شکیل اختر بی بی سی اردو ڈاٹ کام، دلی

	کانگریس کو مسلسل اسمبلی انتخابات میں شکست کا سامنا کرنا پڑ رہا ہے

کانگریس نے دلی، مہاراشٹر، راجستھان، چھتیش گڑھ اور مدھیہ پردیش میں پارٹی کے انتخابات میں کامیابی کے امکانات کا جائزہ لینے کے لیے کمیٹیاں بنائی ہيں اور اس سلسلے میں ماہرین کی مدد لی جارہی ہے۔ ان ریاستوں میں اکتوبر میں انتخابات متوقع ہیں۔ مہنگائی کے سبب پورے ملک میں متوسط اور غریب طبقہ پریشان ہے۔ کانگریس کی مرکزی حکومت نے حالیہ بجٹ میں تنخواہ یافتہ طبقے کو کچھ مراعات دی تھیں لیکن بظاہر ان سے کوئی فرق نہيں پڑا ہے۔ انتخابات کے اس ماحول میں زبردست مہنگائی کانگریس کے لیے اچھا شگون نہیں ہے۔

چین سے تلخی کے دوران پرنب کا دورہ

	ادھر ہندوستان اور چین کے درمیان رشتے استوار ہورہے ہيں

اقتصادی تعلقات کے برعکس سرحدی تنازعے پر دونوں ملکوں کے درمیان کشیدگی برقرار ہے۔ اروناچل پردیش کے علاقوں کے بعد گزشتہ دنوں چین نے سکم کے’فرنگر پوائنٹ‘ کے علاقے پر دعویٰ کیا ہے۔ چین نے اس علاقے میں واقع فوجی چوکیوں کو منہدم کرنے کی بھی دھمکی دی ہے۔ ادھر ہندوستان نے بھی جواب میں اس علاقے کا مفصل سروے شروع کیا ہے۔ گزشتہ دنوں مغربی کمان پر بھی چین کی سرحد کے نزدیک لداخ میں ہندوستان نے دولت بیگ ہوائی پٹی کو تینتالیس سال بعد فوجی استمعال کے لیے دوبارہ کھول دیا ہے۔

سرحد کشیدی کے درمیان ہندوستان کی طرف سے حال میں اولمپک ٹارچ ریلے کے دوران تبتی پناہ گزینوں کے احتجاج پر پابندی اور چین میں زلزلے سے متاثرہ افراد کی مدد کے لیے پانچ ملین ڈالر کی امداد سے تعلقات میں کچھ بہتری ضرور پیدا ہوئی ہے۔ اب وزیر خارجہ پرنب مکھرجی چار روز کے دورے پر بیجنگ پہنچے ہیں۔گزشتہ چار برس میں ان کا بیجنگ کا یہ پہلا دورہ ہے۔

دہشت گردی مخالف ریلیوں کا سلسلہ

	مسلمان اس وقت ہندوستان میں دفاعی حالت میں ہیں

میڈیا میں زبردست پراپیگنڈہ کے نتیجے میں یہ ادارے اب دباؤ میں ہیں۔ چند ہفتے قبل دارالعلوم دیوبند نے ہر طرح کی دہشت گردی کو اسلام کے خلاف قرار دیا۔ جمعیت العلماء ہند نے پورے ملک میں دہشت گرد مخالف ریلیاں، جلسے جلوس اور کانفرنسوں کا سلسلہ شروع کیا ہے۔

انصار برنی کی ملک بدری

	انصاربرنی نے ہندوستانی قیدی کشمیر سنگھ کی رہائی میں اہم رول ادا کیا تھا

ہندوستان کے بین الاقوامی ہوائی اڈوں پر خفیہ اداروں کا زبردست جال بچھا ہوا ہے۔ یہاں غیر ملک سے ہندوستان آنے والے تمام مسافروں کی فہرست پرواز کے پندرہ منٹ کے اندر متعلقہ ائر لائنز کو ہندوستان کے امیگریشن حکام کے حوالے کرنا لازمی ہے۔ انصار برنی نہ صرف ایک معروف شخصیت ہیں بلکہ وہ گزشتہ دنوں ہندوستان آئے تھے۔ بظاہر ایسا لگتا ہے کہ ان کا اس بار ہندوستان آنا کسی وجہ سے پسند نہیں کیا گیا۔ یہ بھی دلچسپ ہے کہ جب سے کشمیر سنگھ کی رہائی ہوئی ہے اور سربجیت سنگھ کی موت کی سزا ختم کرانے کے لیے انصار برنی نے کوششیں شروع کی ہیں کئی پاکستانی قیدی ہندوستانی جیلوں میں پراسرار طریقے سے مر چکے ہیں۔

ہتھیار برادر طلبہ
جنوبی دلی کے کالجوں اور سکولوں میں تقریباً بارہ فی صد طلبہ اپنے تحفظ کے لیے کوئی نہ کوئی ہتھیار لے کر آتے ہیں۔

گرو تیغ بہادر ہاسٹل اور صفدر جنگ ہاسٹل میں اطلاعات کے مطابق لڑکوں میں ہتھیار لے کر چلنے والوں کی تعداد پندرہ فی صد سے زیادہ ہے۔ مار پیٹ میں بھی لڑکے آگے ہیں۔ یہ سروے 14 سے 19 برس کے طلبہ کے درمیان کیا گیا۔ سروے کے مطابق گزشتہ ایک برس میں انتالیس فیصد سے زیادہ طلبہ کو گزشتہ اکتالیس برس میں مارپیٹ کے دوران چوٹ آئی ہے۔

طلبہ جو ہتھیار لے کر چلتے ہيں ان میں چاقو، پستول، ڈنڈا، بیٹ، کوڑا، اور چھوٹی تلوار شامل ہے۔