ریحانہ بستی والا بی بی سی اردو ڈاٹ کام ، ممبئی

	شاہد اور ثانیہ کی دوستی کے چرچے عام ہیں

شاہد ثانیہ کنکشن
شاہد کپور وشال بھاردواج کی فلم’ کمینے‘ کے سیٹ پر شوٹنگ کر رہے تھے اور وہاں اچانک ان کی ایک خاص مہمان آگئیں۔یہ تھیں ثانیہ مرزا۔دونوں وہاں لوگوں سے بے پرواہ کبھی سیٹ پر تو کبھی شاہد کی وین میں گپ شپ کرتے رہے۔اب دونوں کے درمیان کون سا کنکشن ہے اس کا فیصلہ ہم آپ پر چھوڑتے ہیں۔

اداکاری کے شہنشاہ
یہ حقیقت ہے کہ دلیپ کمار کو بالی وڈ میں اداکاری کا شہنشاہ مانا جاتا ہے اور اسے اب دستاویزی شکل دینے کا فیصلہ اشوک بھٹ نے کیا ہے۔ وہ دلیپ کمار پر ساٹھ منٹ کی دستاویزی فلم ’ابھینئے سمراٹ کی داستان‘ بنا رہے ہیں۔یہ فلم اسی سال ستمبر میں سیٹ پر جائے گی۔اس میں دلیپ کمار کی اداکارہ بیوی سائرہ بانو کے علاوہ ان کی زندگی کے چند اہم دوستوں کے انٹرویو چند یادگار اور کامیاب فلموں کے مناظر اور بہت کچھ شامل ہو گا۔ہمیں لگتا ہے کہ آج کے نئے اداکاروں کے لیے یہ واقعی ایک ایسی دستاویزی فلم ہو گی جسے وہ اپنی غیر ملکی فلموں کی سی ڈی لائبریری میں پہلے شیلف پر رکھنا پسند کریں گے۔

	دل کی مراد پوری ہوئی

مہربان موسم
قطرینہ کیف اوٹی میں رنبیر کے ساتھ راج کمار سنتوشی کی فلم ’عجب پریم کی غضب کہانی ‘ کی شوٹنگ میں مصروف تھیں۔انہیں سولہ جولائی کو ایک دن کی رخصت چاہئے تھی کیونکہ اس دن ان کی سالگرہ ہے اور وہ سارا دن اپنے دوست سلمان خان کے ساتھ گزارنا چاہتی تھیں۔قطرینہ نے شاید دل سے دعا مانگی کیونکہ موسم اچانک خراب ہو گیا اور سنتوشی نے شوٹنگ ہی کینسل کر دی۔

اب راکھی پکائے گی
راکھی پکاتی ہے یہ تو سب جانتے ہیں۔آپ حیران نہ ہوں وہ واقعی میں ٹی وی شو پر کھانا پکائیں گی تو آپ کیا سمجھے ممبیا زبان کا پکانا یعنی بور کرنا۔ہم یہ کہنے کی ہمت کیسے کر سکتے ہیں بھئی۔۔۔۔۔

	ملکہ اپنے بولڈ رویہ کے لیے مشہور ہیں

عمران کا شکوہ
بالی وڈ میں سب نے عمران ہاشمی کو کِسنگ کِنگ مان لیا ہے۔ لیکن کسی نے بھی راہول بوس کو یہ خطاب نہیں دیا۔راہول نے اپنی فلموں میں کئی ہیروئینوں کے ساتھ بوس و کنار کے مناظر کیے۔ اب آنے والی فلم مان گئے مغل اعظم میں انہوں نے ملکہ کو کئی کِس کیے۔بس اسی لیے عمران ہاشمی کو گلہ ہے کہ یہ لیبل صرف انہی کو کیوں دیا گیا ؟

عمران کی باڈی
انڈسٹری میں آنے والا ہر ہیرو اب اپنی باڈی بنانے میں لگا ہے تو پھر عمران خان اس سے پیچھے کیوں رہتے۔جی ہاں انہیں فلم جانے تو یا جانے نا کی کامیابی کے بعد سنجے گدھوی نے اپنی فلم’ کڈنیپ اینڈ لک‘ کے لیے سائن کر لیا ہے اور وہ اپنی باڈی بنانے میں مصروف ہیں۔