ریحانہ بستی والا
بی بی سی اردو ڈاٹ کام، ممبئی |  |
| | | سلیم اختر کے داماد سمیر آفتاب ’ہندو‘ میں اداکار ہوں گے |
فلم ساز سلیم اختر ہندستان اور پاکستان کے درمیان پنپنے والے عشق کی سچی داستان پر ایک فلم ’ہندو‘ بنا رہے ہیں۔اس فلم کا مہورت اکیس مئی کو ہو گا اور فلم کی شوٹنگ جون میں شروع ہوگی۔ محبت کے متوالوں کو کوئی سرحد نہیں روک سکتی اور نہ ہی مذہب۔ اسی جذبہ کو اجاگر کرنے والا ایک واقعہ حال ہی میں ہند پاک واہگہ سرحد پر پیش آیا۔ دو ہندو لڑکیوں آشا پٹیل اور آشا شرما کو سرحد پر تعنیات جوانوں نے سرحد پار کرتے ہوئے گرفتار کر لیا تھا۔ انہوں نے بتایا تھا کہ انٹرنیٹ کے ذریعہ وہ لاہور میں رہنے والے دو بھائیوں خالد ممتاز اور اس کے بھائی سے محبت کر بیٹھی ہیں اور اب ان کے بغیر نہیں رہ سکتی ہیں، اس لیے وہ ان کے پاس جانے کی کوشش کر رہی تھیں۔ ذرائع کا کہنا ہے کہ پندرہ مئی کو ملک کے تمام ٹی وی چینلز نے اس خبر کو نشر کیا۔ یہ کہانی ان کے دل کو چھوگئی اس لیئے اسے دیکھنے کے بعد سلیم اختر نے اس کہانی پر فلم بنانے کا فیصلہ کیا۔ انہوں نے خود اس فلم کا سکرین پلے لکھا اور کہانی کی ہدایت دینے کے لیئے روہت کرشن کانت کو سائن کیا۔ |  فلم کی کہانی کی ہیروئین مسلمان ہے اور پاکستان میں رہتی ہے لیکن اسے ہندوستان کے ہندو لڑکے سے پیار ہو جاتا ہے۔  فلمساز سلیم اختر |
سلیم کسی بھی طرح کے تنازعہ سے بچنا چاہتے ہیں۔ ان کا کہنا ہے کہ ماضی میں انہیں ان کی ایک فلم میں کافی پریشانی کا سامنا کرنا پڑا تھا اور اب وہ ایسا نہیں چاہتے۔ سلیم کے مطابق فلم میں دو ہیرو اور ایک ہیروئن ہیں یعنی یہ پیار کی تکون (مثلث) ہے۔اس فلم میں ایک ویلن بھی ہے۔ ہیرو کا کردار ان کے داماد سمیر آفتاب کریں گے لیکن ویلن کے لیئے تلاش جاری ہے۔ فلم کی کہانی میں تبدیلی کیوں؟ اس پر سلیم کا کہنا تھا کہ کیا ایک مسلمان لڑکی ایک ہندو سے شادی نہیں کر سکتی اور اس کے جواز میں انہوں نے مغل شہنشاہ اکبر کی جودھا بائی سے شادی سے لے کر فلم ’ویر زارا‘ اور فلم ’بامبے‘ کی مثال دے ڈالی۔ ہندستان اور پاکستان کے باشندوں کی محبت کی کہانی پر مبنی فلم ویر زارا دونوں ملکوں میں بہت مقبول ہوئی تھی۔ | 
براستہ بالی وڈ
