وسعت اللہ خان بی بی سی اردو ڈاٹ کام، اسلام آباد

اب عالمی برادری صدر مشرف کے ساتھ پانچ پیاروں کو بھی اعتماد میں لیتی ہے

لہٰذا جو بات ان آٹھوں کے لیے اچھی ہے وہ عالمی برادری کے لیے اچھی ہے اور جو ان آٹھ کے لیے خطرناک ہے وہ باقی دنیا کے لیے بھی خطرناک ہے۔اس فارمولے کی روشنی میں اگر آج کے پاکستان کو دیکھا جائے تو ان دنوں یہاں ایک اصطلاح فیشن میں ہے یعنی پارلیمنٹ کی بالا دستی۔ یعنی جو کچھ ہوگا پارلیمنٹ کی منظوری سے ہوگا ورنہ کچھ نہ ہوگا۔

بظاہر پارلیمنٹ کی بالادستی کا مطلب ہے فیصلہ سازی میں سولہ کروڑ عوام کی نمائندہ قومی اسمبلی اور سینٹ کے چار سو بیالیس منتخب ارکان کی رائے اور بالا دستی لیکن عملاً پارلیمنٹ کی بالا دستی سے مراد یہ ہے کہ تین غیر منتخب شخصیات یعنی آصف علی زرداری، میاں نواز شریف اور الطاف حسین اور دو منتخب شخصیات یعنی اسفند یار ولی اور مولانا فضل الرحمان کی رائے اور اس رائے کی بالادستی۔

اٹھارہ فروری کے بعد اگر کچھ فرق آیا ہے تو بس یہ کہ پہلے عالمی برادری کے خود ساختہ ترجمان یعنی امریکہ اور برطانیہ محض صدر پرویز مشرف سے معاملہ کرتے تھے۔ اب عالمی برادری صدر مشرف کے ساتھ ساتھ پانچ پیاروں کو بھی اعتماد میں لیتی ہے۔

	جان نیگرو پونٹے سابق وزیراعظم نواز شریف کے ہمراہ

اس عالمی برادری کو اس سے کوئی لینا دینا نہیں کہ وزیرِ ریلوے کون بنتا ہے، وزارتِ ثقافت کس کے پاس ہے، امور کشمیر کا قلمدان کس کی میز پر ہے، سائنس و ٹیکنالوجی کا محکمہ کسے دیا گیا ہے، خزانے اور خسارے کی تجارت کی ناپ تول کس کے ذمے ہے۔ عالمی برادری کی بنیادی دلچسپی تو بس یہ ہے کہ صدر اور وزیرِاعظم کی ورکنگ ریلیشن کتنی بہتر ہے۔ وزارتِ خارجہ و داخلہ ، قومی سلامتی کے شعبے اور واشنگٹن کی پاکستانی سفارت محفوظ ہاتھوں میں ہے کہ نہیں۔ کہیں یہ ذمہ داریاں ایسے اصحاب کے حوالے تو نہیں ہیں جو گیم پلان سبوتاژ کر دیں یا لہو گرم رکھنے کی باتوں کو ایک سنجیدہ مسئلے میں تبدیل کر دیں۔

اس لحاظ سے جنابِ جان نیگروپونٹے اور جنابِ رچرڈ باؤچر نٹ بولٹ کسنے کے بعد پاکستان سے خاصے مطمئن ہو کر گئے ہیں۔ پانچ پیاروں کو سمجھا دیا گیا ہے کہ عالمی برادری کو نئے سیٹ اپ سے کیا توقعات ہیں اور جمہوری کھیل کا دائرہ کتنا محدود یا غیر محدود ہے۔

رہے عوام تو انہیں مکمل مایوسی سے بچانے کے لیے سو دن کا پروگرام دے دیا گیا ہے۔ آئینی ترامیم کے ایک پیکیج سے مشروط عدلیہ کی بحالی کی خوشخبری بھی سنائی گئی ہے۔ نئی جمہوری حکومت کے لیے بیرونی امداد میں اضافے کی نوید ہے اور چیف آف آرمی سٹاف کے وزیرِاعظم ہاؤس تک چل کر آنے اور عوامی رہنماؤں کو بریفنگ دینے کے عمل کو اسٹیبلشمنٹ پر جمہور کی بالادستی قرار دیا جا رہا ہے۔

میں جس علاقے میں پچھلے ایک برس سے رہ رہا ہوں وہاں کچھ کچھ فاصلے سے سبزی کی دو دوکانیں کھلی ہوئی ہیں۔ میری بیوی کا اصرار ہے کہ خریداری ہمیشہ دوسری دوکان سے کی جائے کیونکہ پہلی دوکان میں سبزی اتنی تازہ نہیں ہوتی۔

پرسوں کسی نے مجھے بتایا کہ دونوں دوکانوں کا مالک ایک ہی ہے مگر یہ بات میں بیوی کو کیسے سمجھاؤں ؟؟؟؟؟؟