గొల్లపూడి మారుతీరావు కన్నుమూత

ప్రముఖ సినీ నటుడు, రచయిత గొల్లపూడి మారుతీరావు చెన్నైలో ఓ ప్రైవేటు ఆస్పత్రిలో మరణించారు. కొంతకాలంగా ఆయన అనారోగ్యంతో బాధపడుతున్నారు.

గొల్లపూడి.. ఇంట్లో రామయ్య వీధిలో కృష్ణయ్య సినిమాతో నటుడిగా సినీరంగ ప్రవేశం చేశారు.

సంసారం ఒక చదరంగం, యముడికి మొగుడు, స్వాతిముత్యం, ఆలయ శిఖరం, చాలెంజ్, ఆదిత్య 369, లీడర్ వంటి ఎన్నో విజయవంతమైన సినిమాల్లో ఆయన నటించారు.

సినిమాల్లోకి రాకముందు నవలలు, నాటకాలు రాసేవారు. విజయవాడ ఆకాశవాణి కేంద్రంలో కూడా పనిచేశారు. ట్రాన్స్‌మిషన్ ఎగ్జిక్యూటివ్, అసిస్టెంట్ స్టేషన్ డైరెక్టర్‌గా సేవలందించారు.

1959లో ఆంధ్రప్రభ దినపత్రికకు ఉపసంపాదకుడిగా కూడా పనిచేశారు.

ఆ తర్వాత ఆకాశవాణిలో చేరేందుకు హైదరాబాద్ వెళ్లారు. అనంతరం విజయవాడ, సంబల్‌పూర్, చెన్నై, కడప రేడియో కేంద్రాలలో కూడా పనిచేశారు. 20 సంవత్సరాల ఉద్యోగ జీవితం తర్వాత సినీ రంగ ప్రవేశం చేశారు.

ఎన్నో యూనివర్శిటీల్లో పాఠ్యాంశాలుగా గొల్లపూడి రచించిన నాటకాలు, తెలుగు సాహిత్యంపై ఆయన రచనలకు స్థానం దక్కింది.

ఎన్నో సినిమాలకు మాటలు రాశారు. ఆయన మొదటి రచన డాక్టర్ చక్రవర్తికి ఉత్తమ రచయితగా నంది అవార్డు అందుకున్నారు.

విజయనగరంలో 1939 ఏప్రిల్ 14న గొల్లపూడి ఓ మధ్యతరగతి కుటుంబంలో జన్మించారు. ఆయన తల్లిదండ్రులు అన్నపూర్ణ, సుబ్బారావు. తర్వాత కాలంలో విశాఖలో సెటిల్ అయ్యారు.

290కి పైగా చిత్రాల్లో నటించిన గొల్లపూడి ఆరు నంది పురస్కారాలను అందుకున్నారు.

మారుతీరావు రాసిన తొలి కథ ఆశాజీవి. ప్రొద్దుటూరు నుంచి వెలువడే స్థానిక పత్రిక రేనాడులో 1954, డిసెంబరు 9న ఆ కథ ప్రచురితమైంది. చిన్న వయసులోనే రాఘవ కళా నికేతన్ పేరుతో ఓ నాటక బృందాన్ని నడిపేవారు. ఆడది (పినిశెట్టి), కుక్కపిల్ల దొరికింది, స్వయంవరం (రావి కొండల రావు), రిహార్సల్స్ (సోమంచి యజ్ఞన్న శాస్త్రి), వాపస్ (డి.వి.నరసరాజు) నాటకాలకు నిర్మాణం, దర్శకత్వం వహించడంతోపాటు, ప్రధానపాత్రధారిగా నటించారు.

అవార్డులు

తెలంగాణ సీఎం కేసీఆర్ సంతాపం

సుప్రసిద్ధ రచయిత, నటుడు, సంపాదకుడు గొల్లపూడి మారుతీరావు మృతిపట్ల ముఖ్యమంత్రి కెసిఆర్ తీవ్ర దిగ్భాంతి వ్యక్తం చేశారు.

తెలుగు సినిమా రంగానికి ఆయన చేసిన సేవలను ముఖ్యమంత్రి కొనియాడారు. తెలుగు సాహిత్యంపై ఆయన రాసిన పరిశోధనాత్మక రచనలు, నాటకాలు తెలుగు భాషాభివృద్ధికి దిశానిర్దేశం చేశాయని ముఖ్యమంత్రి కేసీఆర్ అన్నారు. మారుతీరావు కుటుంబ సభ్యులకు ప్రగాఢ సానుభూతిని తెలిపారు.

ఇవి కూడా చదవండి.

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)