بیورو رپوٹ بی بی سی اردو ڈاٹ کام، لندن

منموہن سنگھ نےکہا کہ ہمسایہ ملکوں کو عسکریت پسندوں کے خلاف کارروائی کرنی ہوگی۔

قوم سے خطاب کرتےہوئے انہوں نے ہندوستان مخالف عسکریت پسندوں کو محفوظ پناہ گاہیں دینے والے ’ہمسایہ‘ ممالک کو بھی متنتبہ کیا اور ملک کے عوام سے ’ امن اور ہم آہنگی‘ برقرار رکھنے کی اپیل کی۔

یہ حملے منصوبہ بند اور مربوط طریقہ سے کیے گئے اور غالباً ان کی کڑیاں بیرون ملک تک جاتی ہیں، اور ان کا مقصد خوف و ہراس پھیلانا تھا کیونکہ انہوں نے اہم مقامات کو نشانہ بنایا اور غیر ملکیوں کو بلاامتیاز قتل کیا منموہن سنگھ

’یہ حملے منصوبہ بند اور مربوط طریقہ سے کیے گئے اور غالباً ان کی کڑیاں بیرون ملک تک جاتی ہیں، اور ان کا مقصد خوف و ہراس پھیلانا تھا کیونکہ انہوں نے اہم مقامات کو نشانہ بنایا اور غیر ملکیوں کو بلاامتیاز قتل کیا۔‘

انہوں نے کہا کہ ’ یہ بات ظاہر ہے کہ جس گروپ نے یہ حملے کیے، اور جس کے ٹھکانے ملک سے باہر ہیں، اس کا واحد مقصد ملک کے تجارتی مرکز میں افرا تفری پھیلانا تھا۔‘

’ہم اپنے ہم سایوں پر یہ واضح کریں گے کہ اگر ان کی سرزمین ہمارے خلاف حملوں کے لیے استعمال کی جائے گی تو یہ بات ہم برداشت نہیں کریں گے اور اگر انہوں نےخاطر خواہ اقدامات نہ کیے تو انہیں اس کا خمیازہ بھگتنا پڑے گا۔‘

اپنے خطاب میں وزیر اعظم نے کسی ملک کا نام نہیں لیا لیکن ماضی میں اکثر بڑے حملوں کے لیے براہ راست نہیں تو باالوسطہ طور پر پاکستانن کو ذمہ دار ٹھہرایا جاتا رہا ہے۔

منموہن سنگھ نے کہا کہ متعلقہ حکام مکمل چوکسی برت رہے ہیں اور امن و عامہ میں خلل ڈالنے کی کسی بھی کوشش سے سختی سے نمٹا جائے گا۔