انور سِن رائے بی بی سی اردو ڈاٹ کام، لندن

فلم کے مرکزی کردار بریڈ پٹ اور کیٹ بلنشٹ نے ادا کیے ہیں

وقت کے عام تصور کے برخلاف بنائی جانے والی فلم ’کیوریس کیس آف بینجمن بٹن‘ انسان کی ذہنی عمر کے الٹے سفر کے بارے میں نہیں ہے بلکہ الٹی اور خالص جسمانی نشو نما کے بارے میں ہے۔

بینجمن بٹن نامی یہ بچہ اسی سال کا بوڑھا پیدا ہوتا ہے۔ اس کے عمر تو اسی سال ہے لیکن اس کا جسم بچوں جیسا ہے۔ اس کی ماں اسے پیدا کرتے ہوئے مر جاتی ہے۔ اس کا باپ اس کی شکل اور جسمانی حالت دیکھ کر بھوت پریت ہونے سے تعبیر کرتا اور اسے پالنے سے اٹھا کر باہر ایک اور گھر کے دروازے پر پھینک آتا ہے۔ جو دراصل ایک ریٹائرمنٹ ہوم یا بوڑھوں کی رہائش گاہ ہے۔

اس ریٹائرمنٹ ہوم کی نگراں کوئینی (تاراجی پی ہینسن) اس کی اپنے بچے کی طرح پرورش کرتی ہے اور وقت گزرنے کے ساتھ ساتھ اسے اپنی ہی اولاد کی طرح سمجھنے لگتی ہے اور اس کی ماں اور باپ کا کردار ادا کرتی ہے۔ اس پرورش اور عمر کے الٹے سفر کے دوران کوئینی پر کیا کیا گزرتی ہے اور بینجمن کو ایسے حالات سے گزرنا پڑتا ہے۔ ان غیر معمولی حالات میں انسانی رشتے کیسے بنتے بگڑتے ہیں؟ فلم اسی اتار چڑھاؤ کے بارے میں ہے۔

بینجمن بٹن کا کردار بریڈ پٹ نے ادا کیا ہے اور ان کے ساتھ مرکزی کرداروں میں کیٹ بلنشٹ، تارجی پی ہینسن، ٹیلڈا سونٹن اور جیسن فلیمنگ کے علاوہ کئی اہم اداکار اور اداکارائیں ہیں۔

فلم انیس سو بیس میں لکھی گئی ایف سکاٹ فٹس جیرالڈ کے کہانی پر بنائی گئی ہے۔ اس کہانی کو تو اپنے زمانے میں کوئی خاص توجہ حاصل نہیں ہو سکی لیکن ڈیوڈ فنچر کی ہدایات کاری میں اس پر فلم کے بعد اب بہت سے مبصرین کا یہ کہنا ہے کہ یہ ایک ایسی کہانی ہے جو انسانوں کی غیر معمولی محبت، غیر معمولی خوشیوں اور موت کی ایسی غیر معمولی اُداسی کے بارے میں ہے جو وقت سے بالا ہے۔

	بریڈ پٹ نے فلم میں بینجمن کا کردار ادا کیا ہے اور انہیں بہترین اداکار کے لیے نامزدگی حاصل ہوئی ہے

آسکر میں بینجمن بٹن کے مقابل ’سلم ڈاگ میلینر‘ اور ’دی ریڈر‘ بھی ہیں جن کے بارے میں کئی آسکروں کی پیش گوئیاں کی جا رہی ہیں اور یہ دونوں فلمیں خاص طور پر اپنے موضوعات کے اعتبار سے الگ فلم سازی کے اعتبار بہترین ہیں۔ لیکن دی ریڈر اگر المیہ کے دائرے میں آتی ہے تو بینجمن بٹن ایک انوکھا رزمیہ ہے۔

بہترین فلموں کے آسکر کے لیے نامزد ہونے والی یہ تینوں فلمیں فلم بینوں کے لیے دلچسپی حاصل کر رہی ہیں لیکن باکس آفس پر زیادہ کامیابی کسے حاصل ہوتی اور کسے آخر کار زیادہ آسکر کا اعزاز حاصل ہوتا ہے اس کا فیصلے ابھی ہونا ہے لیکن یہ فلمیں ایک سے زیادہ بار دیکھے جانے کے قابل ہیں۔