دیو پٹیل کو ’برٹِش بریک تھرو سٹار‘ قرار دیا گیا

بھارتی شہر ممبئی میں غربت و افلاس کے تناظر میں بنائی گئی اس فلم کو سال کی بہترین فلم، ڈائریکٹر ڈینی بوئیل کو سال کا بہترین ہدایتکار اور ہیرو دیو پٹیل کو سال کا بہترین ابھرتا ہوا ستارہ قرار دیا گیا۔

رچرڈ ایٹنبرا فلم ایوارڈز میں فلم ’دا ریڈر‘ کے لیے کیٹ وِنسلٹ نے سال کی بہترین اداکارہ اور ’دا ریسلر‘ کے ہیرو مِکی رؤک نے بہترین اداکار کا انعام حاصل کیا۔

اس برس ’لوگوں کی پسند‘ کی کیٹیگری بھی متعارف کروائی گئی تھی جس میں سلم ڈاگ مِلینیئر کے دیو پٹیل کو ’برٹِش بریک تھرو سٹار‘ قرار دیا گیا۔

پٹیل نے کہا کہ انہیں اس خصوصی ستائش انتہائی مسرت ملی ہے۔ اٹھارہ سالہ سٹار نے کہا: ’اس فلم کو جس بڑے پیمانے پر پذیرائی حاصل ہوئی ہے اس نے مجھے حیران کر دیا ہے۔ میں آپ سب کی حوصلہ افزائی کے لیے شکرگزار ہوں‘۔

ان ایوارڈز کے انتخابات کے لیے برطانیہ بھر سے فلم ناقدین رائے دیتے ہیں اور ناقدین نے چھ ہفتے تک آنلائن اپنے ووٹ دیے۔

اس سے قبل ’سلم ڈاگ ملینئیر‘ نے امریکہ کے پروڈیوسر گلڈ ایوارڈز میں بہترین فلم کا اعزاز جیتا تھا۔

اس فلم کو دس شعبوں میں اکیڈیمی ایوارڈ کے لیے نامزد کیا گیا ہے جس میں بھارتی موسیقار اے آر رحمان کی تین نامزدگیاں بھی شامل ہیں۔

پروڈیوسر گلڈ ایوارڈز میں ’سلم ڈاگ ملینیئر‘ کا مقابلہ ’مِلک‘، ’دا ڈارک نائٹ‘، ’دا کیورئس کیس آف بنجمن بٹن‘ اور ’فراسٹ /نکسن‘ جیسی فلموں سے تھا۔