رہ گئی ہیں جن میں ایک سو چوالیس اقلیتوں کی نشستیں ہیں۔

پہلے مرحلے میں انتخابات پشین، جعفر آباد، خاران، نوشکی، قلعہ سیف اللہ، بارکھان، سبی، زیارت، نصیر آباد، بولان، مستونگ، گوادر، بولان، خضدار اور آوارن میں ہو رہے ہیں۔ ان میں چھ اضلاع کو انتہائی حساس قرار دیا گیا ہے جن میں بارکھان، بولان، نصیر آباد، جعفر آباد، خضدار اور آواران شامل ہیں۔

بی بی سی کے نمائندے عزیز اللہ خان نےصوبائی الیکشن کمشنر کے حوالے سے کہا ہے کہ صوبائی حکومت کے ساتھ مشاورت کے بعد ان اضلاع کو حساس قرار دیا گیا ہے جہاں نیم فوجی دستے تعینات کر دیے گئے ہیں جنھیں پولیس اور بلوچستان ریزرو پولیس کی معاونت حاصل ہو گی۔ انھوں نے کہا ہے کہ حکومت کسی بھی وقت فوج کو بھی طلب کر سکتی ہے۔

بلوچستان کے اٹھائیس اضلاع میں سات ہزار تین سو اکہتر نشستوں کے لیے سولہ ہزار چار سو اٹھائیس امیدوار میدان میں ہیں جن کے لیے تیرہ سو چون پولنگ سٹیشن قائم کیے گئے ہیں۔ پہلے مرحلے میں سات ہزار چھ سو چھیانوے امیدوار میدان میں ہیں جو مختلف نشتوں کے لیے مقابلہ کر رہے ہیں۔

یونین کونسلوں کے لیے منتخب ہونے والے تقریبا اسی ہزار کونسلرز، ناظم اور نائب ناظم انتیس ستمبر کو مقامی انتخابات کے تیسرے اور آخری مرحلہ میں تحصیل کونسلوں اور ضلع کونسلوں کے ناظموں اور نائب ناظموں کا انتخاب کریں گے۔اس سے پہلے سنہ دو ہزار اور دو ہزار ایک میں مقامی حکومتوں کے نئے نظام کے تحت چار مرحلوں میں پولنگ کرائی گئی تھی جن میں مجموعی طور پر ملک میں چھپن فیصد ووٹروں نے حق رائے دہی استعمال کیا تھا۔