AUSvSA ఆస్ట్రేలియాపై దక్షిణాఫ్రికా విజయం

క్రికెట్ ప్రపంచకప్ 2019 చివరి లీగ్ మ్యాచ్‌లో దక్షిణాఫ్రికా ఆస్ట్రేలియాపై విజయం సాధించింది. దక్షిణాఫ్రికా ఇప్పటికే సెమీస్ అవకాశాలు కోల్పోవడంతో ఆ జట్టుకు ఈ విజయం కొత్త అవకాశాలేమీ అందివ్వలేకపోయింది.

కాగా ఈ మ్యాచ్‌లో ఓటమితో ఆస్ట్రేలియా పాయింట్ల పట్టికలో రెండో స్థానానికి పరిమితమైంది. మూడోస్థానంలో ఉన్న ఇంగ్లండ్‌తో తలపడనుంది.

శనివారం ఉత్కంఠభరితంగా సాగిన మ్యాచ్‌లో దక్షిణాఫ్రికా 10 పరుగుల తేడాతో ఆసీస్‌పై నెగ్గింది. 326 పరుగుల లక్ష్యంతో బరిలోకి దిగిన ఆసీస్‌.. 49.5 ఓవర్లలో 315 పరుగులకు ఆలౌటైంది.

వార్నర్‌ (122), కేరీ (85) పోరాడినా ఫలితం లేకపోయింది.

అంతకుముందు దక్షిణాఫ్రికా టాస్ గెలిచి బ్యాటింగ్ ఎంచుకుని 50 ఓవర్లలో ఆరు వికెట్లు కోల్పోయి 325 పరుగులు చేసింది.

డుప్లెసిస్‌ (100), వాండర్‌డసెన్‌ (95) రాణించడంతో దక్షిణాఫ్రికా 6 వికెట్ల నష్టానికి 325 పరుగులు చేసింది.

ఒక్కసారి మాత్రమే..

ఈ మ్యాచ్ సహా ఆస్ట్రేలియా - దక్షిణాఫ్రికాల మధ్య జరిగిన గత 9 వన్డేల్లో దక్షిణాఫ్రికా 8 గెలిచింది. ఒక్క వన్డేలో మాత్రమే ఆస్ట్రేలియా గెలిచింది.

ఆస్ట్రేలియా ఓటమి పాలవడంతో భారత్ జట్టు పాయింట్ల పట్టికలో అగ్రస్థానంలోకి వచ్చింది. శ్రీలంకపై భారత్ గెలవడంతో 15 పాయింట్లతో పట్టికలో పైకి ఎగబాకింది.

లీగ్ మ్యాచ్లన్నీ ముగియడంతో సెమీస్ మ్యాచ్‌లు ఎవరు ఎవరితో ఆడుతారన్నది ఖరారైంది.

భారత్, న్యూజిలాండ్ మధ్య తొలి సెమీ ఫైనల్.. ఆస్ట్రేలియా, ఇంగ్లండ్ మధ్య రెండో సెమీ ఫైనల్ జరగనున్నాయి.

ఇవి కూడా చదవండి:

బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)