وسعت اللہ خان بی بی سی اردو ڈاٹ کام

	تبدیلی کے لئے تیار پاکستانی سماج کو ایک منظم دھارے کی صورت کون دے گا

پاکستان میں نو مارچ سے بیس جولائی تک عدلیہ کے محاذ پر جو معرکہ لڑا گیا اس کے نتیجے میں کئی عشروں بعد ایک حقیقی تبدیلی کے لئے ملک گیر امنگ دیکھنے میں آئی۔مگر بدقسمتی یہ ہے کہ تبدیلی کے لئے تیار سٹیج پر سوار ہونے کے لئے نہ تو کوئی اہلیت دکھا رہا ہے اور نہ ہی آمادہ نظر آتا ہے۔

لینن، ماؤزے تنگ، گاندھی، جناح ، ناصر، خمینی ، منڈیلا ، یا آنگ سانگ سوچی جیسی کسی شخصیت کا عکس کسی اور میں ڈھونڈنا تو خیر دیوانگی ہوگی یہاں تو کوئی نیپالی پراچندہ، فلپینی کورازون اکینو، پولش لیخ ولیسا، چیکو سلوویکین ویسلاف ہاول ، اور وینیزویلین ہیوگو شاویز کی تیسری کاربن کاپی بھی نظر نہیں آرہی جو تبدیلی کے لئے تیار پاکستانی سماج کو ایک منظم دھارے کی صورت دے سکے۔

ہاں ! فضا میں گدھ ضرور منڈلا رہے ہیں۔ جنہیں یہ گمان ہے کہ تبدیلی کی آرزو کا نوزائیدہ بچہ جیسے ہی آکسیجن یا خوراک کی کمی کے سبب آنکھیں پتھرائے تو اسے جھپٹ لیا جائے۔

ایک عام پاکستانی کی عمومی بیزاری بتاتی ہے کہ وہ اب قبائلی انداز کی وفا دارانہ سیاست سے جان چھڑانے کے لئے پوری طرح تیار ہے لیکن اس کی اس آمادگی کو فلک شگاف نعرے میں کون تبدیل کرے،اس آدمی کی قیادت کا کوئی بھی دعویدار اپنی ذات، اپنی ناک اور اپنے ذہن کی تنگ سرنگ سے آگے کچھ دیکھ ہی نہیں سکتا یا دیکھنا ہی نہیں چاہ رہا۔

کسی کو ذاتی مقدمات کے کمبل سے جان چھڑانے کی پڑی ہے تو کسی کو چھینے گئے اقتدار کی بحالی کی لگی ہے تو کوئی پرمٹوں ، عہدوں اور وقتی مراعات کی ہڈیاں چبانے کے لئے خود کو گروی رکھنے پر تیار ہے۔

کیا اس خطے کی قسمت میں حسینہ واجد، خالدہ ضیا، بے نظیر بھٹو، نواز شریف، مولانا فضل الرحمان ، جنرل ارشاد اور جنرل مشرف وغیرہ ہی لکھے گئے ہیں۔