ریاض مسرور بی بی سی اردو ڈاٹ کام، سرینگر

	لال چوک کے داخلی و خارجی راستے بند کر دیے گئے ہیں

پولیس نے چھ اکتوبر کو ہونے والے ’آزادی مارچ‘ کو ناکام بنانے کے لیے شہر میں سخت حفاظتی انتظامات کیے ہیں اور حریت تحریک کے متعدد رہنماؤں کو گرفتار بھی کیا ہے۔

صوبائی ناظم مسعود سامون نے بی بی سی کو بتایا ہے کہ یہ فیصلہ پولیس اور سکیورٹی ایجنسیوں کی طرف سے سوموار کو ’آزادی مارچ‘ کے دوران تشدد کے خدشہ کے پیش نظر لیا گیا۔ ان کا کہنا تھا کہ سنیچر کو صوبائی انتظامیہ کے ایک اعلیٰ سطحی اجلاس میں سیکورٹی صورتحال اور علیٰحدگی پسندوں کے اہتمام سے ہونے والے لال چوک مارچ کے تمام پہلوؤں کا جائزہ لیا گیا اور فیصلہ یہ ہوا کہ ’عام لوگوں کی سلامتی کے لیے اتوار کی صبح سے ہی کرفیو نافذ کیا جائے‘۔

پولیس اور نیم فوجی دستوں کے ہزاروں جوانوں نے لال چوک کو گھیرے میں لیا ہوا ہے اور علاقے کے تمام داخلی و خارجی راستے خاردار تاریں اور دیگر رکاوٹیں لگا کر بند کر دیے گئے ہیں۔ سرینگر شہر کے علاوہ دیگر مضافاتی علاقوں میں لوگوں کی نقل و حرکت محدود کر دی گئی ہے۔

پولیس حکام نے سرینگر اور وادی کے دیگر مسلم اکثریتی علاقوں میں لاؤڈ سپیکرز پر اعلان کر کے عوام سے اپنے گھروں تک محدود رہنے کو کہا ہے۔اتوار کو صبح ساڑھے چار بجے سرینگر کے بڑے بازاروں اور اندروانی بستیوں میں لاؤڈ سپیکر لگی پولیس گاڑیوں نے اعلان کیا کہ’لوگ گھروں میں ہی بیٹھے رہیں اور باہر نکلنے کی کوشش نہ کریں‘۔ اس دوران کسی بھی جگہ پانچ افراد کے اجتماع پر پابندی کا اعلان کیا گیا ہے۔

حریت کانفرنس کے دونوں دھڑوں نے کرفیو کے نفاذ کو غیر جمہوری قرار دیا ہے اور میر واعظ عمر فاروق اور سید علی گیلانی نے بی بی سی کے ساتھ الگ الگ گفتگو میں اس فیصلہ کی مذمت کی ہے۔

	مظاہروں کی حالیہ لہر دو ماہ قبل شروع ہوئی تھی

سرینگر پولیس نے سنیچر کو رات گئے علیحدگی پسند رہنما یٰسین ملک کے علاوہ حریت قیادت کے متعدد رہنماؤں کو بھی حراست میں لے لیا جبکہ سید علی گیلانی اور میر واعظ عمر فاروق کی ان کے گھروں میں نظربندی کے احکامات بھی جاری کر دیے گئے۔ واضح رہے کہ شبیر احمد شاہ، محمد اشرف صحرائی، آسیہ اندرابی اور دیگر درجنوں حریت کارکن پہلے ہی زیرِ حراست ہیں۔

یہ گزشتہ چند ماہ میں دوسرا موقع ہے کہ پولیس نے لال چوک میں کسی ریلی کے انعقاد سے قبل وادی میں کرفیو نافذ کیا ہے۔ اس سے قبل جب حریت رابطہ کمیٹی نے پچیس اگست کو لال چوک میں آزادی مارچ کا اعلان کیا تھا تو حکومت نے چوبیس اگست کی شام سے کرفیو نافذ کر دیا تھا جوگیارہ روز تک جاری رہا تھا۔

واضح رہے کہ کشمیر میں گزشتہ دو ماہ سے بھارت مخالف مظاہروں کا سلسلہ جاری ہے اور ان مظاہروں کے دوران پرتشدد واقعات میں کم از کم چالیس افراد ہلاک اور سینکڑوں زخمی ہو چکے ہیں۔