ریاض مسرور بی بی سی اُردو ڈاٹ کام، سرینگر

	کشمیر کے بعض اضلاع سے پولیس اور عوام کے درمیان جھڑپوں کی خبریں ہیں

کشمیر زون کے انسپکڑ جنرل پولیس ڈاکٹر بی سرنواس نے بی بی سی کوبتایا کہ پولیس نے شوپیان اور بارہمولہ میں احتیاط کے طور کرفیو نافذ کیا ہے، لیکن حالات کا جائزہ لیا جا رہا ہے اور ہوسکتا ہے شام تک اس میں نرمی کی جائے۔‘

بارہمولہ کے الطاف احمد نے بی بی سی کوبتایا کہ کرفیو کے دوران مقامی نوجوانوں نے مظاہرہ کرنے کی کوشش کی جس کے بعد قصبہ میں فوج طلب کی گئی اور مظاہرین منتشر ہوگئے۔

شوپیان کے نثارالحق نے بتایا کہ وہاں فوج اور نیم فوجی عملہ نہ صرف شاہراہ پر بلکہ اندرونی بستیوں میں تعینات ہے۔

احتیاط ہم شوپیان اور بارہمولہ میں احتیاط کے طور کرفیو نافذ کیا ہے، لیکن ہم حالات کا جائزہ لے رہے ہیں اور ہوسکتا ہے شام تک اس میں نرمی کی جائے بی سرنواس، انسپکٹر جنرل پولیس

واضح رہے شوپیان میں جمعہ کے روز مظاہرین پر پولیس کی فائرنگ سے ایک اٹھارہ سالہ نوجوان سجاد گنائی ہلاک اور کئی دیگر زخمی ہوگئے تھے۔ اسی طرح بارہمولہ میں بھی مظاہرین پر فائرنگ کے دوران کپوارہ کا رہنےوالا امتیاز احمد نامی نوجوان ہلاک ہوگیا تھا۔

آزادی کے حق میں احتجاج کرنے والے مظاہرین اور پولیس کے درمیان تازہ تصادم جنوبی ضلع شوپیاں کی مرکزی جامع مسجد کے باہر جمعہ کی نماز کے فوراً بعد ہوا تھا۔
پولیس نے شوپیان واقع سے متعلق کہا ہے کہ مشتعل ہجوم میں سے جب کسی نے ایک پولیس اہلکار پر گولی چلائی اور اس کی بندوق چھیننے کی کوشش کی تو پولیس کو گولی چلانی پڑی ۔ بارہمولہ واقع سے متعلق بھی پولیس ہجوم میں نامعلوم افراد کے ذریعہ فائرنگ کو پولیس ایکشن کی وجہ بتایا ۔

ادھر سرینگر کے تجارتی مرکز لالچوک میں بھی سنیچر کی صبح سے ہی تناؤ کی صورتحال بنی رہی۔ لالچوک میں جمعہ کے روز ایک مظاہرے کے دوران لبریشن فرنٹ رہنما محمد یٰسین ملک اور ان کے ساتھیوں کو نیم فوجی اہلکاروں نے تشدد کا نشانہ بنایا تھا، جس کے بعد مسٹر ملک کے آبائی علاقہ مائسمہ میں مزید فورس تعینات کی گئی۔ مائیسمہ کے رہنے والے عبدالاحد نے بتایا کہ ،’یہاں تو بغیر اعلان کے کرفیو ہے۔‘