عارف وقار بی بی سی اردو ڈاٹ کام، لاہور

	سید نور کا کہنا تھا کہ یٰسین گوریجہ کی ڈائریکٹری میں آخری اندراج صرف 2003 کی فلموں تک ہے

اس تقریب کے روح و رواں فلم جرنلسٹ طفیل اختر تھے جن کی ذاتی کاوش نے سید نور، بہار بیگم، کلیم عثمانی اور خواجہ پرویز جیسے مصروف فنکاروں کو ایک چھت تلے جمع کر لیا تھا۔ اداکاری، ہدایت کاری، گیت نگاری اور سکرپٹ رائٹنگ سے تعلق رکھنے والے کئی خواتین و حضرات نے مرحوم کی شخصیت کے مختلف پہلؤں پر روشنی ڈالی لیکن تقریب کی اہم ترین بات یہ تھی کہ اس موقعے پر طفیل اختر کی مرتب کردہ کتاب صورتِ یٰسین کی رونمائی بھی ہوئی۔

یہ کتاب مرحوم کے بارے میں مختلف ادیبوں اور صحافیوں کے تاثرات کا ایک مجموعہ ہی نہیں بلکہ اُن کی ایک مستند سوانح عمری بھی ہے جس میں طفیل اختر نے پوری تحقیق کے ساتھ تاریخ وار تمام اہم واقعات کو ریکارڈ کردیا ہے۔

	یٰسین گوریجہ نے فلمی صنعت کے ہر شعبے میں نئے آنے والوں کی حوصلہ افزائی اور عملی مدد کی: بہار بیگم

1926 میں جنم لینے والے یٰسین گوریجہ نے ہندو مسلم مخلوط معاشرے میں آنکھ کھولی۔ اپنی نوجوانی ہی میں اس نے مسلم علیحدگی پسندی کی تحریک کو پروان چڑھتے بھی دیکھا اور پھر 21 برس کی عمر میں اسلام کے نام پر قائم ہونے والے اس وطن کی جانب ہجرت بھی کی۔

ڈائری میں ایک جگہ لکھتے ہیں:
’ آج کے دور میں جبکہ ہندوؤں کو دشمن قرار دیا جا رہا ہے اور یہ محض اس لیے کہ پاکستان اور انڈیا کے درمیان کشمیر کا مسئلہ ہے ورنہ میں نے جو بیس سال ہندوؤں میں گزارے۔ آریہ ہائی سکول سے میٹرک کیا۔ سکول میں دس سال تک تعلیم حاصل کی۔ زیادہ تر دوست ہندو اور سکھ لڑکے ہی تھے، لیکن کسی قسم کا بغض یا نفرت کا جذبہ نہ تھا۔ اوم پرکاش میرا کلاس فیلو تھا۔ خالص پنڈت اور برہمن گھرانہ۔ لیکن میں ہر وقت ان کے گھر کھیلتا کودتا رہتا۔ بالکل بھائیوں جیسا پیار۔ لچھمن داس، گوبندرام، جیوتی پرکاش، رام پرکاش، جگدیش چندر، گوردیال سنگھ اب کتنے نام دہرائے جائیں۔ ان کے گھروں میں آنا جانا۔ ان کے ماں باپ بھی ہمیں اولاد کی طرح سمجھتے‘۔ٰ

	فلمی صنعت کی تاریخ نویسی کا بیڑا اب طفیل اختر نے اٹھایا ہے

یٰسین گوریجہ کی یہ گمنام اور نامکمل ڈائری شاید تاریخ کی گرد میں کہیں اُڑ جاتی لیکن اُن کے جانشین طفیل اختر نے دفتر کی ردّی میں سے اس ہیرے کو چھان کر الگ کر لیا اور اب صورتِ یٰسین نامی اپنی کتاب میں ایک باب کے طور پر اسے شامل کر لیا ہے۔

26 دسمبر 2007 کو مرحوم کی یاد میں منعقدہ تقریب کے دوران کم و بیش سبھی مقرّرین نے یٰسین گوریجہ کی فِلم ڈائریکٹری کو ایک عظیم کارنامہ قرار دیا۔

یہ ڈائریکٹری انہوں نے 1966 میں مرتب کرنی شروع کی تھی اور اس میں سال بھر کی فلموں کا مفصل احوال اور فلمی دنیا سے تعلق رکھنے والے ہر اہم شخص کے بارے میں مکمل معلومات ہوتی تھیں۔ ابتدائی ایڈیشنوں میں 1948 کے بعد کی تمام پاکستانی فلموں کا مختصر احوال درج کیا گیا اور بعد میں معلومات کا یہ دائرہ ماضی کی طرف 1931 تک پھیل گیا یعنی اولین متکّلم فلم سے لیکر لمحہ حاضر تک کی تمام پاکستانی فلموں کا بنیادی ڈیٹا اس میں شامل کرلیا گیا۔

	جن لوگوں کے دم سے فلمی صحافت کی لاج قائم ہے ان میں سرِ فہرست گوریجہ صاحب کا نام ہے: نغمہ نگار خواجہ پرویز

مہمانِ خصوصی بہار بیگم اور ماہنامہ تخلیق کے ایڈیٹر اظہر جاوید نے اس امر پر زور دیا کہ ڈائریکٹری کا نیا ایڈیشن فوراً مرتب ہونا چاہیئے اور اس میں فلمی مصنفوں اور نغمہ نگاروں کا ذکر بھی ہونا چاہیئے کیونکہ فی الحال فلم کی تفصیلات میں محض ڈائریکٹر، پروڈیوسرز، میوزک ڈائریکٹر اور اداکاروں کے نام درج ہیں۔

تقریب کے منتظم اور یٰسین گوریجہ مرحوم کے جانشین طفیل اختر نے وعدہ کیا کہ 2008 میں شائع ہونے والے ایڈیشن میں گذشتہ پانچ برس کی فلموں کا مواد بھی شامل کیا جائے گا اور اسے ہر لحاظ سے پاکستان کی فلم انڈسٹری پر ایک جامع دستاویز کی شکل دے دی جائے گی۔ انہوں نے کہا کہ مرحوم کو خراجِ عقیدت پیش کرنے کا اس سے بہتر کوئی عملی مظاہرہ نہیں ہو سکتا۔