آسکر کی تقریب بہت کم لوگوں نے ٹی پر دیکھی

امریکی ٹی وی چینل اے بی سی سے براہ راست نشر ہونے والی اس تقریب کو تین کروڑ بیس لاکھ افراد نے دیکھا جو دو ہزار تین میں امریکہ کے عراق پر حملے کے ایک دن بعد ٹی وی دیکھنے والوں سے دس لاکھ کم تھی۔

گزشتہ برس کی تقریب کو چار کروڑ دس لاکھ افراد نے دیکھا تھا۔

اگر اس کا موازنہ ٹیلنٹ شو امریکن آئڈل سے کیا جائے تو منگل کو نشر ہونے والے اس پروگرام کو تین کروڑ افراد دیکھتے ہیں۔

اس سال کی ٹی وی ریٹنگ انیس سو چوہتر جب سے ٹی وی ریٹنگ جانچے کا آغاز ہوا ہے سب سے کم رہی۔

ٹی وی دیکھنے والوں کی ریکارڈ کم تعداد ایک ایسے سال دیکھنے میں آئی ہے جب آسکر کی دوڑ میں ایسی فلمیں صف اول میں رہیں جن کی تعریف کی گئی لیکن انہوں نے باکس آفس پر کوئی بہت قابل ذکر کارکردگی نہیں دکھائی۔

آسکر ایوراڈ کی سال کی بہترین فلم کی دوڑ میں شامل پانچ فلموں میں صرف ایک مزاحیہ فلم ’جونو‘ نے باکس آفس پر دس کروڑ ڈالر کا دھندا کیا۔

آسکر تقریب کی سب سے کامیاب ترین فلم ’ نو کنٹری فار اولڈ مین‘ جسے بہترین فلم سمیت چار ایوارڈ ملے شمالی امریکہ میں باکس آفس پر صرف چھ کروڑ چالیس لاکھ ڈالر کا دھندا کر سکی۔

آسکر ایوارڈ کی تقریب کو انیس سو اٹھانوے میں سب سے زیادہ پانچ کروڑ پچاس لاکھ افراد نے دیکھا تھا جب بلاک بسٹر فلم ٹائٹنک نے گیارہ آسکر ایوارڈ حاصل کیئے تھے۔