شکیل اختر بی بی سی اردو ڈاٹ کام، دلی

	پاکستان کی تفتیشی رپورٹ پر پرنب نے پارلیمنٹ میں ایک بیان دیا

ممبئی حملے پر پاکستان کی تحقیقاتی رپورٹ پر پارلیمنٹ میں ایک بیان دیتے ہوئے وزیر خارجہ پرنب مکھر جی نے کہا کہ تعلقات بہترہونے کا انحصار اس بات پر ہے کہ پاکستان ممبئی حملے کی تقتیش کو منطقی انجام تک پہنچاتا ہے یا نہیں۔

انہوں نے پاکستان کی اب تک کی تفتیش اور اقدامات کو مثبت قرار دیا اور کہا کہ حکومت پاکستان کو مزید تفصیلات فراہم کرے گی۔

وزیر خارجہ نے کہا کہ پاکستان کی سیاسی قیادت نے ممبئی حملے کی مزمت کی تھی اور تفتیش میں مکمل تعاون کا وعدہ کیا تھا: ’ ہم ان کی نیت اور سنجیدگی میں شک نہیں کر رہے ہیں لیکن حقیقت یہ ہے کہ پاکستانی حکام کی طرف سے ممبئی حملے کے بارے میں جس طرح کا رد عمل سامنے آیا تھا وہ قطعی مناسب نہیں تھا۔‘

انہوں نے کہا کہ دونوں ملکوں کے تعلقات کی بنیاد اس بات پر قائم ہے کہ پاکستان اپنی سر زمین کو ہندوستان کے خلاف کسی کو استعمال کرنے کی اجازت نہیں دے گا۔ ‎’یہ پاکستان کی بنیادی ذمہ داری ہے کہ وہ ان دہشت گرد تنطیموں کے خلاف مؤثر اور سنجیدہ کاروائی کرے جو اس کی سرحد میں پوری آزادی کے ساتھ سرگرم ہیں۔‘

ہم ان کی نیت اور سنجیدگی میں شک نہیں کر رہے ہیں لیکن حقیقت یہ ہے کہ پاکستانی حکام کی طرف سے ممبئی حملے کے بارے میں جس طرح کا رد عمل سامنے آیا تھا وہ قطعی مناسب نہیں تھا۔ پرنب مکھرجی، وزیر خارجہ

انہوں نے کہا کہ بہتر تعلقات کا انحصار اس بات پر ہوگا کہ پاکستان ممبئی حملے کی سازش کی مکمل تفتیش کرے اور اور اس میں شامل افراد کی نشاندہی کرے۔ بقول ان کے یہ ذمہ داری پاکستان پر ہے۔

وزیر خارجہ نے کہا کہ ہندوستان کو پاکستان کے عوام سے کوئی شکایت نہیں ہے اور انہیں اس صورتحال کے لیے ذمہ دار نہیں ٹھہرایا جا سکتا ۔‎’اسی لیے ہم نے دانستہ طور پرعوامی سطح پر رابطے میں کوئی کمی نہیں کی ہے اور تجارت اور روڈ لنک برقرار ہے ۔‘

پرنب مکھرجی نے مزید کہا کہ پاکستان میں موجود دہشگرد ہندوستان ہی نہیں بلکہ پورے خطے اور پوری دنیا کے لیے خطرہ بنے ہو ئے ہیں۔ یہ پاکستان کی ذمے داری ہے کہ وہ دہشت گردوں کے ڈھانچے کو پوری طرح تباہ کر دے۔