ریحانہ بستی والا بی بی سی اردو ڈاٹ کام، ممبئی

	اب کنگ خان نے دنیا کی پچاس طاقتور شخصیات میں اپنی جگہ بنا لی ہے

’پاور فل‘ خان‘
بالی وڈ کے خانوں نے انڈسٹری میں تو اپنی سلطنت قائم رکھی ہے لیکن اب کنگ خان نے دنیا کی پچاس طاقتور شخصیات میں اپنی جگہ بنا لی ہے۔امریکی میگزین ’ نیوز ویک‘ نے دنیا کی طاقتور ہستیوں کے ایک فہرست شائع کی ہے جس میں امریکہ کے نو منتخب صدر باراک اوبامہ اگر نمبر ون پر ہیں تو شاہ رخ نے بھی اکتالیسوں نمبر پر جگہ پائی ہے۔بالی وڈ میں کنگ کون ہے اس پر چاہے جتنی بحث چھڑی ہو لیکن شاہ رخ نے ثابت کر دیا کہ وہ اصلی کنگ خان ہیں۔

چک دے
دس فلاپ فلموں اور تقریباً سو کروڑ روپیوں کے نقصان کے بعد اب یش چوپڑہ ایک بار پھر ہدایت کاری کی کمان سنبھالیں گے۔ہمیشہ کامیاب فلمیں دینے والی کمپنی جب فلاپ پر فلاپ فلمیں دینے لگے تو نام کے ساتھ بزنس بھی متاثر ہونے لگا۔بلیک میں اداکاری کا جادو جگانے والی رانی مکھرجی کی دو فلمیں لاگا چنری میں داغ، تارا رم پم فلاپ ہوئیں اور یش بینر نے مادھوری کے ساتھ فلم آجا نچ لے بنائی لیکن مادھوری کا جادو بھی نہیں چل سکا۔ اس کے بعد ’دل والے دلہنیا لے جائیں گے‘ کے ہدایت کار اور جونئیر چوپڑہ آدتیہ نے ایک بار وہی جادو جگانے کے لیے شاہ رخ کے ساتھ رب نے بنا دی جوڑی بنائی لیکن اس نے بھی کچھ خاص اثر نہیں ڈالا۔نتیجہ ۔۔۔۔۔سینئر چوپڑہ نے اب کمان سنبھالنے کا فیصلہ کیا ہے۔چلئے اب شاید ہم ایک اچھی فلم کی توقع کر سکتے ہیں۔

	صرف دوستی ہے یا کچھ اور بھی

ریا سین نے کاٹنا سیکھا
ریا سین اب کاٹ سکتی ہیں؟ کسی کو نہیں بلکہ سبزی کو ۔جی ہاں اور وہ اس کے لیے اپنے فلمساز ریتو پورنو گھوش کی شکر گزار بھی ہیں۔’نوکا ڈوبی‘ بنگالی فلم میں ریا نے سبزی کاٹنا ، جھاڑو لگانا اور زمین پر پوچھا مارنا بھی سیکھا ہے۔ویسے ریا جب آپ کی ’ کام والی بائی‘ کسی روز چھٹی کر لےتویہ باتیں آپ کے کام آسکتی ہیں۔

	قطرینہ سلمان کی اچھی دوست سمجھی جاتی ہیں

پرفیکٹ شوہر
عامر پرفیکٹ فنکار ہی نہیں ایک پرفیکٹ شوہر بھی ہیں تبھی تو اتنی مصروفیت کے باوجود انہوں نے اپنی بیگم کرن راؤ کی فلم دھوبی گھاٹ کی عکس بندی کے دوران تین دن نکالے۔کام اتنا زیادہ تھا کہ کرن کو وہیں قریب ایک فلیٹ لینا پڑا۔عامر نے مسلم اکثریتی علاقے بھنڈی بازار میں ایک فلیٹ کرایہ پر لیا اور اپنی فلم گجنی کی تشہیر کا کام تین دنوں تک بند کیا ، خود کرن کے ساتھ اس علاقے میں رہے۔

ہیرا منڈی میں پاک
سنجے لیلا بھنسالی شاید اس وقت دونوں ممالک کے حالات سے بالکل گھبرائے ہوئے نہیں ہیں اسی لیے تو انہوں نے اپنی فلم ’ہیرا منڈی‘ کے لیے پاکستانی ہیرو عمران عباس کو لینے کا فیصلہ کیا ہے۔فلم لاہور کے ریڈ لائٹ علاقے کی کہانی ہے۔اس کہانی پر پہلے ہی مہیش بھٹ کی بیٹی پوجا بھٹ فلم کجرارے بنا رہی ہیں اور اس میں گلوکار اداکار ہمیش ریشمیا کے ساتھ پاکستانی ٹی وی اداکارہ مونا لیزا ہیں۔

	میں باپ نہیں بننا چاہتا

میں باپ بننا نہیں چاہتا
جی ہاں یہ کوئی اور نہیں ارجن رام پال کہہ رہے ہیں حالانکہ حقیقی زندگی میں وہ دو بچوں کے باپ ہیں لیکن فلم کے پردے پر وہ ایسا کوئی رول کرنا نہیں چاہتے اس لیے تو انہوں نے میگھنا گلزار کی فلم کی پیشکش ٹھکرا دی۔ٹھیک تو ہے جب فلم کے پردے پر چالیس سال سے زیادہ عمر کے ہیرو اٹھارہ سال کی کم سن کے ساتھ عشق لڑا رہے ہوں تو بیچارے ارجن رام پال نے کون سے خطا کی ہے ؟